Babadi ba Rena ba a Botšiša . . .

Na Jesu ke Morongwa yo Mogolo, Mikaele?

▪ Karabo e bonolo ke ee. Go bitšwa ka maina a go feta letee go tlwaetšwe ditšong tše dintši. Go direga se se swanago ka maina a ka Beibeleng. Ka mohlala, mopatriareka Jakobo gape o bitšwa Isiraele. (Genesi 35:10) Moapostola Petro o bitšwa ka ditsela tše hlano tše sa swanego—Simeoni, Simone, Petro, Kefase, le Simone Petro. (Mateo 10:2; 16:16; Johane 1:42; Ditiro 15:7, 14) Re ka kgodišega bjang gore Mikaele ke leina le lengwe la Jesu? Ela hloko bohlatse bjo bo latelago bja Mangwalo.

Beibele e bolela gahlano mabapi le sebopiwa se matla sa moya Mikaele. Leina le le tšwelela gararo ka pukung ya Daniele. Go Daniele 10:13, 21, re bala gore morongwa yo a romilwego o thušwa ke Mikaele, yo a bitšwago “e mongwê wa balaodi ba baxolo” le “Molaodi wa lena.” Se se latelago, go Daniele 12:1, re ithuta gore nakong ya bofelo, “Mikaele, kxoši e kxolo ye e tl’o . . . êmêla ba sethšaba sa xeno.”

Go bolelwa gape ka leina Mikaele go Kutollo 12:7, yeo e hlalosago “Mikaele le barongwa ba gagwe” ba e-lwa ntweng e bohlokwa yeo e feleletšago ka go rakwa ga Sathane Diabolo le barongwa ba gagwe ba kgopo legodimong.

Hlokomela gore tabeng e nngwe le e nngwe yeo e hlalositšwego ka mo godimo, Mikaele o hlaloswa e le morongwa wa ntwa yo a lwelago le go šireletša batho ba Modimo, gaešita le go lwa le Sathane, lenaba le legolo la Jehofa.

Juda temana 9 e bitša Mikaele gore ke “morongwa yo mogolo.” Temana e nngwe gape yeo go yona go bolelwago ka morongwa yo mogolo ke ya 1 Bathesalonika 4:16, moo Paulo a bolelago mabapi le Jesu yo a tsošitšwego, gore: “Morena [Jesu] o tla theoga legodimong ka mokgoši wa taelo, ka lentšu la morongwa yo mogolo le ka phalafala ya Modimo.” Ka gona Jesu Kriste mo o hlaloswa e le morongwa yo mogolo, goba morongwa yo a phagamego.

Mabapi le se, go ka phethwa ka go re’ng? Jesu Kriste ke Mikaele, morongwa yo mogolo. Maina a ka bobedi—Mikaele (yeo e bolelago “Ke Mang yo a Swanago le Modimo?”) le Jesu (yeo e bolelago gore “Jehofa ke Phološo”)—a lebiša tlhokomelo karolong yeo a e phethago e le moemedi wa bogoši bja Modimo. Bafilipi 2:9, e bolela gore: “Modimo o mo [Jesu yo a tagafaditšwego] phagamišeditše boemong bja godimo gomme ka botho a mo nea leina le lego ka godimo ga leina le ge e le lefe le lengwe.”

Go bohlokwa gore re lemoge gore go belegwa ga Jesu e le motho e be e se mathomo a bophelo bja gagwe. Pele ga ge Jesu a ka belegwa, Maria o ile a etelwa ke morongwa yo a ilego a mmotša gore moya o mokgethwa o tla dira gore a ime ngwana le gore ngwana yoo o swanetše go bitšwa Jesu. (Luka 1:31) Nakong ya bodiredi bja gagwe, Jesu gantši o be a bolela ka nako ya ge a be le legodimong.—Johane 3:13; 8:23, 58.

Ka gona Mikaele morongwa yo mogolo ke Jesu, nakong ya pele e ba motho. Ka morago ga gore Jesu a tsošwe le go boela legodimong, o ile a tšwela pele ka tirelo ya gagwe e le Mikaele, morongwa yo a phagamego, “gore go išwe letago go Modimo Tate.”—Bafilipi 2:11.