Motho yo a Fetotšego Lefase

Mo lefaseng go phetše le go hwa batho ba dimilione tše dikete. Ba bantši ga ba gopolwe ka selo. Lega go le bjalo, ba mmalwa ba bile le tutuetšo ditiragalong tše bohlokwa tša lefase—e bile ba ka ba ba tutueditše le tsela yeo o phelago ka yona letšatši le letšatši.

O TSOGA mesong gomme o itokišeletša go ya mošomong. O gotetša mabone ge o dutše o itokiša. O tšea puku goba makasine wo o tlago go o bala ge o le ka peseng. O gopola go tšea sehlare seo o se neilwego ke ngaka seo se go thušago go lwantšha bolwetši. Letšatši la gago le sa thoma, eupša o šetše o hotšwe ke tutuetšo ya batho ba mmalwa ba bohlokwa.

Michael Faraday O belegwe ka 1791, gomme rathutamahlale yo wa Leisimane ke mohlami wa electric motor le dynamo (metšhene ya go fehla mohlagase). Dilo tšeo a di hlamilego di dirile gore mohlagase o hwetšwe ke batho ba bantši.

Ts’ai Lun Ke mohlankedi ka kgorong ya ka mošate wa China, gomme go bolelwa gore mo e ka bago ka 105 C.E. o tlile ka mokgwa wa go dira pampiri wo o lebišitšego go tšweletšweng mo gogolo ga pampiri.

Johannes Gutenberg Mo e ka bago ka 1450, mohlami yo wa Mojeremane o ile a hlama motšhene wa pele wa go gatiša wo o dirišago ditlhaka tša go bewa ka diatla. Motšhene wo wa go gatiša o dirile gore go gatiša go se bitše kudu, ka go rialo wa dira gore ditaba tše fapa-fapanego di hwetšagale gabonolo.

Alexander Fleming Ka 1928, monyakišiši yo wa Scotland o ile a kgona go dira sehlare sa go bolaya dipakteria, seo a ilego a se bitša penicillin. Sehlare se ga bjale se dirišwa kudu bakeng sa go alafa dipakteria.

Ka ntle le pelaelo, dilo tšeo di fihleletšwego le tšeo di tšweleditšwego ke batho ba mmalwa di thušitše go nolofatša bophelo bja batho ba dimilione tše dikete goba go dira gore ba thabele bophelo.

Lega go le bjalo, go na le motho o tee yo a fapanago le bona ka moka. Ga a tsebje ka go tšweletša dilo tša thutamahlale goba tša tša kalafo. Go e na le moo, motho yo wa mmotlana yo a hwilego nywaga e nyakilego goba e 2 000 e fetilego o tlogetše molaetša—molaetša o matla wa kholofelo le khomotšo. Ge molaetša wa gagwe o lekanyetšwa ka bogolo bja batho bao o kgonnego go tutuetša maphelo a bona lefaseng ka bophara, ba bantši ba ka dumela gore e tloga e le motho yo a fetotšego lefase.

Monna yo e be e le Jesu Kriste. Ke molaetša ofe woo a ilego a o tsebatša? Le gona, molaetša woo o ka tutuetša bophelo bja gago bjang?