Batamela Kgaufsi le Modimo

‘Mmušo wa Gago o tlo Tia’

2 Samuele 7:1-16

HISTORING ka moka, babuši ba bantši ba batho ba ile ba tlošwa maemong a bona. Ba bangwe ba ile ba tlošwa ka go se sa boutelwa, mola ba bangwe ba ile ba tlošwa ka kgang. Go thwe’ng ka Jesu Kriste, Kgoši ya Mmušo wa Modimo wa legodimong? Na go ka ba le seo se mo thibelago go buša e le Kgoši e kgethilwego ke Modimo? Karabo e ka hwetšwa mantšung ao Jehofa a a boditšego Kgoši Dafida wa Isiraele ya bogologolo, ao a begilwego go 2 Samuele kgaolo 7.

Ge kgaolo e thoma, re ithuta gore Dafida o be a lewa ke dihlong, ka ge yena, kgoši feela ya motho, a dula ka ntlong e botse ya ka mošate, mola areka ya Modimo e dula ka tenteng ya bobotlana. * Dafida o bontšha kganyogo ya gagwe ya go agela Jehofa ngwako o swanetšego goba tempele. (Temana 2) Eupša ntlo yeo e ka se agwe ke Dafida. A diriša moporofeta Nathane, Jehofa o botša Dafida gore morwa wa gagwe o tla aga tempele.—Ditemana 4, 5, 12, 13.

Jehofa o kgongwa ke kganyogo ya Dafida e tšwago pelong. Ge a arabela boineelong bja Dafida le go dumelelana le boporofeta, Modimo o dira kgwerano le Dafida ya gore O tla tsoša motho yo mongwe lešikeng la bogoši la Dafida yoo a tlago go buša ka mo go sa felego. Nathane o fetiša kholofetšo e tiilego go Dafida ka gore: “Ntlo ya gago le mmušo wa gago di tla tia go iša mehleng ya neng le neng pele ga gago; sedulo sa gago sa bogoši se tla dula se le gona go iša mehleng ya neng le neng.” (Temana 16, NW) Mojabohwa wa sa ruri wa kgwerano ye ke mang—Yoo a tlago go buša ka mo go sa felego?—Psalme 89:20, 29, 34-36.

Jesu wa Natsaretha e be e le setlogolwana sa Dafida. Ge a be a tsebiša ka go belegwa ga Jesu, morongwa o itše: “Jehofa Modimo o tla mo nea sedulo sa bogoši sa Dafida tatagwe, gomme o tla buša e le kgoši ntlong ya Jakobo ka mo go sa felego, mmušo wa gagwe o ka se fele.” (Luka 1:32, 33) Ka gona, kgwerano ya Dafida e phethagaditšwe go Jesu Kriste. Ka go rialo, ga a buše ka kgetho ya batho, eupša o buša ka kholofetšo e tiilego ya Modimo yeo e mo neago tshwanelo ya go buša ka mo go sa felego. Anke re gopoleng gore dikholofetšo tša Modimo ka mehla di a phethagala.—Jesaya 55:10, 11.

Go na le dilo tše pedi tše bohlokwa tšeo re ithutago tšona go 2 Samuele kgaolo 7. Sa mathomo, re ka kgodišega gore ga go na selo le ge e le sefe le motho le ge e le ofe yo a ka kgonago go thibela Jesu Kriste go buša. Ka go rialo, re ka kgonthišega gore o tla phethagatša morero o tsebaditšwego wa pušo ya gagwe, e lego go dira gore thato ya Modimo e direge ka mo go feletšego mo lefaseng bjalo ka ge e direga legodimong.—Mateo 6:9, 10.

Sa bobedi, pego ye e re ruta thuto e kgothatšago ka Jehofa. Gopola gore Jehofa o ile a bona le go tšeela godimo boikemišetšo bja pelo ya Dafida. Go a kgothatša go tseba gore Jehofa o tšeela godimo boineelo bja rena borapeding bja gagwe. Ka dinako tše dingwe, mabaka ao re sa kgonego go a laola, a bjalo ka boemo bjo bo fokolago bja tša maphelo goba botšofadi, a ka re thibela go dira sohle seo pelo ya rena e kganyogago go se dira go hlankeleng Modimo. Ge e ba go le bjalo, eka re ka homotšwa ke taba ya gore Jehofa o bona gaešita le boikemišetšo bja pelo yeo e tletšego ka boineelo bakeng sa borapedi bja gagwe.

[Mongwalo wa tlase]