Na Bahu ba ka Thuša ba Phelago?

TAMBA, lesogana la kua Afrika Bodikela, o be a le kgaufsi le go ngwala ditlhahlobo tša sekolo. * Mmagwe o ile a gapeletša gore o swanetše go thušwa ke ditho tša leloko tšeo di hwilego e le gore atlege. Kua Palermo, Sicily, baeti ba basepedi ba etela mabitla ao a lego ka tlase ga mmu, moo go bonwago ditopo tše makgolo tšeo di bolokilwego ka kelohloko. Ba bangwe ba dumela gore ditopo tše tšeo di gwamišitšwego di šireletša ba phelago. Ngwaga le ngwaga, batho ba etela Lily Dale, motse o lego ka bodikela bja New York State, U.S.A., woo o tsebjago kudu ka mehuta e fapa-fapanego ya dinoge tšeo di dulago moo. Baeng ba tla ba holofela gore ba ka boledišana le meloko ya bona le bagwera ba hwilego le gore ba ka ba thuša.

Go dikologa lefase, go sa na le tumelo ya gore bahu ba ka thuša ba phelago. O nagana’ng? Mohlomongwe o rutilwe tumelo yeo goba o tlwaelane le batho ba bangwe bao ba tšeelago tumelo yeo godimo. Ke ga tlhago go hlologela baratiwa ba rena bao ba hwilego. Dinoge di holofetša go re kopanya le bona. Senoge se sengwe se ile sa tsopolwa ka makasineng wa Time se bolela gore lefelo la moya “le dula le hwetšagala ge go nyakwa thušo go lona.” Na seo ke therešo? Na bahu ruri ba ka thuša ba phelago? Karabo ya Beibele e lebanyago e ka go makatša.

Na Bahu ba Phela Lefelong le Lengwe

Beibele e hlalosa boemo bja bahu ka tsela e bonolo le e kwešišegago. Hlokomela seo Mmoledi 9:5 e se hlalosago ge e re: “Ba ba phelaxo ba tseba xore ba tlo hwa; ’me xo bahu xa xo se se tsebyaxo.” Na go a kgonega gore bahu ba be le maikwelo? Temana 6 e araba ka gore: “Leratô la bôná, lehlôyô la bôná, lehufa la bôná, di fedile kxalê; xa ba sa na kabêlô neng le neng ya se se kaxo dirwa fá tlase xa letšatši.” Hlokomela gape gore temana 10 ya yona kgaolo yeo e bolela gore “kwa bo-dula-bahu mo O yaxo xôna, xa xo na modirô, xa xo na kxopolô, xa xo tsebô le bohlale.” Lentšu la Seheberu leo le fetolelwago e le “bo-dula-bahu” leo le dirišitšwego mo le ra gore “lebitla le le tlwaelegilego la batho.” Ka mo go kgahlišago, lentšu la Segerika leo le swanago le lona, “Hadese,” le dirišwa ka Mangwalong go bontšha moo Jesu Kriste a ilego a ba gona ka nakwana ka morago ga lehu la gagwe.—Ditiro 2:31.

Jesu o ile a thuša batho ba bantši ge a be a sa phela, eupša o be a tseba gore o be a swanetše go hwa. Na o be a letetše gore o tla kgona go thuša batho nakong ya ge a le ka lebitleng? Aowa. O ile a bapiša lehu la gagwe leo le tlago le nako ya bošego yeo go sa dirwego mošomo. (Johane 9:4) Jesu o be a tseba gabotse gore ge batho ba kgaotša go phela, e ba “ba se nago matla ka ge ba hwile.”—Jesaya 26:14, NW.

Jesu le gona o ile a diriša papišo yeo e bego e bolela ntlha e swanago mabapi le lehu. Ge mogwera wa gagwe Latsaro a be a hwile, Jesu o ile a swantšha lehu le boroko. (Johane 11:11-13) Na re ka letela gore motho yo a robetšego a re thuše? Motho yo a robetšego ga a bone selo, a ka se kgone go direla motho selo a robetše.

Na Moya o Phologa Lehu?

Batho ba bantši ba rutilwe gore moya ke selo se lego ka gare ga motho seo se tšwago ge motho a e-hwa. Beibele e ruta se se fapanego. Puku ya mathomo ya Beibele, ya Genesi, e re botša gore moya ke eng. Genesi 2:7 e bolela gore ge motho wa mathomo a be a bopša o ile “a ba môya o  phelaxo.” Motho ka boyena ke moya, diphoofolo le tšona ke meoya. (Genesi 1:20-25) Ka gona, ka mo go kwagalago, ge motho goba phoofolo e e-hwa, moya o a hwa. Beibele e kgonthišetša se.—Hesekiele 18:4, PK.

Lega go le bjalo, ba bangwe ba ka botšiša gore, ‘Go thwe’ng ka dikanegelo tše dintši tša gore batho ba ikgokaganya le bahu, ba kwa mantšu a bona goba gaešita le go ba bona?’ Dipego tše bjalo di tlwaelegile dikarolong tše dintši tša lefase. Di nea ba leloko ba hwetšwego goba bagwera ba kgaufsi kholofelo, di dira gore ba bantši ba nyake dinoge tšeo di bolelago gore di kgona go ikgokaganya le bahu.

Na dikanegelo tše bjalo ke therešo? Ge e ba go le bjalo, na di tla be di sa thulane le dintlha tše di lego ka mo godimo tšeo di theilwego Beibeleng? Kriste Jesu o hlalositše gore Lentšu la Modimo ke therešo. (Johane 17:17) Therešo ga e ikganetše. Ge e le gabotse, go na le tlhahlo e kwagalago gabotse e tšwago Beibeleng yeo e bontšhago kamoo re swanetšego go lebelela dipolelo tša gore bahu ba ka thuša ba phelago. Beibele e re botša ka motho yo mongwe yo a ilego a leka go nyaka thušo go bahu. Go bala pego yeo ka kelohloko go tla utolla therešo.

Kgoši e Kgopela Thušo go Bahu

Tiragalo ye e diragetše ntweng ka leboa la Isiraele. Kgoši Saulo le madira a gagwe ba be ba hlasetšwe ke madira a boifišago a Bafilisita. Ge Saulo a be a bona kampa ya Bafilisita, “pelo ya xaxwe ya thšoxa xa-xolo.” Nakong ye ya bogoši bja gagwe, Saulo o be a hlanogetše borapedi bja therešo. Ka baka leo, Jehofa ga se a ka a theetša dikgopelo tša gagwe. Saulo o be a tla kgopela thušo go mang? Moporofeta wa Modimo Samuele o be a hwile.—1 Samuele 28:3, 5, 6.

Saulo o ile a ya go nyaka thušo go senoge sa Endoro. O ile a lopa senoge seo gore se mo ‘tsošetše Samuele’ bahung. Senoge se ile sa bitša seriti. Seriti seo go bego go thwe ke Samuele se ile sa botša Saulo gore Bafilisita ba tla fenya le gore Saulo le barwa ba gagwe ba be ba tla hwa ntweng. (1 Samuele 28:7-19) Na ruri seriti seo e be e le Samuele yo a tsošitšwego bahung?

Anke o nagane ka taba ye. Beibele e bolela gore ge motho a e-hwa “ó boêla mmung wa xaxwe” le gore “ké mo xo fêlaxo maanô a” gagwe. (Psalme 146:4) Bobedi Saulo le Samuele ba be ba tseba gore Modimo ga a nyake gore batho ba botšiše dinoge. Le gona, Saulo pejana o be a ile a etelela pele go fedišwa ga mekgwa ya go dirišana le meoya nageng!—Lefitiko 19:31.

Naganišiša ka taba ye. Ge e le gore Samuele yo a botegago o be a sa phela e le moya, na o be a ka tshela molao wa Modimo gomme a dirišana le senoge e le gore a ikopanye le Saulo? Jehofa o be a ganne go bolela le Saulo. Na ge e le gabotse, senoge se be se ka gapeletša Modimo Ramatla-ohle go bolela le Saulo a diriša Samuele yo a hwilego? Aowa. Go molaleng gore seriti seo go bego go thwe ke Samuele e be e se moporofeta yo a botegago wa Modimo. E be e le seriti—motemona yo kgopo yo a bego a itira Samuele.

Batemona ke barongwa bao ba ilego ba rabela kgahlanong le taolo ya Modimo mathomong a histori ya batho. (Genesi 6:1-4; Juda 6) Batemona ba ka lebelela batho ge ba sa phela; ba tseba ka mo yo mongwe le yo mongwe a bolelago ka gona, a bonagalago ka gona le kamoo a dirago dilo ka gona. Ba ikemišeditše go godiša kgopolo  ya gore Beibele ga e bolele therešo. Ga go makatše ge Beibele e lemoša kgahlanong le go ikgokaganya le madira a bjalo a moya! (Doiteronomio 18:10-12) Meoya ye e kgopo e sa dutše e šoma le lehono.

Ga bjale re ka bona gore ke ka baka la eng ba bangwe ba bolela gore ba kwele goba ba bone batho bao ba hwilego. Gaešita le ge diriti tše bjalo ka dinako tše dingwe di bonala di e-na le bogwera, madira a kgopo a moya a ikemišeditše go fora batho. * (Baefeso 6:12) Le gona, nagana ka se: Jehofa ke Modimo yo lerato yo a tshwenyegago ka rena. Ge e ba bahu ba be ba phela tikologong e nngwe gomme ba kgona go thuša bagwera le malapa a bona, na Mmopi yo lerato o be a ka ganetša kgokagano e bjalo gomme a re ke “makxapa”? Ga go bjalo le gatee! (1 Petro 5:7) Ka gona, na go na le mothopo o ka botwago wa thušo?

Thušo ya Kgonthe Bakeng sa ba Phelago le Bahu

Re kwešiša go tšwa tabeng ye re sa tšwago go e ahla-ahla gore bahu ga ba na matla a go thuša ba phelago. Go oketša moo, boiteko bja go tsoma thušo go bahu bo tloga bo sa atlege; bo kotsi kudu, ka ge bo thulana le molao wa Modimo gomme bo re bea kotsing ya go tutuetšwa ke batemona.

Beibele e re lebiša Mothopong o mokaone wa thušo—Mmopi wa rena, Jehofa. A ka re phološa le lehung. (Psalme 33:19, 20) Lehono, o a hwetšagala bakeng sa go re thuša. Go fapana le dikholofetšo tša maaka tša dinoge, yena o re nea kholofelo ya kgonthe.

Tamba, yo go boletšwego ka yena pejana, o ile a bona ka boyena phapano magareng ga dikholofetšo tša maaka tšeo di dirwago ke dinoge le therešo yeo Jehofa a re botšago yona. Dinoge di mmoditše gore ge e ba a sa hlabele bagologolo ba gagwe ba hwilego, a ka se tšwelele ditlhahlobong tša gagwe. Tamba o be a thomile go ithuta Beibele le Dihlatse tša Jehofa. O be a ithutile ka boemo bja kgonthe bja bahu le ka mothopo o mobe wa bao ba itirago bagologolo ba hwilego. Go sa šetšwe gore mmagwe o be a mo gapeletša gore a nyake thušo ya dinoge, Tamba o ile a gana, a mmotša gore, “Ge e ba ke sa tšwelele, ke tla leka ka matla ngwageng o tlago.”

Mafelelo e bile afe? O tšwile maemong a pele ditlhahlobong! Mmagwe o ile a makala, a se sa kgolwa dinoge gomme a se sa bolela ka dihlabelo tša mohuta woo gape. Tamba o ithutile gore Jehofa o re lemoša gore re efoge go ‘botšiša bahu ditaba tša ba phelago.’ (Jesaya 8:19) Thuto ya Beibele e neile Tamba kgodišego ya gore ge e ba a thabela molao wa Modimo, o be a tla atlega.—Psalme 1:1-3.

Lega go le bjalo, go thwe’ng ka baratiwa ba rena ba hwilego? Na ga go na kholofelo ka bona? Go tlaleletša go thušeng rena bao ba phelago, Jehofa o holofeditše go thuša bao ba lego ka mabitleng. Ka morago ga go hlalosa kamoo bahu ba se nago matla ka gona, hlokomela seo moporofeta Jesaya a se tsebišitšego go kgaolo 26, temana 19: “Bahu ba xaxo ba tlo phela, . . . Phafoxang! Hlalalang! Ba Le robetšexo leroleng.” Boporofeta bo tšwela pele go bolela gore “ba se nago matla ka ge ba hwile” ba tla phela gape.

Nagana ka seo! Batho ba dimilione tše dikete bao ba robetšego mabitleng ba tla tsošetšwa bophelong! Ge e le gabotse, Beibele e utolla gore Jehofa o “hloloxetšwe” go phediša bahu. (Jobo 14:14, 15) Na dikholofetšo tše di kwagala di ka se kgonagale? Jesu Kriste o be a kgodišegile ka kholofelo ye moo a ilego a hlalosa bahu e le ba šetšego ba phela mahlong a Jehofa.—Luka 20:37, 38.

Na o ka rata gore le wena o be le kholofelo ye? * Tšwela pele o hwetša tsebo e nepagetšego e hwetšwago ka Beibeleng. Ge o dutše o ithuta, o tla kgodišega gore Jehofa a ka thuša ba phelago le bahu le gore dikholofetšo tša gagwe di a ‘botega e bile ke tša therešo.’—Kutollo 21:4, 5.

[Mengwalo ya tlase]

[Ntlhakgolo go letlakala 19]

Ke ga tlhago go hlologela baratiwa ba rena ba hwilego

[Seswantšho go letlakala 20]

Na moporofeta Samuele o ile a tsoga bahung gomme a bolela le Kgoši Saulo?