Balesamo ya Gileada​—Sehlare sa go Alafa

PEGO e tsebjago kudu ka pukung ya Beibele ya Genesi e re botša ka bana babo Josefa bao ba ilego ba mo rekišetša bagwebi ba Baišimaele bao ba bego ba lebile Egipita. Bagwebi bao ba be ba e-tšwa Gileada le dikamela di be di rwele ditlolo tša balesamo le dithoto tše dingwe tšeo di bego di išwa Egipita. (Genesi 37:25) Pego ye e nyenyane e šišinya gore setlolo seo se tšwago Gileada se be se ratwa kudu dinageng tša bogologolo tša Bohlabela bja Magareng, se ratelwa dika tša sona tša go alafa.

Lega go le bjalo, lekgolong la botshelela la nywaga B.C.E., moporofeta Jeremia o ile a botšiša a nyamile gore: “A xa xo sehlare kua Gileada?” (Jeremia 8:22) Ke’ng seo se dirilego gore Jeremia a botšiše potšišo ye? Ge e le gabotse setlolo sa  balesamo ke’ng? Na go na le setlolo sa balesamo seo se ka dirišetšwago go alafa lehono?

Setlolo sa Balesamo Mehleng ya Beibele

Balesamo ke lentšu la kakaretšo leo le hlalosago setlolo sa monko o bose sa makhura seo se dirilwego ka diela tše tšwago dimeleng tša mehuta-huta. Makhura a balesamo, ao gantši a dirišetšwago go dira diorelo le dinkgiša-bose, e be e le a mangwe a dilo tša matsaka tša Bohlabela bja Magareng mehleng ya bogologolo. A ile a balwa gare ga dilo tšeo makhura a makgethwa a go tloletša batho maemo a dirwago ka tšona le diorelo tšeo di bego di dirišwa taberenakeleng nakwana ka morago ga ge Baisiraele ba tšwile Egipita. (Ekisodo 25:6; 35:8) Le gona, makhura a Balesamo a be a le gare ga dimpho tša maemo tšeo kgošigadi ya Seba e ilego ya di tlišetša Kgoši Solomone. (1 Dikxoši 10:2, 10) Esitere o ile a fetša “dikxwedi tše di selelaxo à iphôrôla ka makhura a mira [balesamo]” pele a ka itšweletša go Kgoši ya Peresia, Ahasiwerosi.—Esitere 1:1; 2:12.

Gaešita le ge makhura a balesamo a be a e-tšwa dikarolong tše fapa-fapanego tša Bohlabela bja Magareng, balesamo ya Gileada e be e e-tšwa Nageng ya Kholofetšo, ka ge Gileada e le karolong ya ka bohlabela bja Noka ya Jorodane. Mopatriareka Jakobo o be a lebelela balesamo e le se sengwe sa “ditšweletšwa tše dibotsebotse tša mo nageng” gomme o ile a e romela Egipita e le mpho. (Genesi 43:11, NW) Le gona moporofeta Hesekiele o ile a lokeletša ditlolo tša balesamo gare ga ditlolo tšeo Juda le Isiraele di bego di di romela Tiro. (Hesekiele 27:17) Balesamo e be e tsebja kudu ka go kgona go alafa. Dingwalwa tša bogologolo di boletše gantši ka matla a setlolo se a go alafa le go tsošološa, kudu-kudu tabeng ya go fodiša dintho.

Balesamo Bakeng sa Setšhaba se se Babjago

Bjale ke ka baka la’ng Jeremia a ile a botšiša potšišo e rego, “A xa xo sehlare kua Gileada”? Gore re kwešiše seo, re swanetše go lebelela setšhaba sa Isiraele mehleng yeo. Pejana, moporofeta Jesaya o ile a hlalosa ka mo go kwagalago boemo bja sona bja go fokola moyeng, ka gore: “Xo tloxa lwaong xo fihla hloxong xa xo mo xo thabilexo; e fo ba dinthô le mexoxoma, le dinthô tša bô-lehono di sešoxo tša hlatswiwa ’me tša tlêmêlêlwa.” (Jesaya 1:6) Go e na le go lemoga boemo bja sona bjo bo nyamišago le go tsoma kalafo, setšhaba se ile sa tšwela pele ka ditsela tša sona tša bonganga. Mehleng ya gagwe, Jeremia o be a ka fo lla ka gore: “Ba lahlile Lentšu la Morêna. Byale bohlale bya bôná ké bya eng?” Ge nkabe ba boetše go Jehofa, a ka be a ba fodišitše. “A xa xo sehlare kua Gileada?” A potšišo e šišinyago kgopolo gakaakang!—Jeremia 8:9.

Ka ditsela tše dintši, lefase la lehono le tletše ka “dinthô le mexoxoma, le dinthô tša bô-lehono.” Batho ba tlaišwa ke bodiidi, go hloka toka, boithati, le go hloka botho, gomme tše ka moka ke ka gobane lerato la go rata Modimo le baagišani le fodile. (Mateo 24:12; 2 Timotheo 3:1-5) Ba bantši ba ikwa ba lahlilwe ka baka la morafo le setlogo sa bona, goba nywaga ya bona. Ka godimo ga tšeo, tlala, bolwetši, ntwa le lehu di tlaleletša mahlokong a bona. Go swana le Jeremia, badumedi ba bantši ba ipotšiša ge e ba go se na ‘balesamo kua Gileada’ yeo e ka dirišwago go tlema dintho tša bao ba tlaišegago maikwelong le moyeng.

Ditaba tše Dibotse Tšeo di Alafago

Mehleng ya Jesu, potšišo e swanago e be e le menaganong ya batho ba ikokobeditšego. Eupša ga se ya tlogelwa e se ya arabja. Mathomong a ngwaga wa 30 C.E. sinagogeng ya Natsaretha, Jesu o ile a bala puku ya Jesaya lengwalong la go phuthwa, a re: “Morêna ó mpeetše xo bexêla babôtlana ’taba tše di botse; O nthometše xo alafa ba dipelo tše robexilexo.” (Jesaya 61:1) Ke moka Jesu o ile a diriša mantšu ao go yena, a itšweletša e le Mesia yo a neilwego kabelo ya go tsebatša molaetša wa khomotšo.—Luka 4:16-21.

Nakong ka moka ya bodiredi bja gagwe, Jesu o ile a bolela ka mafolofolo ditaba tše dibotse tša Mmušo wa Modimo. (Mateo 4:17) Thutong ya Thabeng, o ile a holofetša bao ba tlaišegago gore boemo bja bona bo tla fetošwa, ge a re: “Go thaba lena bao le llago gona bjale, gobane le tla sega.” (Luka 6:21) Ka go tsebatša go tla ga Mmušo wa Modimo—molaetša wa kholofetšo—Jesu o ile a ‘tlemelela dipelo tše setlegilego.’

 Mehleng ya rena, “ditaba tše dibotse tša mmušo” di sa dutše di homotša. (Mateo 6:10; 9:35) Ka mohlala, ela hloko boemo bja Roger le Liliane. Ka January 1961, ba ile ba ithuta ka kholofetšo ya Modimo ya bophelo bjo bo sa felego gomme e ile ya ba bjalo ka setlolo sa balesamo seo se thobago. Liliane o sa gopola ka gore: “Ke ile ka bina ke dikologa ka khitšhing ke nagana ka seo ke ithutago sona. Ke be ke thabile kudu.” Roger, yoo ka nako yeo a bego a e na le nywaga e lesome a golofetše ganyenyane, o tlaleletša ka gore, “Ke ile ka thoma go thaba, ke thabela bophelo, ke leboga kholofelo e kgahlišago—ya go tsošwa ga bahu le go fedišwa ga bohloko le manyami ka moka.”—Kutollo 21:4.

Ka 1970, ngwana wa bona wa nywaga e 11 o ile a hwa. Eupša ga se ba ka ba nwelela manyaming. Ba ile ba bona ka bobona gore Jehofa “ó fodiša ba dipelo tše’ robexilexo, ó tlêmêlêla ’nthô tša bôná.” (Psalme 147:3) Kholofelo ya bona e ile ya ba homotša. Ga bjale ka morago ga nywaga e 50, ditaba tše dibotse tša Mmušo o tlago wa Modimo di ba tlišeditše khutšo le kgotsofalo.

Phodišo e sa Tlago

Na go na le ‘balesamo kua Gileada’ lehono? Ee, lehono go sa dutše go e na le balesamo ya moya. Khomotšo le kholofelo tšeo di tlišwago ke ditaba tše dibotse tša Mmušo di kgona go tlemelela dipelo tše di robegilego. Na o nyaka phodišo e bjalo? Seo o swanetšego go se dira ke go bula pelo ya gago gore e amogele molaetša o homotšago o tšwago Lentšung la Modimo le go o dumelela o laola bophelo bja gago. Batho ba dimilione ba šetše ba dirile bjalo.

Phodišo ya setlolo se sa balesamo e bontšha e sa le pele kimollo e kgolo yeo e sa tlago. Nako ya Jehofa Modimo ya go “fodiša ditšhaba” gore di phele ka mo go sa felego e batamela ka lebelo. Ka nako yeo, “xo ba ba axilexo fá xo ka se bê le e a rexo: Ke a babya!” Ee, go sa dutše go e na le ‘balesamo kua Gileada’!—Kutollo 22:2; Jesaya 33:24.

[Seswantšho go letlakala 23]

Matla a go fodiša a ditaba tše dibotse tša Mmušo wa Modimo a tšwela pele a thoba batho ba dipelo tše di setlegilego lehono