Na o be o Tseba?

Ke ka baka la’ng Jesu a ile a re “ga go yo a bolokago beine e mpsha ka makukeng a kgale a beine”?

▪ Mehleng ya Beibele go be go tlwaelegile go boloka beine ka makukeng a dirilwego ka mekgopha ya diphoofolo. (Jošua 9:13) Makuka a be a dirilwe ka mekgopha e feletšego ya diruiwa tše bjalo ka diputšane le dipudi. Ge go dirwa lekuka, go be go kgaolwa hlogo le maotwana a phoofolo e hwilego gomme setoto se ntšhwa dinama le marapo ka tsela e bohlale gore se se ke sa buiwa dimpa. Ke moka mokgopa o be o šogwa gomme mašoba ka moka a be a rokwa eupša gwa tlogelwa molala goba leotwana, leo le bego le tla dirišwa e le molomo wa lekuka. Molomo o be o ka tswalelwa ka poropo goba wa tlengwa ka lerala.

Ge nako e dutše e feta, mokgopa o be o ka gwagwalala gomme wa se sa kgona go ngangega. Ka gona, makuka a kgale a be a ka se kgone go boloka beine e mpsha, yeo e tšwelago pele e bela. Go bela mo go bjalo go be go tla dira gore mokgopa o gwagwaletšego wa makuka a kgale o palege. Ka lehlakoreng le lengwe, makuka a mafsa a be a le boleta gomme a ka kgona go emela kgatelelo yeo e bakwago ke go bela ga beine e mpsha. Ka baka leo, Jesu o boletše taba e kwagalago yeo e bego e tlwaelegile mehleng ya gagwe. O ile a bolela ka seo se bego se tla direga ge e ba motho yo mongwe a be a ka tšhela beine e mpsha ka makukeng a kgale, o itše: “Beine e mpsha e tla paleša makuka a beine, gomme ya tšhologa le makuka a beine a senyega. Eupša beine e mpsha e swanetše go bolokwa ka makukeng a mafsa a beine.”—Luka 5:37, 38.

“Banna ba Mefaka” bao go boletšwego ka bona nakong ya ge Paulo a golegwa ke Baroma, ke bomang?

▪ Go ya pego ya Ditiro, nakong ya moferefere kua tempeleng ya Jerusalema, tona ya madira a Roma e ile ya golega moapostola Paulo, e nagana gore e be e le moetapele wa sehlotswana sa “banna ba mefaka ba dikete-nne” bao ba lwantšhago mmušo. (Ditiro 21:30-38) Ke’ng seo se tsebjago ka banna bao ba mefaka?

Lentšu la Segerika la “banna ba mefaka” le tšerwe lentšung la Selatine la sicarii, leo le bolelago “yo a dirišago sica,” goba mphaka. Radihistori wa lekgolong la pele la nywaga Flavius Josephus o hlalosa Sicarii e le sehlotswana sa banna ba Juda bao ba bego ba rata naga, bao e bego e le manaba a Baroma a sa ikokobetšego, bao e bego e le babolai ba dipolitiki.

Josephus o hlalosa gore banna ba ba Sicarii “ba be ba bolaya batho mosegare, le gona ka gare ga motse, gomme se ba be ba se dira gantši nakong ya menyanya, ge ba be ba le gare ga mašaba a batho, gomme ba uta mefaka ya bona ka diaparong tša bona, yeo ba bego ba e diriša go hlaba bao e bego e le manaba a bona.” Ge batho bao ba e-hwa, banna ba ba Sicarii ba be ba itira e ka ba galefišitšwe ke polao yeo e le gore batho ba se ngwege ba sa lemogwe. Josephus o tlaleletša ka gore banna ba ba Sicarii ka morago ba ile ba etelela pele ge Bajuda ba be ba rabela kgahlanong le Baroma ka 66-70 C.E. Ka gona, moetapele wa Roma o be a tla tshwenyega ka go golega motho yo go naganwago gore ke moetapele wa sehlopha seo.

[Seswantšho go letlakala 15]

Lekuka la kgale la beine

[Seswantšho go letlakala 15]

Seswantšho seo se thadilwego sa monna wa mefaka