Batamela Kgaufsi le Modimo

O Nyaka Gore re Atlege

Jošua 1:6-9

BATSWADI ba lerato ba fagahletše go bona bana ba bona ba atlega, ba phela bophelo bjo bo nago le morero le bjo bo kgotsofatšago. Jehofa, Tatago rena wa legodimong, le yena o nyaka gore bana ba gagwe ba lefaseng ba thabe. Ge a re bontšha tlhokomelo ya gagwe e borutho, o re botša kamoo re ka atlegago ka gona. Ka mohlala, ela hloko mantšu ao a a boditšego Jošua, ao a begilwego go Jošua 1:6-9.

Akanya ka seswantšho se, seo se bontšhitšwego ka go le letona. Ka morago ga lehu la Moše, Jošua e ba moetapele yo mofsa wa Isiraele, yeo e nago le batho ba dimilione. Baisiraele ba be ba itokišeletša go tsena nageng yeo Modimo a e holofeditšego borakgolokhukhu ba bona. Modimo o nea Jošua keletšo. Ge e ba a ka e latela, e tla mo thuša go atlega. Eupša keletšo ye ga e newe bakeng sa go hola Jošua feela. Le rena re ka atlega ge re e diriša.—Baroma 15:4.

Jehofa o botša Jošua—e sego gatee eupša gararo—gore a tie matla le gore a dire senna. (Ditemana 6, 7, 9) Ka ntle le pelaelo, Jošua o be a tla nyaka sebete le go tia matla gore a ete pele setšhaba ka katlego go ya Nageng ya Kholofetšo. Lega go le bjalo, ke’ng seo se ka mo kgontšhago go ba le dika tše tše kgolo?

Jošua a ka hwetša sebete le matla go tšwa mangwalong a buduletšwego. Jehofa o re: “O [hlokomele] melaô ka moka ye Mošê motseta wa-ka a Xo laetšexo yôna.” (Temana 7) Ka nako ye, Jošua go bonagala a e-na le dipuku tše mmalwa feela tša Beibele e ngwadilwego. * Lega go le bjalo, go fo ba le Lentšu la Modimo ga se kgonthišetšo ya katlego. E le gore a holwe ke lona, Jošua o swanetše go dira dilo tše pedi.

Sa pele, Jošua o swanetše go tlatša pelo ya gagwe ka Lentšu la Modimo. Jehofa o re: “O e akanyê mosexare le bošexo.” (Temana 8) Puku e nngwe ya ditšhupetšo e re: “Modimo o be a laela Jošua gore a gopole Molao wa Gagwe ka go ipotša wona ka go ‘o bolelela fase,’ go ‘eleletša’ ka wona, goba go ‘naganišiša’ ka wona.” Go bala le go naganišiša ka Lentšu la Modimo letšatši le letšatši go tla thuša Jošua go swaragana le ditlhohlo tšeo di letšego ka pele.

Sa bobedi, Jošua o swanetše go diriša seo a ithutago sona go tšwa Lentšung la Modimo. Jehofa o mmotša gore: “O šetše tšohle tše di ngwadilwego go yona, o dire ka tšona, gobane ke mo o tlogo letlega ditseleng tša gago.” (Temana 8, PK) Go atlega ga Jošua go kgokagane le go dira ga gagwe thato ya Modimo. Ga go tsela e nngwe. Thato ya Modimo e dula e atlega.—Jesaya 55:10, 11.

Jošua o ile a dira ka go dumelelana le keletšo ya Jehofa. Ka baka la seo, o ile a phela bophelo bjo bo tletšego le bjo bo kgotsofatšago bjalo ka morapedi yo a botegago wa Jehofa.—Jošua 23:14; 24:15.

Na o nyaka go phela bophelo bjo bo nago le morero, go swana le Jošua? Jehofa o nyaka gore o atlege. Eupša go fo ba le Lentšu la gagwe, Beibele, ga gwa lekana. Mokriste yoo a nago le nako e telele a botega o neile tšhišinyo e rego: “Tšea Beibele yeo matlakaleng a yona gomme o e tsenye ka pelong ya gago.” Ge e ba o dula o tlatša pelo ya gago ka lentšu la Modimo gomme o diriša seo o ithutago sona bophelong bja gago, gona o tla “letlega ditseleng tša gago,” go swana le Jošua.

[Mongwalo wa tlase]