Ekišang Tumelo ya Bona

O be a Botega ge a Lebane le Diteko

PETRO a tshwenyegile o ile a lebelela difahlego tša batheetši ba Jesu. Ba be ba le ka sinagogeng kua Kaperenaume. Legae la Petro le be le le motseng wo; kgwebo ya gagwe ya go rea dihlapi e be e le gona mo, lebopong la Lewatle la Galilea; ba bantši ba bagwera ba gagwe, ba leloko le bagwebišani ba gagwe ba be ba dula gona mo. Ga go pelaelo gore Petro o be a fagahletše gore batho ba motseng wa gabo ba bone Jesu ka tsela yeo yena a bego a mmona ka yona, gore le bona ba thabele go ithuta ka Mmušo wa Modimo go morutiši yo mogolo go feta barutiši ka moka. Ga go bonagale go be go tla ba le karabelo e bjalo lehono.

Ba bantši ba ile ba kgaotša go theetša. Ba bangwe ba be ba kwala ba ngongorega, ba ganetša seo Jesu a bego a se bolela. Lega go le bjalo, seo se bego se tshwenya Petro kudu e be e le karabelo ya ba bangwe ba barutiwa ba Jesu. Difahlego tša bona di be di se sa bontšha lethabo lela la go bakwa ke go hwetša tshedimošo, bose bja go hwetša taba e mpsha le lethabo la go ithuta therešo. Bjale, ba be ba bonagala ba nyamile e bile ba se bose. Ba bangwe ba ile ba bolela ba re polelo ya Jesu e a tšhoša. Ka ge ba se sa nyaka go theetša, ba ile ba tloga sinagogeng—ba ba ba tlogela go latela Jesu.

Yeo e be e le nako e thata go Petro le baapostola-gotee le yena. Petro o be a se a kwešiša ka mo go feletšego seo Jesu a bego a se bolela letšatšing leo. Ga go pelaelo gore o be a lemoga gore ge mantšu a Jesu a se a hlaloswa a be a ka bonagala a kgopiša. Lega go le bjalo, Petro o be a tla dira’ng? E be e se la mathomo potego ya gagwe go Mong wa gagwe e lekwa, le gona e be e se la mafelelo. A re boneng kamoo tumelo ya Petro e ilego ya mo thuša go lebeletšana ka katlego le ditlhohlo tšeo gotee le go dula a botega.

O Ile a Botega ge ba Bangwe ba sa Botege

Petro gantši o be a makatšwa ke Jesu. Gantši, Mong wa gagwe o be a dira dilo le go bolela ka tsela e fapanego le yeo batho ba bego ba e letetše. Letšatši pele ga moo, Jesu o be a ile a fepa lešaba la ba dikete ka mohlolo. Ge ba arabela go seo, ba ile ba leka go mo dira kgoši. Lega go le bjalo, o ile a makatša ba bantši ka go gana le go kgothaletša barutiwa ba gagwe gore ba namele lesela-watle gomme ba sesele thoko tša Kaperenaume. Ge barutiwa ba gagwe ba le gare ba sesa meetseng bošego, Jesu o ile a ba makatša gape ka go sepela godimo ga meetse a Lewatle la Galilea leo le bego le galefile, le go ruta Petro thuto e bohlokwa mabapi le tumelo. *

Mesong, go se go ye kae ba ile ba lemoga gore mašaba ao a be a ba latela ka go dikologa letsha. Lega go le bjalo, go molaleng gore batho ba be ba šušumetšwa ke kganyogo ya go bona Jesu a tšweletša dijo ka mohlolo gape, e sego ke tlala le ge e le efe ya ditherešo tša moya. Jesu o ile a ba kgalemela  ka baka la moya wa bona wa go rata dilo tše di bonagalago. Polelo yeo e ile ya tšwela pele sinagogeng kua Kaperenaume, moo Jesu a ilego a makatša batho gape ka maiteko a go ruta therešo e bohlokwa eupša e le e thata.

Jesu o be a nyaka gore batho bao ba mmone, e se mothopo wa dijo tša nama, eupša e le tokišetšo ya moya e tšwago go Modimo, e le yoo bophelo bja gagwe le lehu la gagwe e le motho di bego di tla dira gore ba bangwe ba kgone go hwetša bophelo bjo bo sa felego. Ka gona o ile a dira papišo, a ipapetša le manna, senkgwa seo se theogilego se e-tšwa legodimong mehleng ya Moše. Ge ba bangwe ba be ba mo ganetša, o ile a diriša papišo e kwagalago, a hlalosa gore go be go nyakega gore ba je nama ya gagwe le go nwa madi a gagwe e le gore ba hwetše bophelo. Ke nakong ye moo dikganetšo di ilego tša ba matla. Ba bangwe ba ile ba re: “Polelo ye e a tšhoša; ke mang yo a ka e theetšago?” Ba bantši ba barutiwa ba Jesu ba ile ba dira phetho ya go kgaotša go mo latela. *—Johane 6:48-60, 66.

Petro o be a tla dira’ng? Le yena o swanetše go ba a ile a gakantšhwa ke mantšu a Jesu. O be a se a hlwa a kwešiša gore Jesu o be a swanetše go hwa e le gore a phethe thato ya Modimo. Lega go le bjalo, na Petro o ile a lekega go kgaotša go latela Jesu letšatšing leo go swana le barutiwa bao ba go teka-teka? Aowa; selo se sengwe se bohlokwa se ile sa dira gore Petro a fapane le batho bao. Selo seo e be e le eng?

Jesu o ile a retologela go baapostola ba gagwe gomme a re: “Na le lena le nyaka go sepela?” (Johane 6:67) O boletše le ba 12, eupša ke Petro yoo a ilego a bolela. Ke yena gantši a bego a bolela. Petro a ka ba a be a ba feta ka moka ka bogolo. Go sa šetšwe gore taba ke efe, ruri e be e le motho yo a ipolelelago moo sehlopheng; go bonagala e le ka sewelo moo Petro a bego a dika-dika go bolela seo se bego se le monaganong wa gagwe. Boemong bjo, seo se bego se le monaganong wa gagwe e be e le mantšu a a mabotse le a gopolegago: “Morena, re tla ya go mang? O na le mantšu a bophelo bjo bo sa felego.”—Johane 6:68.

Na mantšu ao ga a kgome pelo ya gago? Tumelo ya Petro go Jesu e ile ya mo thuša go aga seka se bohlokwa kudu—potego. Petro o ile a bona gabotse gore go be go se na Mophološi yo mongwe ge e se Jesu le gore Jesu o be a phološa ka mantšu a gagwe—dithuto tša gagwe mabapi le Mmušo wa Modimo. Petro o be a tseba gore gaešita le ge e ba go be go e-na le dilo tšeo di mo makatšago, go be go se na moo a ka yago gona ge e ba a be a nyaka go amogelwa ke Modimo le go šegofatšwa ke yena ka bophelo bjo bo sa felego.

Na o ikwa ka tsela yeo? Ka manyami, ba bantši lefaseng la lehono ba bolela gore ba rata Jesu eupša ba palelwa ke go fenya teko ya potego. Potego ya kgonthe go Kriste e nyaka gore re be le pono ya Petro ka dithuto tša Jesu. Re swanetše go ithuta tšona, re kwešiše seo di se bolelago le go phela ka tšona—gaešita le ge di re makatša ka go se dumelelane le ditebelelo tša rena goba thato ya rena. Ke feela ka go dula re botega moo re ka holofelago go hwetša bophelo bjo bo sa felego bjoo Jesu a nyakago gore re be le bjona.

O Ile a Botega ge a Phošollwa

Go se go ye kae ka morago ga nako yeo ya leema-ema, Jesu o ile a eta pele baapostola ba gagwe  le barutiwa ba bangwe ba gagwe leetong le letelele la go ya ka thoko ya leboa. Ntlha e pipilwego ke lehlwa ya Thaba ya Heremone, yeo e lego godimo kgaufsi le mollwane wa ka leboa wa Naga ya Kholofetšo, ka dinako tše dingwe e be e bonagala gaešita le ge o le ka meetseng a matala-lerata a Lewatle la Galilea. Ganyenyane-ganyenyane, thaba yeo e be e bonagala gabotse ge sehlopha se be se batamela, se rotogela metsaneng ya kgaufsi le Kesarea Filipi. * Boemong bjo bjoo bo kgahlišago, a naganne kudu ka bogolo bja Naga ya Kholofetšo go ya ka borwa, Jesu o ile a botšiša balatedi ba gagwe potšišo e bohlokwa.

O ile a botšiša gore, “Mašaba a re ke nna mang?” Re ka akanya ka Petro a lebeletše mahlo a Jesu ao a bontšhago go nyaka go tseba, a lemoga botho bja Mong wa gagwe le bohlale bja gagwe bjo bogolo le bjo bo bonagalago. Jesu o be a kgahlegela diphetho tšeo batheetši ba gagwe ba bego ba di fihlelela ka seo ba bego ba se bona le go se kwa. Barutiwa ba Jesu ba ile ba araba potšišo yeo, ba bolela tše dingwe tša dikgopolo tše fošagetšego tša mabapi le yoo Jesu e lego yena. Eupša Jesu o be a nyaka go tseba se sengwe gape. Na balatedi ba gagwe ba kgaufsi ba be ba dira diphošo tše swanago? O ile a botšiša gore: “Eupša lena le re ke nna mang?”—Luka 9:18-22.

Mo le gona Petro o ile a akgofela go araba. Ka mantšu a kwagalago le ka sebete o ile a bolela phetho yeo ba bantši moo ba bego ba e dirile ka dipelong tša bona. O itše: “Ke wena Kriste, Morwa wa Modimo yo a phelago.” Re ka akanya ka Jesu a bontšha Petro gore o a mo amogela ka go myemyela ge a mo reta ka borutho. Jesu o ile a gopotša Petro gore e be e le Jehofa Modimo—e sego motho—yoo a bego a dirile gore therešo ye e bohlokwa e be molaleng go bao ba nago le tumelo ya kgonthe. Petro o be a kgontšhitšwe go lemoga e nngwe ya ditherešo tše kgolo tšeo Jehofa a ilego a di utolla—go tseba Mesia, goba Kriste, yo e lego kgale a holofeditšwe!—Mateo 16:16, 17.

Kriste yo ke yena yoo boporofeta bja bogologolo bo mmitšago lefsika leo baagi ba tlago go le gana. (Psalme 118:22; Luka 20:17) A naganne ka diporofeto tše bjalo, Jesu o utolla gore Jehofa o be a tlo hloma phuthego lefsikeng leo Petro a sa tšwago go le lemoga. * Ke moka o ile a fa Petro tše dingwe tša ditokelo tše bohlokwa kudu ka phuthegong. Ga se a ka a dira gore Petro a phagamele baapostola ba bangwe, bjalo ka ge ba bangwe ba ile ba nagana bjalo, eupša o ile a mo fa maikarabelo. O file Petro “dinotlelo tša mmušo.” (Mateo 16:19) E be e tla ba modiro wa Petro go bula kholofelo ya go tsena Mmušong wa Modimo go ditšhemo tše tharo tše fapa-fapanego tša batho—sa pele go Bajuda, ke moka go Basamaria gomme mafelelong go Bantle, goba bao e sego Bajuda.

Lega go le bjalo, Jesu ka morago o boletše gore bao ba filwego maikarabelo a magolo go letetšwe mo gogolo go bona gomme therešo ya mantšu ao  e bonwa boemong bja Petro. (Luka 12:48) Jesu o ile a tšwela pele a utolla ditherešo tše bohlokwa ka Mesia, go akaretša le kgonthišetšo ya gore o be a le kgaufsi le go tlaišwa gotee le go bolawa Jerusalema. Petro o ile a tshwenywa ke go kwa dilo tše bjalo. O ile a tšea Jesu a ya le yena ka thoko gomme a mo kgalema, a re, “Ikwele bohloko Morena; O ka se feleletše ka tsela ye le gatee.”—Mateo 16:21, 22.

Petro ka ntle le pelaelo o be a e-na le maikemišetšo a mabotse, ka go rialo karabo ya Jesu e swanetše go ba e ile ya mo makatša. O ile a furalela Petro, a lebelela barutiwa ba bangwe ka moka—bao le bona ba ka bago ba be ba nagana ka tsela e swanago—gomme a re: “Gomela nthago ga-ka, sathane, o kgopišo go nna, gobane ga o gopole tša Modimo, o gopola tša batho.” (Mateo 16:23, PK; Mareka 8:32, 33) Mantšu a Jesu a hupere keletšo e šomago go rena ka moka. Go bonolo kudu go dumelela dikgopolo tša batho di eta tša Modimo pele. Ge e ba re dira bjalo, gaešita le ge re ikemišeditše go thuša, re ka fetoga didirišwa tša go phetha morero wa Sathane re sa lemoge, e sego wa Modimo. Lega go le bjalo, Petro o ile a arabela bjang?

Ka ntle le pelaelo o be a tseba gore Jesu o be a sa re gore ke Sathane Diabolo e le ka kgonthe. Godimo ga moo, Jesu ga se a bolela le Petro go swana le ge a be a bolela le Sathane. Jesu o be a ile a botša Sathane a re: “Tloga”; o boditše Petro gore: “Gomela nthago ga-ka.” (Mateo 4:10) Jesu ga se a ka a raka moapostola yo yoo a ilego a bona botse bjo bogolo go yena, eupša O ile a fo phošolla kgopolo ya gagwe tabeng ye. Ga go thata go lemoga gore Petro o be a swanetše go tlogela go ba pele ga Mong wa gagwe bjalo ka tšhitišo gomme a ye ka morago ga gagwe bjalo ka molatedi wa gagwe yo a mo thekgago.

Na Petro o ile a ba le manganga, a befelwa goba a ngala? Aowa; o ile a amogela phošollo ka boikokobetšo. Ka go rialo o ile a bonagatša potego gape. Bohle bao ba latelago Kriste ba tla fela ba nyaka phošollo. Ke feela ge re amogela tayo ka boikokobetšo le go ithuta go yona moo re ka tšwelago pele re batamela Jesu Kriste kudu le Tatagwe, Jehofa Modimo.—Diema 4:13.

Potego e a Putswa

Go se go ye kae Jesu o ile a bolela mantšu a mangwe gape a makatšago: “Ruri ke le botša gore go na le ba bangwe ba bao ba emego mo ba ba ka se kego ba kwa lehu le gatee go ba go fihla pele ba bona Morwa wa motho a e-tla ka mmušo wa gagwe.” (Mateo 16:28) Ga go pelaelo gore mantšu ao a ile a dira gore Petro a nyake go tseba. Jesu a ka ba a e-ra gore’ng? Mohlomongwe Petro a ka ba a ile a ipotšiša ge e ba phošollo e matla yeo a bego a sa tšwa go e hwetša e be e e-ra gore o be a ka se sa hwetša ditokelo tše bjalo tše kgethegilego.

Lega go le bjalo, moo e ka bago ka morago ga beke, Jesu o ile a tšea Jakobo, Johane le Petro a ya le bona “thabeng e telele”—mohlomongwe Thabeng ya Heremone, yeo e bego e le bokgoleng bja dikhilomithara tše sego kae feela. Go bonagala e be e le bošego, ka ge banna bao ba bararo ba be ba lwantšhana le boroko. Eupša ge Jesu a be a rapela, go ile gwa direga selo se sengwe seo se ilego sa ba amoga boroko.—Mateo 17:1; Luka 9:28, 29, 32.

Jesu o ile a thoma go fetoga ba mo lebeletše. Sefahlego sa gagwe se ile sa thoma go phadima go ba go fihlela a phadima bjalo ka letšatši. Diaparo tša gagwe le tšona di ile tša ba tše tšhweu wa go phadima. Ke moka go ile gwa bonwa batho ba babedi ba e-na le Jesu, yo mongwe a swantšhetša Moše gomme yo mongwe a swantšhetša Eliya. Ba ile ba boledišana le yena mabapi le “go tloga ga gagwe mo a bego a reretšwe go go phethagatša Jerusalema”—seo go lego molaleng gore ke lehu la gagwe le tsogo ya gagwe. Ruri go be go le molaleng gore Petro o be a fošitše ge a be a gana gore Jesu o be a tlo ba le mafelelo a bjalo a bohloko!—Luka 9:30, 31.

Petro o ile a ikwa a gapeletšega gore a tšee karolo ka tsela e itšego ponong ye yeo e sa tlwaelegago. Go ile gwa bonagala eka Moše le Eliya ba tloga go Jesu. Ka gona Petro o ile a bolela a re: “Morutiši, ke mo gobotse ge re le mo, ka gona a re hlomeng ditente tše tharo, e nngwe e be ya gago, e nngwe e be ya Moše gomme e nngwe e be ya Eliya.” Ke therešo gore diswantšhetšo tše tše pedi tša pono tša bahlanka ba Jehofa ba hwilego kgale go be go sa nyakege gore di hlomelwe ditente. Petro ruri o be a sa tsebe seo a bego a se bolela. Lega go le bjalo, na ga o ikwe o gogelega go monna yo bakeng sa moya wa gagwe wa mafolofolo le o borutho?—Luka 9:33.

Yena le Jakobo le Johane ba ile ba hwetša  moputso o mongwe bošegong bjoo. Leru le ile la bopega gomme la ba aparetša ba le thabeng. Go ile gwa tšwelela lentšu go lona—lentšu la Jehofa Modimo! O itše: “Yo ke Morwa wa-ka, yena yo a kgethilwego. Le mo theetšeng.” Ke moka pono yeo e ile ya fela gomme ba ikhwetša ba e-na le Jesu feela thabeng.—Luka 9:34-36.

Ruri pono yeo e be e le mpho go Petro—le go rena! Nywaga-some ka morago o ile a ngwala mabapi le tokelo yeo a bilego le yona bošegong bjoo ya go ba yo mongwe wa “dihlatse tše di bonego ka mahlo tša bogolo bja gagwe bjo bogolo kudu,” go iponela ka boyena pontšho ya Jesu e le Kgoši e tagafaditšwego ya legodimong. Pono yeo e tiišeditše diporofeto tše dintši tša Lentšu la Modimo e bile e matlafaditše tumelo ya Petro bakeng sa diteko tšeo a bego a sa tlo lebeletšana le tšona. (2 Petro 1:16-19) E ka dira se swanago le go rena ge e ba, go swana le Petro, re dula re botegela Mong yoo Jehofa a re kgethetšego yena, ka go ithuta go yena, go amogela tayo ya gagwe le phošollo gotee le go mo latela ka boikokobetšo letšatši le letšatši.

[Mengwalo ya tlase]

[Lepokisi/​Seswantšho go letlakala 28]

 Lefsika ke Mang?

“Ke re go wena, Ke wena Petro, mo lefsikeng le ke tla aga phuthego ya-ka.” (Mateo 16:18) Mantšu a, ao Jesu a a boditšego moapostola wa gagwe Petro, gantši a ile a tšwewa e le ao a rago gore Petro e be e tla ba motheo wa phuthego ya Bokriste. Kereke ya Katholika e ruta gore Jesu o be a nea Petro maemo a fetago a baapostola ba bangwe, ge e le gabotse a mo dira mopapa wa mathomo. Ka baka leo, kua Saint Peter’s Basilica ya Roma, mantšu a Jesu a ngwadilwe ka Selatine ka gare ga moago o mogolo wa rantabola, a le ka ditlhaka tša bogolo bja go feta motho.

Na Jesu o be a e-ra gore Petro e be e le lefsika leo Jesu a bego a tlo aga phuthego ya gagwe go lona? Aowa. Ela hloko mabaka a mararo ao ka ona re ka kgodišegago ka taba ye. La pele, baapostola ba bangwe ba be ba le gona gomme ga se ba ka ba nagana gore Jesu o be a bolela seo. Ge e ba Jesu a ile mo fa maemo a phagametšego a bona ka moka pele ga bona, gona ke ka baka la’ng ka morago ba ile ba ngangišana leboelela mabapi le yoo e lego yo mogolo magareng ga bona? (Mareka 9:33-35; Luka 22:24-26) La bobedi, moapostola Paulo ka morago o ile a bontšha gore lefsika e be e se Petro, eupša e be e le Jesu Kriste. (1 Bakorinthe 3:11; 10:4) La boraro, nywaga-some ka morago Petro o ile a bontšha ka boyena gore o be a sa nagane gore e be e le yena lefsika leo. Go e na le moo, o ngwadile gore Jesu e be e le “lefsika la sekhutlo la motheo” leo e bego e le kgale go porofetilwe ka lona leo le kgethilwego ke Modimo ka boyena.—1 Petro 2:4-8.

Lega go le bjalo, ba bangwe ba gapeletša gore bjalo ka ge leina la Petro le bolela “Lefsika,” Jesu o be a e-ra gore Petro ke lefsika. Lega go le bjalo, ge e le gabotse leina la Petro ga se lehlalosetša-gotee la lentšu “lefsika” leo le dirišitšwego temaneng yona yeo. Leina la Petro le ra gore “Seripa sa Lefsika,” le gona ke leina la botona; lentšu leo le fetoletšwego e le “lefsika” ke leina la botshadi. Ka gona, mantšu a Jesu a swanetše go kwešišwa bjang? Ge e le gabotse, o be a botša Petro gore: “Wena, yoo ke go reetšego la Petro, goba Lefsika, o lemogile yoo ‘lefsika’ e lego yena, Kriste, yoo a tlago go ba motheo wa phuthego ya Bokriste.” Ruri Petro o bile le tokelo e kgolo kudu ya go thuša go utolla therešo ye e bohlokwa!

[Seswantšho go letlakala 24, 25]

Petro o ile a ipontšha a botega gaešita le ge a be a swanetše go phošollwa

[Seswantšho go letlakala 26]

Potego ya Petro e ile ya putswa ka pono e kgahlišago