Therešo ka Sebe

NA MOTHO yo a babjago o be a ka hlatsela gore ga a na bolwetši ka go roba thermometer? Ga go bjalo le gatee! Ka mo go swanago, taba ya gore batho ba bantši ba gana pono ya Modimo ka sebe ga e hlatsele gore sebe ga se gona. Lentšu la gagwe, Beibele, le bolela mo gontši ka taba yeo. Ge e le gabotse Beibele e ruta’ng ka sebe?

Ka Moka re a Hlaelelwa

Nywageng e ka bago e dikete tše pedi e fetilego, moapostola Paulo o ile a hlalosa kgakanego ya gagwe mabapi le taba ya gore ‘botse bjo a bo dumago ga a bo dire, eupša bobe bjo a sa bo dumego o bo dirile tlwaelo.’ (Baroma 7:19) Ge e ba re botega, re swanetše go dumela gore boemo bja rena ke bjo bo swanago. Mohlomongwe re duma go phela ka Melao e Lesome goba ka tekanyetšo e itšego ya boitshwaro, eupša re rata goba re sa rate, re a hlaelelwa. Ga se gore re kgetha go roba molao ka boomo, eupša re fo ba re fokola. Ka baka la’ng? Paulo o nea karabo ka boyena ka gore: “Ge e ba bjale, seo ke sa se dumego e le sona seo ke se dirago, yo a se tšweletšago ga e sa le nna, eupša ke sebe seo se dulago go nna.”—Baroma 7:20.

Go swana le Paulo, batho ka moka ba tlaišwa ke mafokodi a bona—bohlatse bja sebe sa leabela le go se phethagale. Moapostola o boletše gore: “Bohle ba dirile sebe gomme ba hlaelelwa ke letago la Modimo.” Sebaki sa boemo bjo ke sefe? Paulo o tšwela pele ka gore: “Ka motho o tee [Adama] sebe se tsene lefaseng, gomme lehu la tsena ka sebe, ka baka leo lehu le aparetše batho bohle gobane bohle ba dirile sebe.”—Baroma 3:23; 5:12.

Gaešita le ge ba bantši ba gana kgopolo ya gore phapogo ya batswadi ba rena ba pele e re arogantše le Modimo gomme ya dira gore re lahlegelwe ke go phethagala ga mathomong, yona kgopolo yeo ge e le gabotse ke yona yeo Beibele e e rutago. Jesu, ka go tsopola dikgaolong tša mathomo tša Genesi, o bontšhitše gore o be a dumela pegong ya Adama le Efa.—Genesi 1:27; 2:24; 5:2; Mateo 19:1-5.

E nngwe ya dithuto tše dikgolo tša molaetša wa Beibele ke ya gore Jesu o tlile lefaseng go lopolla bao ba dumelago go yena boemong bja bona bja sebe. (Johane 3:16) Ditebelelo tša rena tša bophelo bja nakong e tlago di ithekgile ka go amogela tsela ya Jehofa ya go phološa batho ba nago le tebogo boemong bjoo ba sa kgonego go bo laola. Eupša ge e ba re sa kwešiše gabotse seo sebe e lego sona go ya ka pono ya Modimo, re ka se kgone go kwešiša le go leboga tsela yeo a e hlomilego ya go re phološa go sona.

Sehlabelo sa Jesu le Lebaka Leo ka Lona se Bego se Nyakega

Jehofa o be a file motho wa pele tebelelo ya go phela ka mo go sa felego. Adama o be a ka lahlegelwa ke tebelelo ye yeo e kgahlišago ge feela a be a ka rabela kgahlanong le Modimo. Adama o ile a rabela gomme ge a be a dira bjalo, o ile a fetoga modiradibe. (Genesi 2:15-17; 3:6) Adama o ile a dira dilo ka tsela yeo e thulanago le thato ya Modimo, a hlaelelwa ke phethagalo gomme a senya tswalano ya gagwe le Modimo. Ge a be a dira sebe ka go roba molao wa Modimo, o ile a thoma go hwa. Ka manyami, bana ka moka ba Adama—go akaretša le rena—ba belegetšwe sebeng gomme re lebanwe ke lehu ka baka la seo. Ka baka la’ng?

Lebaka le bonolo. Batswadi ba sa phethagalago ba ka se be le bana ba phethagetšego. Bana ka moka ba Adama ba belegwe e le badiradibe gomme bjalo ka ge moapostola Paulo a bontšha, “moputso woo sebe se o lefago ke lehu.” (Baroma 6:23) Lega go le bjalo, karolo ya bobedi ya temana yeo e re nea kholofelo ka gore: “Eupša mpho yeo Modimo a e neago ke bophelo bjo bo sa felego ka Kriste Jesu Morena wa rena.” Seo se ra gore,  ka sehlabelo sa lehu la Jesu, go a kgonega gore batho ba kwago le ba nago le tebogo ba hlwekišwe ditla-moragong tša sebe seo se dirilwego ke Adama. * (Mateo 20:28; 1 Petro 1:18, 19) Seo se swanetše go go dira gore o ikwe bjang?

Lerato la Kriste “le a re Gapeletša”

Moapostola Paulo yo a buduletšwego o nea karabo ya Modimo ya potšišo ya ka mo godimo. O ngwadile gore: “Lerato leo Kriste a nago le lona le a re gapeletša, gobane se ke seo re se ahlotšego, gore motho o tee o hwetše bohle; . . . o hwetše bohle gore bao ba phelago ba se sa hlwa ba iphelela, eupša ba phelele yena yo a ba hwetšego gomme a tsošwa.” (2 Bakorinthe 5:14, 15) Ge e ba motho a lemoga gore sehlabelo sa Jesu se ka feleletša ka go mo lokolla ditla-moragong tša sebe gomme a kganyoga go bontšha tebogo tokišetšong yeo, o swanetše go katanela go phela ka go dumelelana le seo Modimo a se nyakago go yena. Se se akaretša go hwetša kwešišo ya seo Modimo a se nyakago go yena, go tlwaetša letswalo la gagwe ka ditekanyetšo tša Beibele le go phela ka go dumelelana le tšona.—Johane 17:3, 17.

Go dira sebe go senya tswalano ya rena le Jehofa Modimo. Ge Kgoši Dafida a be a lemoga bogolo bja sebe sa bohlotlolo seo a se dirilego le Batseba gotee le polao ya monna wa gagwe, ga go pelaelo gore o ile a nyama kudu. Eupša seo a bego a tshwenyegile kudu ka sona—le gona ka mo go swanetšego—e be e le gore dibe tša gagwe di kwešitše Modimo bohloko. O ile a bolela le Jehofa a nyamišitšwe ke sebe sa gagwe a re: “Ké senyeditše Wêna, Wêna fêla; ke dirile sa xo Xo befêla.” (Psalme 51:4) Ka mo go swanago, ge Josefa a be a lekwa go dira bohlotlolo, letswalo la gagwe le ile la dira gore a botšiše a re: “Nka dira bya’ng bobe byo boxolo byoo ka senya pele xa Modimo?”—Genesi 39:9.

Ka go rialo, sebe ga se feela taba ya go ikwela bohloko ka gobane mohlomongwe re hlabišitšwe dihlong. Ga se feela taba ya go ikarabela setšhabeng ka gobane re ka ba re paletšwe ke go dira dilo ka kgopolo e itšego. Go roba melao ya Modimo ya mabapi le thobalano, go botega, tlhompho, borapedi, bjalo-bjalo, go senya tswalano ya rena le yena. Ge re dira sebe ka boomo, re  itira manaba a Modimo. Ye ke therešo yeo e nyakago gore re e naganišiše gabotse.—1 Johane 3:4, 8.

Bjale go diregile’ng ka sebe? Taba ke gore ga se gwa direga selo ka sebe. Batho ba fo ba ba thomile go se bitša ka maina a mangwe ba nagana gore se tla bonagala e se selo se segolo. E ka ba e le gore ba bantši ba ile ba retetša goba go hlokomologa matswalo a bona. Bohle bao ba nyakago go amogelwa ke Modimo ba swanetše go ganetša mokgwa woo. Bjalo ka ge re bone, moputso wa sebe ga se feela go lahlegelwa ke seriti goba go lewa ke dihlong, eupša ke lehu. Sebe ke taba ya lehu le bophelo.

Ditaba tše dibotse ke gore go ka kgonega gore re lebalelwe dibe motheong wa sehlabelo sa Jesu ge e ba re tloga re itshola gomme re tlogela go dira dibe. Paulo o ngwadile gore: “Go thaba bao ditiro tša bona tša go hloka molao di lebaletšwego le bao dibe tša bona di bipilwego; go thaba motho yo sebe sa gagwe le gatee Jehofa a ka se se balego.”—Baroma 4:7, 8.

[Mongwalo wa tlase]

[Lepokisi/​Seswantšho go letlakala 10]

Phetogo ya Thutatumelo

Go batho ba bantši ba tsenago kereke ya Katholika, kgopolo ya Limbo ke kgale e sa kwešišwe gabotse. Nywaga-someng ya morago-bjale, e be e hwelela ganyenyane-ganyenyane—go fihla bokgoleng bja gore thuto yeo e se sa hlwa e le gona ka gare ga dikatikasema. Ka 2007, Kereke ya Katholika e ile ya fediša thuto ya Limbo ka molao ka sengwalweng seo se hlalosago “mabaka a thutatumelo le a ditirelo tša kereke a go holofela gore masea ao a hwago a se a kolobetšwa a ka phološwa le go hwetša lethabo la ka mo go sa felego.”—International Theological Commission.

Ke ka baka la’ng go bile le phetogo ye ya thutatumelo? Taba ke gore, phetogo ye e be e dumelela kereke go itokolla go seo mongwadi wa dikuranta wa Mofora Henri Tincq a ilego a se bitša “bohwa bjo bo imelago, bjoo go tloga Nywageng ya Magareng go fihla lekgolong la bo-20 la nywaga bo ilego bja emelelwa ke Kereke ya boradia, yeo e thabelago go tšhošetša batswadi ka Limbo gore ba tutueletšege go kolobetša bana ba bona ka pela ka mo go ka kgonegago.” Eupša go fetošwa ga Limbo le gona go tsoša dipotšišo tše dingwe.

Na ke Motlwae Goba ke ya Mangwalo? Go ya ka histori, go dumela go Limbo go tšweletše dingangišanong tša lekgolong la bo-12 la nywaga tšeo di bego di tswalana le pakatori. Kereke ya Katholika e be e ruta gore moya o phologa lehu, bjale e be e swanetše go hwetša lefelo leo meoya ya bana ba bego ba ka se ye legodimong e bego e tla ya go lona ka gobane ba se ba kolobetšwa eupša e le bao ba sa swanelwego ke go ya diheleng. Ka go rialo, go ile gwa tšwelela kgopolo ya Limbo.

Lega go le bjalo, Beibele ga e rute gore moya o phologa lehu. Go e na le moo, e bolela ka go lebanya gore go e na le go ba e sa hwego, meoya ya batho ba dirago dibe e ka “fedišwa” le gona e “tlo hwa.” (Ditiro 3:23; Hesekiele 18:4) Ka ge moya o e-hwa, lefelo le bjalo ka Limbo ga go kgonege gore le be gona. Go oketša moo, Beibele e hlalosa lehu e le boemo bja go se kwe selo, go swana le boroko.—Mmoledi 9:5, 10; Johane 11:11-14.

Beibele e bontšha gore Modimo o lebelela bana ba batswadi ba Bakriste e le ba bakgethwa. (1 Bakorinthe 7:14) Polelo e bjalo e be e ka se bolele selo ge nkabe go be go nyakega gore masea a kolobetšwe e le gore a phološwe.

Thuto ya Limbo e be e roga Modimo e le ruri, e dira gore a bonagale e le mmuši yo sehlogo yo a otlago batho ba se nago molato, go e na le gore a bonagale e le Tate yo a nago le toka le yo lerato. (Doiteronomio 32:4; Mateo 5:45; 1 Johane 4:8) Ka gona, ga go makatše gore thuto ye yeo e sego ya Mangwalo e be e dula e sa kwagale go Bakriste ba kgonthe!

[Diswantšho go letlakala 9]

Go phela ka go dumelelana le Lentšu la Modimo go dira gore re be le tswalano e botse le Modimo le batho