Seo Jesu a se Rutilego ka Mmušo wa Modimo

“A tloga motseng o mongwe a ya go o mongwe le go tloga motsaneng o mongwe go ya go o mongwe a bolela . . . ditaba tše dibotse tša mmušo wa Modimo.”—LUKA 8:1.

RE RATA go bolela ka dilo tšeo di lego bohlokwa go rena, dilo tšeo re di ratago. Bjalo ka ge Jesu ka boyena a boletše, “molomo o bolela go tšwa go se se tletšego pelong.” (Mateo 12:34) Ge re hlahloba dilo tšeo Jesu a boletšego ka tšona nakong ya bodiredi bja gagwe, re ka phetha ka gore Mmušo wa Modimo o be o le bohlokwa go yena.

Mmušo wa Modimo ke’ng? Mmušo ke pušo yeo e eteletšwego pele ke kgoši. Ka gona, Mmušo wa Modimo ke pušo yeo e hlomilwego ke Modimo. Jesu o boletše kudu ka Mmušo wa Modimo, a o dira sehlogo se segolo sa molaetša wa gagwe. Mmušo wo go bolelwa ka wona ka makga a fetago a 110 ka Diebangeding tše nne. Eupša Jesu o be a sa rute ka mantšu feela. Ditiro tša gagwe le tšona di be di ruta go gontši ka Mmušo wa Modimo le ka seo o tlago go se dira.

Kgoši ya wona ke mang? Kgoši ya Mmušo wa Modimo ga se ya kgethwa ke batho ka go e boutela. Go e na le moo, Mmuši yo o kgethilwe ke Modimo ka boyena. Ge a be a ruta, Jesu o ile a utolla gore ke yena yo a kgethilwego ke Modimo gore a be Kgoši.

Jesu o be a tseba gore boporofeta bja Beibele bo boletše e sa le pele gore Mesia yo a holofeditšwego o tla buša Mmušong wa ka mo go sa felego. (2 Samuele 7:12-14; Daniele 7:13, 14; Mateo 26:63, 64) Gopola gore Jesu o boletše phatlalatša gore ke yena Mesia yo go boletšwego ka yena e sa pele. Ka gona Jesu o be a dumela gore ke yena Kgoši yeo e kgethilwego ke Modimo. (Johane 4:25, 26) Ka mo go swanetšego, Jesu o ile a diriša polelwana e rego “mmušo wa-ka” ka makga a mmalwa.—Johane 18:36.

Jesu le gona o rutile gore go tla ba le ba bangwe bao ba tlago go buša le yena. (Luka 22:28-30) O ile a bitša babuši-gotee ba gore ke “mohlatswana o monyenyane,” ka ge palo ya bona e tla ba e nyenyane. O boletše ka bona gore: “Tatago lena o kgahlilwe ke go le nea mmušo.” (Luka 12:32) Puku ya mafelelo ya Beibele e bontšha gore go tla ba le palo-moka ya batho ba 144 000 bao ba tlago go ba le tokelo ya go buša le Kriste.—Kutollo 5:9, 10; 14:1.

Mmušo o hlomilwe kae? Jesu o boditše mmušiši wa Moroma Pontio Pilato gore: “Mmušo wa-ka ga se karolo ya lefase le.” (Johane 18:36) Mmušo wa Modimo woo o eteletšwego pele ke Kriste o ka se be le babušiši ba batho. Jesu o boletše leboelela gore Mmušo wa Modimo ke “mmušo wa magodimo.” * (Mateo 4:17;  5:3, 10, 19, 20) Ka baka leo, Mmušo wa Modimo ke mmušo wa legodimong.

Jesu o be a tloga a letetše go boela legodimong ka morago ga go fetša nako mo lefaseng. O boletše gore ge a le moo, o tla ‘lokiša lefelo,’ a bula tsela ya gore babuši-gotee le yena ba tle ba be le yena.—Johane 14:2, 3.

Mmušo wa Modimo o phetha’ng? Jesu o rutile barutiwa ba gagwe gore ge ba rapela Modimo ba re: “Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:9, 10) Thato ya Modimo e a dirwa legodimong. Mmušo ke selo seo Modimo a tlago go se diriša go dira gore thato ya gagwe e phethwe lefaseng. Go phetha seo, Mmušo o tla fetoša dilo tše dintši mo lefaseng.

Mmušo o tla dira’ng mo lefaseng? Jesu o rutile gore Mmušo wa Modimo o tla fediša bobe ka go fediša bao ba ikemišeditšego go bo dira. (Mateo 25:31-34, 46) Seo se tla bolela gore go tla fedišwa mehuta ka moka ya bomenetša le ya bokgopo. Jesu o rutile gore lefase le tla tlala ka batho “ba moya o boleta,” ba lokilego, bagaugedi, “ba sekilego pelong,” le ba nago le khutšo.—Mateo 5:5-9.

Na batho ba bao ba botegago ba tla swanelwa ke go phela lefaseng leo le šilafaditšwego? Le ganyenyane! Jesu o holofeditše gore lefase le tla fetošwa ka tsela e kgahlišago nakong ya ge go buša Mmušo wa Modimo. Monna yo a bego a tlo bolawa gotee le Jesu o ile a re: “Jesu, o nkgopole ge o tsena mmušong wa gago.” Ge a araba, Jesu o itše: “Ruri ke go botša lehono, o tla ba le nna Paradeiseng.” (Luka 23:42, 43) Ee, Mmušo wa Modimo o tla dira gore lefase le ka moka e be paradeise—e swanago le yeo e bego e le tšhemong ya Edene.

Ke’ng se sengwe gape seo Mmušo wo o tlago go se direla batho? Jesu ga se a fo bolela dilo tšeo Mmušo wa Modimo o tlago go di dira. O ile a ba a bontšha seo o tlago go se dira. Jesu o  ile a dira diphodišo tše dintši tša mohlolo, ka go rialo, a bontšha ganyenyane seo a tlago go se dira nakong e tlago ge Mmušo wa gagwe o buša. Pego e buduletšwego ya Ebangedi e bolela mabapi le Jesu gore: “[O ile] a sepela le Galilea ka moka ga yona, a ruta disinagogeng tša bona a bolela ditaba tše dibotse tša mmušo e bile a fodiša mohuta o mongwe le o mongwe wa bolwetši le mohuta o mongwe le o mongwe wa bofokodi gare ga batho.”—Mateo 4:23.

Jesu o fodišitše batho ka ditsela tše dintši. O “kile a bula motho yo a belegwego e le sefofu mahlo.” (Johane 9:1-7, 32, 33) Ka go mo swara ka borutho, Jesu o ile a fodiša motho yo a bego a swere ke bolwetši bjo bo hlaswegago bja lephera. (Mareka 1:40-42) Ge “monna wa sefoa yo a bego a bile a raregile leleme” a be a tlišwa go yena, Jesu o ile a bontšha gore o be a ka dira gore “difoa di kwe le gore ba ba sa kgonego go bolela ba bolele.”—Mareka 7:31-37.

Gaešita le lehu ga se la ka la šitiša Kgoši yeo e kgethilwego ke Modimo. Mabakeng a mararo ao a begilwego, Jesu o ile a tsoša bahu. O ile a tsoša morwa a nnoši wa mosadi wa mohlologadi, ngwanenyana wa nywaga e 12, le mogwera wa gagwe yo a rategago Latsaro.—Luka 7:11-15; 8:41-55; Johane 11:38-44.

Ge a hlalosa bokamoso bjo bo kgahlišago bjo bo letetšego balata ba Mmušo wa Modimo, Jesu o boletše e sa le pele a diriša moapostola Johane gore: “Bonang! Tente ya Modimo e go batho, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.” (Kutollo 1:1; 21:3, 4) Akanya feela—lefase leo le se nago megokgo, bohloko le lehu! Ke moka thapelo ya gore thato ya Modimo e direge mo lefaseng bjalo ka ge e direga legodimong e tla phethega ka mo go feletšego.

Mmušo wa Modimo o tla tla neng? Jesu o boletše gore bogoši bja gagwe bo tla thoma ka nako e tee le lebaka le le kgethegilego leo a le biditšego nako ya “go ba gona ga gagwe.” Jesu o ile a nea boporofeta bjo bo nago le dintlha ka botlalo go bontšha gore go ba gona ga gagwe a le matleng a mmušo go be go tla thoma neng. Lebaka le la nako le be le tla swawa ke mathata lefaseng ka bophara, go akaretša dintwa, ditlala, ditšhišinyego tša lefase, leuba la malwetši, le koketšego ya go hlokega ga molao. (Mateo 24:3, 7-12; Luka 21:10, 11) Dika tše gotee le tše dingwe tšeo Jesu a boletšego e sa pele ka tšona di bonagetše gabotse go tloga ka 1914, ngwaga woo Ntwa ya I ya lefase e phulegilego ka wona. Ka baka leo, Jesu ga bjale o buša e le Kgoši. Go se go ye kae, go tla fihla nako ya gore Mmušo o tle gomme o dire gore thato ya Modimo e direge lefaseng. *

Go tla ga Mmušo wa Modimo go tla bolela’ng go wena? Seo se ithekgile ka tsela yeo o kgethago go arabela ka yona molaetšeng wa Jesu.

[Mengwalo ya tlase]