Babadi ba Rena ba a Botšiša . . .

Dihlatse tša Jehofa di Lebelela Bjang go Tswakanya Ditumelo?

▪ Go ya ka World Christian Encyclopedia, go na le “madumedi a 10 000 a fapa-fapanego lefaseng ka bophara.” Ka ge go se kwane ga ona go bakile manyami a magolo, kgopolo ya go tswakanya ditumelo e dira gore barapedi ba bantši ba be le kholofelo. Ba dumela gore go ka tliša khutšo le botee lefaseng leo le aroganego.

Beibele e kgothaletša botee. Moapostola Paulo o ile a swantšha phuthego ya Bokriste le mmele wa motho, woo setho se sengwe le se sengwe sa ona se “kopantšwego gotee ka kwano le go dirwa gore o be le tirišano.” (Baefeso 4:16) Ka mo go swanago, moapostola Petro o kgothaleditše badumedi-gotee le yena gore: “Ka moka ga lena e-bang le kgopolo e swanago.”—1 Petro 3:8.

Bakriste ba lekgolong la pele la nywaga ba be ba phela lefaseng la batho ba merafo le madumedi a fapa-fapanego. Lega go le bjalo, ge a be a ngwala mabapi le go tswakanya madumedi, Paulo o botšišitše gore: “Motho yo a botegago o abelana eng le yo a sa dumelego?” Ke moka o ile a lemoša Bakriste gore ba ‘tšwe gare ga bona.’ (2 Bakorinthe 6:15, 17) Ka mo go kwagalago, Paulo o be a bolela ka go tswakanya ditumelo. Ke ka baka la’ng a ile a dira bjalo?

Moapostola o ile a hlalosa gore go rapela gotee ga motho yo e lego Mokriste wa therešo le yo e sego yena e tla ba go rwala joko e sa lekanego, gomme ga se gwa loka. (2 Bakorinthe 6:14) Go tla feleletša ka go gobatša tumelo ya Mokriste. Dilo tšeo Paulo a bego a tshwenyegile ka tšona di be di swana le tšeo tate yo a tsebago gore bana ba bangwe mo motseng ga ba itshware gabotse a tshwenyegago ka tšona. Ka ge e le motswadi yo a tshwenyegilego, ka bohlale o beela bana ba gagwe mellwane ya gore ba ka bapala le bafe. Mellwane yeo a e beilego e ka no se ratwe. Lega go le bjalo, ka tlase ga maemo ao, go ikaroganya le bona go tla šireletša bana ba gagwe tutuetšong e mpe. Ka mo go swanago, Paulo o be a tseba gore go ikarola go madumedi a mangwe go tla šireletša Bakriste ditirong tša ona tše gobatšago.

Ka go gata mogato woo, Paulo o be a ekiša Jesu. Gaešita le ge Jesu a beile mohlala o mogolo go godišeng khutšo gare ga batho, ga se a ka a tswakanya ditumelo. Dihlopha tše dintši tša bodumedi, tše bjalo ka sa Bafarisei le sa Basadutsei, di be di le gona mehleng ya bodiredi bja Jesu bja lefaseng. Ge e le gabotse, dihlopha tše tša bodumedi di ile tša lakana go lwantšha Jesu, go iša bokgoleng bja go loga maano a go mmolaya. Ka lehlakoreng le lengwe, Jesu o ile a laela barutiwa ba gagwe gore “ba phakgamele thuto ya Bafarisei le Basadutsei.”—Mateo 16:12.

Go thwe’ng ka lehono? Na temošo ya Beibele ya mabapi le go se tswakanye ditumelo e sa dutše e šoma? Ee, e sa šoma. Se ke ka gobane ditumelo tše di fapa-fapanego tša bodumedi di ka se ke tša kopanywa ke go tswakanya ditumelo go fo swana le ge makhura le meetse a ka se kopanywe feela ka go a tšhela ka pitšeng. Ka mohlala, ge batho ba madumedi a sa swanego ba kopana bakeng sa go rapelela khutšo, ke modimo ofe yo ba mo rapelago? Na ke Modimo wa Bojakane wa Boraro-botee? Na ke Brahma wa Hindu? Na ke Buddha? Goba na ke yo mongwe?

Moporofeta Mika o boletše e sa le pele gore “bofelong bya mabaka,” batho ba tšwago ditšhabeng ka moka ba tla re: “A re yeng re rotoxêlê thabeng ya Morêna, Ngwakong wa Modimo wa Jakobo, a re rutê ’tsela tš’axwe.” (Mika 4:1-4) Mafelelo e tla ba khutšo le botee lefaseng ka bophara, e sego ka gobane madumedi ka moka a kopantšwe, eupša ka gobane batho ka moka ba amogela borapedi bo tee bja therešo.

[Seswantšho go letlakala 27]

Ditho tša madumedi a magolo lefaseng sebokeng sa go tswakanya ditumelo, ka 2008

[Mothopo]

REUTERS/Andreas Manolis