Seo Jesu a se Rutilego ka Yena

“Jesu o be a se na pelaelo le ge e le efe mabapi le gore ke yena mang, o tšwa kae, lebaka leo a tlilego lefaseng la rena, le seo bokamoso bo mo swaretšego sona.”—AUTHOR HERBERT LOCKYER.

PELE re ka amogela le go dumela dilo tšeo Jesu a di rutilego, go na le selo seo re swanetšego go se tseba ka yena. Jesu ge e le gabotse e be e le mang? O be a e-tšwa kae? Morero wa gagwe bophelong e be e le ofe? Ka Diebangeding—Mateo, Mareka, Luka le Johane—re ka kwa dikarabo tšeo di tšwago molomong wa Jesu.

O be a phela pele a ka belegwa lefaseng Jesu o kile a re: “Pele ga ge Aborahama a e-ba gona, ke be ke šetše ke le gona.” (Johane 8:58) Aborahama o phetše nywaga e ka bago e 2 000 pele Jesu a ka belegwa. Lega go le bjalo, Jesu o phetše pele ga ge mopatriareka yoo a ka ba gona. Lega go le bjalo, Jesu o be a phela kae? O hlalositše gore: “Ke theogile legodimong.”—Johane 6:38.

Morwa wa Modimo Jehofa o na le barwa ba bantši ba barongwa. Lega go le bjalo, Jesu ke morwa wa moswana-noši. O ile a bolela gore yena ke “Morwa yo a tswetšwego a nnoši wa Modimo.” (Johane 3:18) Polelwana yeo e ra gore Jesu ke yena a nnoši yo a bopilwego ke Modimo ka go lebanya. Morwa yo a tswetšwego a nnoši ke yoo Modimo a hlotšego dilo tše dingwe ka yena.—Bakolose 1:16.

“Morwa wa motho” Jesu o dirišitše polelwana ye ge a bolela ka yena go feta dipolelwana tše dingwe ka moka. (Mateo 8:20) Ka gona o bontšhitše gore e be e se morongwa yo a aperego mmele wa motho goba yo a lego ka sebopego se sengwe. Go e na le moo, e be e le motho yo a feletšego. Modimo o ile a diriša moya wa gagwe o mokgethwa go tloša bophelo bja Morwa wa gagwe legodimong go bo iša lefaseng, a dira gore Maria wa kgarebe a ime. Ka baka leo, Jesu o ile a belegwa e le motho yo a phethagetšego le yo a se nago sebe.—Mateo 1:18; Luka 1:35; Johane 8:46.

Mesia yo a holofeditšwego Mosadi wa Mosamaria o ile a botša Jesu gore: “Ke tseba gore Mesia o e-tla.” O ile a araba ka gore: “Nna yo ke bolelago le wena, ke yena yoo.” (Johane 4:25, 26) Lentšu “Mesia,” go swana le lentšu “Kriste,” le ra gore “Motlotšwa.” Jesu o be a tloditšwe, goba a kgethilwe ke Modimo, gore a kgathe tema e kgethegilego ya go phethagatša dikholofetšo tša Modimo.

Morero wa gagwe o mogolo Jesu o kile a re: “Ke swanetše go bolela ditaba tše dibotse tša mmušo wa Modimo, gobane ke sona se ke se rometšwego.” (Luka 4:43) Gaešita le ge a ile a dira dilo tše dintši tše dibotse bakeng sa batho bao ba nyakago thušo, o be a lebišitše tlhokomelo e kgolo go boleleng ka Mmušo wa Modimo. Seo a se rutilego mabapi le Mmušo woo se tla ahla-ahlwa ka morago.

Go molaleng gore Jesu e be e se motho feela. * Ka ge re tla bona, go phela ga gagwe legodimong go dirile gore mantšu ao a bego a a bolela mo lefaseng a kwagale kudu. Na re swanetše go makatšwa ke ge molaetša woo a bego a o tsebatša o tutuetša maphelo a batho ba dimilione go dikologa lefase?

[Mongwalo wa tlase]