Jesu Kriste​—Phatlalalo ya Molaetša wa Gagwe

“Ka ntle le pelaelo polelo e ka se kego ya fetoga mabapi le monna yo bohlale yo a tšwago Kaperenaume ke gore o tšwela pele a kgoma dipelo le menagano ya batho ka borutho.” *—MONGWADI GREGG EASTERBROOK.

MANTŠU a na le matla. Mantšu ao a kgethilwego gabotse a ka tutuetša dipelo, a tsoša kholofelo, le go fetoša maphelo. Ga go motho yo a kilego a bolela mantšu a matla go feta Jesu Kriste. Yo a kilego a kwa ge Jesu a be a ruta Thuto ya Thabeng yeo ga bjale e tsebjago kudu, o ile a ngwala ka morago gore: “Ge Jesu a feditše dipolelo tše, mafelelo ya ba gore mašaba a ile a tlabja kudu ke tsela ya gagwe ya go ruta.”—Mateo 7:28.

Go fihla le lehono, batho ba bantši go dikologa lefase ba tlwaelane le dipolelo tše dintši tša Jesu. Ela hloko mehlala e mmalwa ya dipolelo tše di nago le mohola e le ruri.

“Le ka se be makgoba a Modimo le a Mahumo.”—Mateo 6:24.

“Ka baka leo, dilo tšohle, tše le nyakago batho ba le dira tšona, le lena ka mo go swanago le ba dire tšona.”—Mateo 7:12.

“Neang Kesara tša Kesara, eupša Modimo le mo nee tša Modimo.”—Mateo 22:21.

“Go na le lethabo le legolo go neeng go feta go amogeleng.”—Ditiro 20:35.

Eupša Jesu ga se a fo bolela dipolelo tše di gopolegago feela. Molaetša woo a bego a o bolela o be o le matla ka baka la gore o be o bolela therešo mabapi le Modimo, o ruta batho kamoo ba ka bago le morero bophelong, e bile o be o bontšha batho tharollo ya mathata a bona—Mmušo wa Modimo. Ge re hlahloba molaetša wo matlakaleng a latelago, re tla bona lebaka leo ka lona Jesu a ilego a tšwela pele go kgoma “dipelo le menagano ya batho ka borutho.”

[Mongwalo wa tlase]