“Yêna ó Bôna Pelo”
Batamela Kgaufsi le Modimo
“Yêna ó Bôna Pelo”
PONAGALO e ka fora. Ponagalo ya motho ya ka ntle ga se gore e utolla seo a lego sona ka gare, ka gare-gare pelong ya gagwe. Batho ba na le tshekamelo ya go ahlola ba bangwe go ya ka ponagalo ya bona. Re leboga gore Jehofa Modimo o lebelela ka kua ga ponagalo ya ka ntle. Se se utollwa mantšung a begilwego go 1 Samuele 16:1-12.
Nagana ka boemo bjo. Jehofa o kgaufsi le go tlotša kgoši e mpsha ya setšhaba sa Isiraele. Modimo o botša moporofeta Samuele gore: “Ke Xo roma xo Isai wa Betlehêma; ka xobane mo xo barwa ba xaxwe ke ikxethetše eo a tl’o xo ba kxoši.” (Temana ya 1) Jehofa ga a mmotše leina la yo e tlago go ba kgoši eupša o mmotša gore go kgethilwe yo mongwe wa barwa ba Isai. Ge Samuele a lebile Betlelehema, a ka be a ipotšiša gore, ‘Ke tla tseba bjang gore ke morwa ofe wa Isai yo a kgethilwego ke Jehofa?’
Ge Samuele a goroga Betlelehema, o rulaganya gore Isai le barwa ba gagwe ba tle go ja sedimo. Ge Eliaba, morwa yo mogolo a tsena, kapejana Samuele o kgahlwa ke sebopego sa gagwe. Samuele o nagana gore leemo la Eliaba le dira gore a swanelege go ba kgoši gomme o ipotša gore: “E a kaxo ba motlotšwa wa Morêna šó.”—Temana 6.
Lega go le bjalo, Jehofa o bona dilo ka mo go fapanego. O botša Samuele gore: “O se bônê sebopêxô sa xaxwe le botelele bya xaxwe; Nna ke mo nyaditše.” (Temana 7) Jehofa ga a kgahlwe ke leemo le bobotse bja Eliaba. Mahlo a Jehofa ao a bonago dilo tšohle a bona ka gare-gare moo botse bja kgonthe bo ka hwetšwago.
Jehofa o hlalosetša Samuele gore: “Ka xobane yo batho ba mmôxêlaxo, xa se yêna. Motho ó bôna se se lebanaxo le mahlô a xaxwe; Morêna Yêna ó bôna pelo.” (Temana 7) Ee, seo se lego bohlokwa go Jehofa ke pelo—motho wa ka gare, mothopo wa dikgopolo tša motho, tshekamelo ya monagano le maikwelo. “Mo-leka-pelo” o nyatša Eliaba—gotee le barwa ba Isai ba tshelelago bao ba ilego ba tla pele ga Samuele.—Diema 17:3.
Isai o na le morwa yo mongwe gape yo monyenyane, Dafida, yo a bego a “sa tšwele le dinku.” (Temana 11) Ka gona, Dafida o ile a yo bitšwa madišong gomme a tla go Samuele. Ke moka, Jehofa o botša Samuele gore: “Tsoxa, O mo tlotšê, xobane ké yêna-eo.” (Temana 12) Ke therešo gore Dafida ke mošemane “wa mahlô a mabotse, wa sebopêxô sa senatla.” Eupša pelo ya gagwe ke yona e dirago gore a amogelwe ke Jehofa.—1 Samuele 13:14.
Lefaseng le leo le lebišago tlhokomelo e kgolo ponagalong ya ka ntle, re ka homotšwa ke go tseba gore Jehofa Modimo ga a tutuetšwe ke ponagalo ya ka ntle. Yena ga a na taba gore leemo la gago le bjang goba gore ba bangwe ba go bona o le yo botse. Seo o lego sona ka gare, pelong ya gago, ke sona se lego bohlokwa go Jehofa. Na go tseba seo go dira gore o nyake go hlagolela dika tše dibotse tšeo di tla dirago gore o be yo mobotse mahlong a Modimo?