Bophelo le Mehla ya Bakriste ba Lekgolong la Pele la Nywaga

Moo ba Bego ba Dula Gona

“Ke be ke sa lese go le . . . ruta phatlalatša le ka ntlo le ntlo.”—DITIRO 20:20.

GE O tsena ka kgoro e kgolo, kapejana o bona motse wa lekgolong la pele la nywaga. Go swana le metse e mentši, motse wo o mmotong. Godingwana go na le mokokotlo wa thaba, moo o kgonago go bona motse o lego mmotong gabotse. Go bonala dintlo tše dintši tša maemo a godimo tša mmala o mošweu, bontši bja tšona bo na le dirapa tšeo di ageleditšwego, tšeo di phadimago letšatšing. Le ke lefelo la bahumi. Go theoša le mmoto go bonala dintlo tše dintši tša go fapana ka bogolo le sebopego. Dintlo tše tša go agwa ka mafsika tša mabato a mantši tša babapatši le beng ba dipolasa ba maemo a magareng di lokologane ditseleng tšeo di adilwego ka matlapa. Botlaseng bja mmoto ka moeding wa magareng go na le mafelo a badiidi. Dintlo tše dinyenyane tše di sa kgahlišego, tšeo di agilwego bjalo ka mapokisi di pitlagane goba di kgobokane ditsejaneng tše sesane go dikologa malapa a manyenyane.

Ge o sepela ditsejaneng tše di pitlaganego, medumo le menkgo e dira gore o lemoge seo se diregago. Basadi ba apeilego, ba dira gore motse o tlale monko o rothišago mare. O kwa medumo ya diphoofolo le ya bana ge ba raloka. Banna ba šoma ka mafolofolo mabenkeleng a nago le lešata le menkgo.

Malapeng a Bakriste, bophelo bo ithekgile dintlong tše. Ke motheo wa bophelo bja ka mehla, thuto ya dilo tša moya le borapedi.

Dintlo tše Dinyenyane Go swana le dintlo tša lehono, bogolo le mohuta wa ntlo di fapana go ya ka lefelo le maemo a lapa a tša ditšhelete. Dintlo tše dinyenyane (1) e be e e-ba phapoši e tee e pitlaganego, ya lefsifsi, yeo e bego e dirišwa ke lapa ka moka e le ya bodulelo. Dintlo tše dintši tše dinyenyane di be di agilwe ka ditena tša mobu. Tše dingwe di be di agilwe ka mafsika a sa betlwago gabotse. Gantši mehuta ye ka bobedi e be e agwa motheong wa lefsika.

 Maboto a ka gare a be a pharilwe gomme mabato a adilwe ka matlapa, a nyaka go dula a lokišwa. Bonyenyane lešoba leo le bego le butšwe marulelong goba lebotong le be le dumelela muši go tšwa. Dithoto e be e le feela tšeo di nyakegago ka lapeng.

Marulelo a mobu a be a e-na le diphata, mahlaka gotee le dikota, tšeo di bego di thekgilwe ka dikokwane. Mobu o pharilwego o be o ritelwa, o dira siling yeo e bego e thibela meetse. Marulelo gantši a be a e-na le manamelelo a ka ntle.

Gaešita le meagong e bjalo e batamelanego, magae a Bakriste e be e le mafelo a kgahlišago, moo le modiidi a bego a ka gola moyeng gomme a thaba.

Maemo a Magareng Dintlo tše dikgolo tša mafsika tša mabato a mabedi (2) tša batho ba maemo a magareng di be di na le phapoši ya baeng. (Mareka 14:13-16; Ditiro 1:13, 14) Phapoši ye e kgolo ya ka lebatong la ka godimo e be e ka swarela diboka le gona e be e thuša nakong ya menyanya. (Ditiro 2:1-4) Dintlo tše gotee le tše dingwe tše dikgolo (3) tša babapatši le beng ba dipolasa di be di agwa ka ditena tša letlapa la motaga gomme di swaraganywa ka leraga la motaga. Mabato a adilwego ka matlapa le maboto a ka gare a be a ritetšwe; gomme maboto a ka ntle a be a takilwe.

Go be go dirišwa manamelelo a ka gare go ya diphapošing tša ka godimo le marulelong. Marulelo ka moka a be a ageletšwa ka lebotwana leo le bego le diretšwe go šireletša batho gore ba se we le go ba šireletša dikotsing tše dingwe. (Doiteronomio 22:8) Nakong ya phišo ya mosegare, ka tlase ga moriti wa maitirelo, marulelo e be e e-ba lefelo le lebotse leo motho a ka dulago go lona ge a ithuta, a naganišiša, a rapela, goba a khutša.—Ditiro 10:9.

Mola e le gore ditho tše di oketšegilego tša lapa di be di ka dula ka go tšona, dintlo tše tšeo di tiilego tšeo di nago le diphapoši tše dikgolo di be di e-na le sekgoba se sengwe se segolo seo se bego se ka dirišwa e le phapoši ya bodulelo, diphapoši tša ka thoko tša go robala, le khitšhi e kgolwanyane gotee le lefelo la go jela.

Dintlo tša Maemo a Godimo Dintlo tšeo di agilwego ka mokgwa wa Seroma (4) di be di fapana kudu go ya ka bogolo, polane le tsela yeo di agwago ka yona. Diphapoši tše dikgolo di be di dikologile phapoši ya go jela, e lego moo mediro e mentši ya lapa e bego e dirwa gona. Meago e mengwe e be e e-na le mabato a mabedi goba a mararo (5) goba e be e kgabišitšwe ka dirapa tšeo di ageleditšwego.

Dintlo tša maemo a godimo di ka be di be di e-na le fenitšhara e botse, e nngwe ya yona e kgabišitšwe ka lenaka la tlou le gauta. Magae a a be a e-na le dilo tše di nolofatšago bophelo tše bjalo ka  tshepedišo ya meetse le dipafo. Mabato a ka ba a be a dirilwe ka lepolanka goba mmabole wa mebalabala gomme maboto a ka be a be a adilwe dikota tša morokwana. Mpaola goba dibešo tša matsaka di be di dirišwa bakeng sa go ruthetša. Lefao, gantši leo le dirilwego ka dikota, le be le tsenywa mafasetereng bakeng sa tša tšhireletšo gomme gape go e-na le digareteine tšeo di bego di dira gore batho ba se ke ba bonala ge ba le ka ntlong. Madulo a lefasetereng a be a le mabotong a makoto ao a bego a segilwe a mafsika.—Ditiro 20:9, 10.

Go sa šetšwe gore ntlo ya bona e be e le e kaakang goba ya sebopego sefe, Bakriste ba lekgolong la pele la nywaga ba be ba amogela baeng e bile ba nea ka seatla se se bulegilego. Ka baka leo, balebeledi ba basepedi ba be ba sa thatafalelwe ke go hwetša lapa le borutho leo le amogelago baeng leo ba ka dulago le lona go fihla ge ba fetša bodiredi bja bona motseng goba motsaneng woo.—Mateo 10:11; Ditiro 16:14, 15.

“Legaeng la Simone le Andrea” Jesu o ile a amogelwa ka borutho “legaeng la Simone le Andrea.” (Mareka 1:29-31) Ntlo ya banna ba e ka ba e be e le ya tše dingwe tšeo di bego di kgobokane (6) di dikologile lapa leo le adilwego ka matlapa.

Dintlong tše bjalo, mejako le mafasetere a be a lebane le lapa, leo gantši e bego e le moo mediro ya letšatši le letšatši e bego e direlwa gona, go akaretša go apea, go paka, go šila le go hlamula le go ja.

Dintlo tša lebato le tee tša Kaperenaume di be di agilwe ka lefsika leo le sego la betlwa la basalt (lefsika la thabamollo). Manamelelo a ka ntle a be a fihla marulelong ao a dirilwego ka letsopa le le pharilwego goba ka thaele yeo e bego e beilwe godimo ga mahlaka le dikapa tšeo di bego di dutše godimo ga dikokwane. (Mareka 2:1-5) Mabato a ka gare a be a adilwe ka matlapa, gantši a khupeditšwe ka mebete e logilwego.

Nywako yeo e lokologanego e be e dira gore go be le ditarata le ditsejana go bapa le lebopo la Lewatle la Galilea. Kaperenaume e be e le lefelo le lekaone leo batho bao ba bego ba iphediša ka go rea le go rekiša dihlapi ba bego ba ka dula go lona.

“Ka Ntlo le Ntlo” Ka kakaretšo, nywako ya Bakriste ba lekgolong la pele la nywaga e be e sa swane—go tloga go nywako ya phapoši e tee yeo e agilwego ka ditena tša leraga go ya go nywako e megolo ya matsaka yeo e agilwego ka mafsika.

Nywako yeo e be e se feela ya bodulo. Legae e be e le lefelo la thuto ya moya. Ka nywakong yeo, lapa le be le rapela le le gotee. Ba be ba bokana ka magaeng a itšego bakeng sa go ithuta Mangwalo le go thabela bogwera le badumedi-gotee. Seo ba bego ba ithuta sona ka magaeng a bona ba be ba se diriša gabotse ge ba be ba phetha modiro o bohlokwa-hlokwa, e lego wa go bolela le go ruta “ka ntlo le ntlo” lefaseng ka moka la Roma.—Ditiro 20:20.