“Bo-radifilosofi ba peleng ba Bakriste ba ile ba amogela kgopolo ya Bagerika ya gore moya ga o hwe le ya gore moya o hlotšwe ke Modimo gomme wa tsenywa ka mmeleng ge motho a belegwa.”—The New Encyclopædia Britannica (1988), Bolumo 11, letlakala 25.

“Moya o senyago ona o tlo hwa.”—Hesekiele 18:4, PK.

Beibele e bolela mabapi le go bopša ga motho wa pele gore: “Morêna Modimo a na a bopa motho, lerole la mmu; mo dinkong tša xaxwe a budulêla môya wa bophelô, motho a napa a ba môya [Seheberu, neʹphesh] o phelaxo.”—Genesi 2:7.

Lentšu la Seheberu la neʹphesh, leo le fetoletšwego e le “môya,” le ra gore ‘sebopiwa se se hemago.’ Ge Modimo a be a bopa motho wa pele Adama, ga se A ka a tsenya moya o sa hwego ka go yena eupša o ile a tsenya matla a bophelo ao a thekgwago ka go hema. Ka baka leo, go ya ka kgopolo ya Beibele “môya” o šupa sephedi ka bosona. Ge e ba o aroganywa le matla a bophelo ao a tšwago go Modimo, moya o a hwa.—Genesi 3:19; Hesekiele 18:20.

Thuto ya mabapi le moya o sa hwego e tsošitše dipotšišo tše rego: Meoya e ya kae ka morago ga lehu? Go direga’ng ka meoya ya ba kgopo? Ge bao ba ipitšago Bakriste ba amogela nonwane ya gore moya ga o hwe, se se ile sa dira gore ba amogele nonwane e nngwe—thuto ya mollo wa dihele.

Bapiša ditemana tše tša Beibele: Mmoledi 3:19; Mateo 10:28; Ditiro 3:23