Ke ka Baka La’ng Modimo a Ile a Tsoša Ntwa Malebana le Bakanana?

“Le fediše batho ka moka ka mo go feletšego: Bahethe, Baamoro, Bakanana, Bapheresi, Bahefi, le Bajebusi, bjalo ka ge MORENA a le laetše.”—DOITERONOMIO 20:17, TODAY’S ENGLISH VERSION.

“E-bang le khutšo le batho bohle.”—BAROMA 12:18.

NA O bona ditemana tšeo tša Beibele di ganetšana? Ba bantši ba thatafalelwa ke go nyalelanya taelo ya Modimo ya gore Bakanana ba fedišwe le keletšo ya Beibele ya gore batho ba phele ka khutšo. * (Jesaya 2:4; 2 Bakorinthe 13:11) Go bona, ditaelo tše di bonagala di sa kwane.

Ge e ba o be o ka boledišana le Modimo ka taba ye, o be o ka mmotšiša potšišo efe? Ela hloko dipotšišo tše hlano tše tlwaelegilego le dikarabo tša Beibele.

1. Ke ka baka la’ng Bakanana ba ile ba fedišwa? Bakanana ge e le gabotse ba be ba ipeile nageng yeo e sego ya bona. Go bjalo bjang? Nywageng e ka bago e 400 pejana, Modimo o ile a holofetša monna yo a botegago Aborahama gore naga ya kanana e be e tla ba ya ditlogolwana tša gagwe. (Genesi 15:18) Modimo o ile a phethagatša kholofetšo yeo ge a be a dira gore setšhaba sa Isiraele, seo e bego e le ditlogolwana tša Aborahama, se dule nageng yeo. Ke therešo gore ba bangwe ba ka bolela gore Bakanana ba be ba šetše ba dula moo ka gona ba be ba e-na le tshwanelo ya go dula gona. Eupša ge e le gabotse, bjalo ka Mmuši wa legohle, Modimo o na le tshwanelo e feletšego ya go bolela gore mang o tla dula kae.—Ditiro 17:26; 1 Bakorinthe 10:26.

2. Ke ka baka la’ng Modimo a se a ka a dumelela Bakanana gore ba dule gotee le Baisiraele? Modimo o neile temošo mabapi le Bakanana gore: “Ba se kê ba axa mo naxeng ya xaxo, xore ba sa tlo Xo diriša tša xo nthumola, xe O ka dirêla medimo ya bôná, ba ba morêô wo o tl’o xo Xo tanya.” (Ekisodo 23:33) Moporofeta Moše o ile a botša Isiraele ka morago gore: “Morêna Modimo wa xaxo, dithšaba tšeo ó di raka xe O fihla ka ’baka la bohlôla bya tšôna.” (Doiteronomio 9:5) Ge e le gabotse ditšhaba tšeo e be e le tše kgopo gakaaka’ng?

Boitshwaro bjo bo gobogilego, borapedi bja boheitene le go dira dihlabelo ka bana di be di atile kua Kanana. Radihistori wa Beibele Henry H. Halley o bolela gore baepi ba marope bao ba epollago lefelong leo “ba hweditše merufsi e mentši e e-na le ditho tše šaletšego tša bana bao go bego go dirilwe dihlabelo ka bona go Baali [modingwana yo mogolo wa Bakanana].” O oketša ka gore: “Lefelo leo ka moka le be le bonagala e le mabitla a masea a sa tšwago go belegwa. . . . Bakanana ba be ba rapela ka go dira boitshwaro bjo bo gobogilego bja dikopano tša botona le botshadi, e le karolo ya tirelo ya bodumedi, pele  ga medimo ya bona; ke moka ba be ba bolaya bana ba bona ba maitšibulo gomme ba direla medimo yona ye dihlabelo ka bona. Go bonala eka ka tekanyo e kgolo, naga ya Kanana e be e fetogile e swanago le Sodoma le Gomora tekanyong ya setšhaba. . . . Baepi ba marope bao ba epago marope a metse ya Kanana ba makatšwa ke ge Modimo a sa ka a e fediša kapejana go feta ka mo a dirilego ka gona.”

3. Na go be go se na batho ba bangwe ba kgopo lefaseng ka nako yeo? Ke ka baka la’ng go ile gwa kgethwa Bakanana feela? Modimo o ile a fediša badiradibe mabakeng a mantši. Ge “lefase [le be] lè tletše tša sehloxo” mehleng ya Noa, Modimo o ile a dira gore go be le meetsefula ao a ilego a fediša malapa a mantši gomme gwa phologa lapa le tee feela—lapa la Noa. (Genesi 6:11; 2 Petro 2:5) Modimo o ile a fediša metse ya Sodoma le Gomora ge sebe sa badudi ba yona se be se “befile ka kudu.” (Genesi 18:20; 2 Petro 2:6) Le gona o ile a tsebatša kahlolo malebana le motse-mošate wa Asiria e lego Ninife, “motse wa madi,” gaešita le ge a ile a se fediše motse woo ge badudi ba wona ba be ba itshola ditseleng tša bona tše mpe. (Nahume 3:1; Jona 1:1, 2; 3:2, 5-10) Ge e le Bakanana, Modimo o ba fedišitše e le ge a phološa Isiraele, setšhaba seo se bego se tlo feleletša se tšweleditše Mesia.—Psalme 132:11, 12.

4. Na phedišo ya Bakanana e be e sa thulane le lerato la Modimo? Ge o e-kga taba ka godimo, go fediša ga Modimo Bakanana go ka bonagala go sa dumelelane le lerato la gagwe. (1 Johane 4:8) Lega go le bjalo, lerato leo le bonagala kudu ge re hlahloba boemo ka kelohloko.

Modimo o tsebile e sa le pele gore badudi ba Kanana ba be ba swere tsela e fošagetšego. Lega go le bjalo, go e na le gore a ba fediše le semeetseng, ka go se fele pelo o ile a dumelela nywaga e 400 e feta go fihlela molato wa bona o “tlala.”—Genesi 15:16.

Ge sebe sa Bakanana se be se fihlile bokgoleng bjo e lego gore ba ka se sa fetoga, Jehofa o ile a ba fediša. Lega go le bjalo, ga se a ka a fediša Bakanana ka moka a sa kgethe. Ka baka la’ng? Ka gobane ba bangwe ba ile ba itshola. Bao ba bego ba ikemišeditše go fetoga, bjalo ka Rahaba le Bagibeoni, ba ile ba gaugelwa.—Jošua 9:3-11, 16-27; Baheberu 11:31.

5. Modimo yo lerato a ka fediša bjang motho le ge e le ofe? Potšišo yeo e a kwagala, ka gobane go fedišwa ga motho ga se selo seo o ka thabelago go nagana ka sona. Lega go bjalo, ruri e be e  le lerato la Modimo leo le mo šušumeleditšego go gata mogato o bjalo wa go fediša ba kgopo. Ka mohlala: Ge molwetši a e-ba le sešo sa go keka, gantši dingaka di bona bokaone e le gore go kgaolwe setho seo se nago le sešo seo. Ga se ba bantši ba ka thabelago go dira seo, eupša ngaka e botse e tseba gore go se dire bjalo—go lesa sešo se tšwela pele se keka—go kotsi le go feta. Ka ge a e-na le lerato, o gata mogato wo woo o sa kgahlišego bakeng sa go hola molwetši yoo.

Ka mo go swanago, Jehofa ga se a thabela go fediša Bakanana. O bolela ka boyena gore: “Xa ke kxahlwe ke lehu la mo-dira-dibe.” (Hesekiele 33:11) Ka nako e swanago, o be a rerile gore Isiraele e tšweletše Mesia, yoo a bego a tla bula tsela ya gore bohle ba nago le tumelo ba phologe. (Johane 3:16) Ka gona, Modimo o be a ka se dumelele Baisiraele ba šilafatšwa ke mekgwa e šišimišago ya Bakanana. Ke ka baka leo a ilego a laela gore Bakanana ba fedišwe, goba ba rakwe, nageng. Ka go dira bjalo, Modimo o bonagaditše lerato le legolo—lerato leo le ilego la mo šušumeletša go gata mogato o sa kgahlišego bakeng sa go hola barapedi ba gagwe ba botegago.

Kamoo re Holegago ka Gona

Na pego ya phedišo ya Bakanana e na le mohola go rena lehono? Ee, ka gobane Baroma 15:4 e re: “Dilo tšohle tšeo di ilego tša ngwalwa e sa le pele di ile tša ngwalelwa go re ruta, gore ka kgotlelelo ya rena le ka khomotšo e tšwago Mangwalong re be le kholofelo.” Seo se diregilego Kanana se re ruta bjang e bile se re nea kholofelo bjang?

Dipego tše di re ruta mo gontši. Ka mohlala, ka kgaugelo Modimo o ile a phološa Rahaba le Bagibeoni ge ba be ba retologela go yena ka tumelo. Di re gopotša gore yo mongwe le yo mongwe yoo a tlogago a nyaka go kgahliša Modimo a ka dira bjalo, go sa šetšwe setlogo sa gagwe goba dibe tša gagwe tša nakong e fetilego.—Ditiro 17:30.

Dipego tša phedišo ya Kanana gape di re nea kholofelo ka go bontšha e sa le pele seo Modimo a tlago go se dira kgaufsinyane. Di re kgonthišetša gore a ka se dumelele bobe bo fediša botse ka mo go feletšego. Go e na le moo, Beibele e tiišetša gore kgaufsinyane o tla fediša ba kgopo ka moka, a ba a phološetša bao ba mo ratago lefaseng le lefsa la go loka. (2 Petro 2:9; Kutollo 21:3, 4) Ka nako yeo, go tla phethagala mantšu a ao a homotšago: “Letêla Morêna, O swarê ka tsela ya xaxwe, a Xo xodišê O bê mong wa naxa; O bônê xe babe ba lôba.”—Psalme 37:34.

[Mongwalo wa tlase]

[Lepokisi go letlakala 14]

Na Beibele e Kgothaletša Batho Gore ba lwe?

Na go laela ga Modimo Baisiraele gore ba fediše Bakanana go lokafatša dintwa tša batho tša lehono? Aowa, bonyenyane ka mabaka a mararo:

▪ Ga go na setšhaba seo mo lefaseng lehono se amogelwago ke Modimo ka mo go kgethegilego. Ge Baisiraele ba be ba gana Jesu e le Mesia, ba ile ba kgaotša go emela Modimo ka tsela le ge e le efe ya semmušo—go akaretša le ka go ba baphethagatši ba dikahlolo. (Mateo 21:42, 43) Ka go rialo, Jehofa o ile a lebelela Baisiraele bjalo ka ge a lebelela ditšhaba tše dingwe. (Lefitiko 18:24-28) Ga e sa le go tloga ka nako yeo, ga go setšhaba sa lefaseng seo se nago le tshwanelo ya go ipolela gore se thekgwa ke Modimo ntweng.

▪ Jehofa ga a sa abela barapedi ba gagwe lefelo goba naga le ge e le efe. Go e na le moo, bahlanka ba gagwe ba ka hwetšwa “ditšhabeng tšohle le melokong yohle” ya lefase.—Kutollo 7:9; Ditiro 10:34, 35.

▪ Jesu o bontšhitše gabotse gore balatedi ba gagwe ba be ba ka se tsenele dintwa. Ge a be a lemoša ka tlhaselo yeo e bego e le kgaufsi le go wela Jerusalema, o ile a laela barutiwa ba gagwe gore ba se ke ba lwa, go e na le moo, o ile a re ba tšhabe, e lego seo ba ilego ba se dira. (Mateo 24:15, 16) Go e na le go tšea dibetša, Bakriste ba therešo ba bota Mmušo wa Modimo ka mo go feletšego, woo kgaufsinyane o tlago go fediša bokgopo ka moka lefaseng.—Daniele 2:44; Johane 18:36.

[Seswantšho go letlakala 15]

Mohlala wa Rahaba o bontšha gore motho le ge e le ofe yoo a tlogago a nyaka go kgahla Modimo a ka dira bjalo