Go Aloga ga Sehlopha sa Bo-128 sa Gilead

Baromiwa ba Romelwa go yo ‘Dira Barutiwa’

“GORE batho ba ditšhaba ka moka ba kwe ditaba tše dibotse, Bakriste ba bangwe ba be ba tla ithapela go tlogela malapa a gabo bona le magae gore ba bolele ditaba tše dibotse dinageng dišele.” Ka mantšu ao, David Splane wa Sehlopha se Bušago sa Dihlatse tša Jehofa o ile a bulela batheetši lenaneo leo le agago la dilo tša moya.

Ka March 13, 2010, batho ba e nyakilego go ba ba 8 000 ba ile ba bokana bakeng sa go aloga ga sehlopha sa bo-128 sa Sekolo sa Beibele sa Watchtower sa Gilead. Bagwera, ditho tša malapa, le baeng ba tšwago dinageng tše 27 ba bile gona tiragalong ye.

“Barutiwa ba be ba ka se fo Dula ka Gae”

Bjalo ka modulasetulo, Ngwanabo rena Splane o ile a thoma lenaneo ka go ahla-ahla taelo ya Jesu, e rego: “Ka gona, e-yang le dire batho ba ditšhaba ka moka barutiwa.” (Mateo 28:19, 20) O ile a gatelela gore Jesu o ile a romela barutiwa ba gagwe bathong. Ke therešo gore ka Pentekoste ya 33 C.E., batho ba tšwago Mesopotamia, Afrika Lebowa le dikarolong tše dintši tša Mmušo wa Roma ba ile ba tla Jerusalema gomme ba kwa ditaba tše dibotse. Lega go le bjalo, o boletše gore “barutiwa ba be ba ka se fo dula ka gae gomme ba letela gore batho ba tšwago ditšhabeng ba tle go bona. Ba be ba swanetše go fihla karolong ya kgole ya lefase ba nyaka batho.”—Ditiro 1:8.

Ngwanabo rena Splane o itše: “Jesu ga se a botša barutiwa ba gagwe seo ba swanetšego go se dira feela. O ba bontšhitše le kamoo ba swanetšego go se dira ka gona. Ga se a fo ba botša gore ba rapele; o ba rutile kamoo ba swanetšego go rapela ka gona. Ga se a fo ba botša gore ba dire modiro wa boboledi; o ba bontšhitše gore ba o dire bjang. Ga se a fo ba botša gore e be barutiši ba babotse; o ba bontšhitše mekgwa e mebotse le e šomago ya go ruta.”

A bolela le batswadi ba dialoga, modula-setulo o ile a tsopola kgonthišetšo yeo Jesu a e boditšego barutiwa ba gagwe, e rego: “Bonang! Ke na le lena matšatši ka moka go fihla bofelong bja tshepedišo ya dilo.” (Mateo 28:20) Ngwanabo rena Splane o ile a kgonthišetša batheetši gore Jesu o tla tšwela pele a hlokomela dialoga dikabelong tša tšona dinageng dišele.

‘Ikgantšheng ka Jehofa’

Anthony Morris wa Sehlopha se Bušago o ile a kgothaletša klase a re ‘ikgantšheng ka Jehofa.’ O itše go na le mokgwa o nepagetšego le wo o fošagetšego wa go ikgantšha. Mokgwa o fošagetšego wa go ikgantšha o akaretša go ikgodiša. Mokgwa o nepagetšego wa go ikgodiša o hlaloswa go 1 Bakorinthe 1:31, e rego: “Yo a ikgantšhago, a ikgantšhe ka Jehofa.” Ngwanabo rena Morris o itše: “Seo ke selo seo re ka ikgantšhago ka sona—go lemoga le go tseba Jehofa Modimo. Ge e le gabotse, tokelo ya lena e kgolo—le ya-ka—ke go rwala leina leo, go ba yo mongwe wa Dihlatse tša Jehofa.”—Jeremia 9:24.

Seboledi ke moka se ile sa gatelela bohlokwa bja go dira gore leina la Jehofa le tsebje ka go bolela ka phihlelo ya moromiwa yo a lego Afrika. Moromiwa yoo gotee le mosadi wa gagwe, ba be ba e-ya go nea polelo e theilwego Beibeleng. Ge ba fihla lefelong la go phuruphutša, lešole la mofsa le ile la šupa ngwanabo rena ka sethunya gomme la mmotšiša gore ke mang. Mosadi wa gagwe, yo a ilego a gopola tlwaetšo ya Gilead, o ile a sekamela go monna wa gagwe a mo sebela a re, “Mmotše gore o yo mongwe wa Dihlatse tša Jehofa le gore o ya go nea polelo e theilwego Beibeleng.” O ile a diriša keletšo ya mosadi wa gagwe, gomme ba ile ba dumelelwa  go feta. Letšatšing le le latelago, balekane bao ba ile ba kwa radiong gore mopresidente o boditše mašole a gagwe gore a nyake babolai bao ba ipitšago baromiwa! Ka go itsebiša e le Dihlatse tša Jehofa go e na le go itsebiša e le baromiwa, balekane ba ba ile ba efoga mathata a mantši. Ngwanabo rena Morris o ile a phetha polelo ya gagwe, ka go bolela gore: “Ge le fihla dikabelong tša lena, le ikgantšhe ka Jehofa. Le ikgantšhe ka sohle seo Jehofa a tlago go se dira ge a le diriša go itagafatša ka mo go sa felego.”

“Na le tla Phetha Kabelo ya Lena?”

Geoffrey Jackson, setho sa Sehlopha se Bušago le yoo e kilego ya ba moromiwa, o ile a thuša dialoga go naganišiša ka potšišo e lego ka mo godimo. O ile a botšiša gore, “Ge re re motho ke moromiwa re ra go re’ng?” O ile a hlalosa gore lentšu “moromiwa” le tšwa polelwaneng ya Selatine yeo e šupago go motho goba go sehlopha seo se neilwego kabelo e kgethegilego. Bjalo ka Dihlatse tša Jehofa, thomo ya rena ke go ruta ditaba tše dibotse le go thuša batho moyeng. Re dira modiro wo re ekiša Jesu Kriste, yo ka mehla a ilego a dula a gopola kabelo ya gagwe ya lefaseng. Jesu o boditše Mmušiši wa Moroma Pontio Pilato, gore: “Ke sona se ke se tletšego lefaseng, gore ke hlatsele therešo.”—Johane 18:37.

Seboledi se ile sa thuša klase go nagana ka pego ya Beibele ya ntwa ya Jeriko. Ka matšatši a tshelelago madira a Isiraele a ile a tsoga ka masa, a apara ditlhamo, a dikologa Jeriko gomme a boela gae. Seboledi se itše: “Go ya ka pono ya batho, modiro wa bona o be o sa bontšhe bohlale e bile o se wa tlwaelega.” Se boletše gore madira a mangwe a ka ba a ile a nagana gore, ‘Ke go itshenyetša nako.’ Lega go le bjalo, ka letšatši la bošupa Baisiraele ba ile ba laelwa go dikologa motse gašupa, ka morago ba ile ba gobela koša ya ntwa. Go ile gwa direga’ng? Merako ya Jeriko e ile ya wa!—Jošua 6:13-15, 20.

Ngwanabo rena Jackson o ile a ntšha dithuto tše nne pegong ya Jeriko. (1) Go kwa go bohlokwa. Re swanetše go dira dilo ka tsela ya Jehofa, re se ke ra nagana gore tsela ya rena ke e kaone. (2) Go dumela go Jehofa le go mmota go bohlokwa. “Ka tumelo merako ya Jeriko e ile ya wa,” e sego ka go pšhatlwa ka dithula-merako. (Baheberu 11:30) (3) Re swanetše go se fele pelo. Ge nako e dutše e feta, tšhegofatšo ya Jehofa e “tlo Xo fihlêla.” (Doiteronomio 28:2) (4) O se ke wa langwa. O se ke wa lebala kabelo ya gago. Ngwanabo rena Jackson o ile a akaretša polelo ya gagwe ka go bolela gore, “Ge le ka dula le gopola dintlha tšeo, le tla phetha kabelo ya lena ya go reta le go godiša Jehofa.”

Dintlha tše Dingwe tše Kgolo tša Lenaneo

“Rata Beibele le Mongwadi wa Yona.” Seo ke sehlogo sa polelo yeo e beilwego ke Maxwell Lloyd, setho sa Komiti ya Lekala la United States. O ile a botša klase gore, “Beibele e swanetše go ba puku e phelago go wena.” Ke moka o ile a ba kgothatša ka gore: Le ka mohla le se ke la dumelela lerato leo le ratago Jehofa Modimo ka lona le e-hwa. Le se ke la letela gore motho yo mongwe le yo mongwe a kwešiše seo le se rutago. Ithuteng go nolofatša ditherešo tša Beibele e le gore seo le se rutago se fihle pelong ya morutwana. Ikokobetšeng. Le se ke la itšweletša le e-na le tsebo e phagamego. Rutang ka mohlala. Eka barutwana ba lena ba ka bona kamoo le ratago Beibele ka gona.

‘Elang Hloko Magokobu.’ Michael Burnett, mohlahli wa sekolo sa Gilead yo e kilego ya ba moromiwa, o ile a nea polelo e nago le sehlogo seo se lego ka mo godimo. O ile a re ka dinako tše dingwe re tlo tshwenyega. Eupša gopolang keletšo ya Jesu, e rego: “Elang hloko gore magokobu ga a bjale peu goba go buna, . . . fela Modimo o a a fepa.” (Luka 12:24) Go ya ka kgwerano ya Molao, magokobu ga se a hlweka, ga a swanela go jewa. A be a swanetše go ilwa. (Lefitiko 11:13, 15) Go sa šetšwe gore a bjang, Modimo o a a fepa. Ngwanabo rena Burnett o itše: “Ge e ba le lebeletšana le dipelaelo nakong e tlago, le nagane ka magokobu. Ge e ba Modimo a hlokomela nonyana e sa hlwekago le e ilwago, ruri lena bao le hlwekilego mahlong a gagwe o tla le hlokomela le go feta.”

“Ga ke go Fošetše.” Mark Noumair, mohlahli yo mongwe wa sekolo sa Gilead, o ile a thuša  bohle go hlahloba seswantšho seo Jesu a se dirišitšego sa bašomi tšhemong ya merara. Bašomi ba bangwe ba šomile letšatši ka moka. Ba bangwe ba šomile iri feela. Lega go le bjalo, ka moka ba ile ba hwetša moputso o lekanago! Bao ba šomilego nako e telele ba ile ba thoma go ngunanguna. Go bao ba bego ba ngunanguna, mong-tšhemo o itše: ‘Ga ke le fošetše. Le dumelelane le nna ka tenariase, na ga go bjalo? Tšeang se e lego sa lena le sepele.’ (Mateo 20:13, 14) Re ithuta’ng? O se ke wa ipapetša le ba bangwe. Ngwanabo rena Noumair o itše: “Go ipapetša le ba bangwe ka tsela e fošagetšego go tla go amoga lethabo. Go feta moo, go ka dira gore o tlogele kabelo ya gago, o tlogele tirelo e bohlokwa yeo o e abetšwego.” Seboledi se ile sa gopotša klase gore Jesu o hlahla modiro wa puno ya moya mehleng ye ya rena gomme a ka dira se sengwe le se sengwe seo a se ratago ka balatedi ba gagwe. Ge e ba Jehofa le Jesu ba kgetha go direla ba bangwe selo se se oketšegilego, ga ba go fošetše. Lebiša tlhokomelo dilong tša gago, gomme o se ke wa dumelela “moputso” wa ba bangwe o go tloša modirong woo Jehofa a go neilego wona.

Diphihlelo le Dipoledišano

Ge barutwana ba Gilead ba se ka klaseng goba ba sa dire mešomo ya gae, ba ba gotee le diphuthego tša kgaufsi tša Dihlatse tša Jehofa modirong wa go ruta phatlalatša. Sam Roberson yo mongwe wa bahlahli ba Gilead, o ile a boledišana le barutwana ba mmalwa mabapi le diphihlelo tša bona. Ka mohlala, Kgaetšedi Alessandra Kirchler o ile a kopana le mosadi yo a bego a tshwenyegile kudu ka mokgwa wa morwa wa gagwe wa go kgoga. Kgaetšedi Alessandra ka morago o ile a tla le Phafoga! e bolelago ka taba yeo. Go be go se motho ka gae, lega go le bjalo o ile a tlogela kgatišo yeo. Mafelelong, Alessandra o ile a hwetša mosadi yoo ka gae gomme a kgopelwa gore a tsene ka ntlong. Mosadi yoo o ile a leboga kgatišo yeo gomme a re: “Ke gantši ke ipotšiša gore Modimo o nyaka go nthuta’ng ka diteko tšeo a nneago tšona.” Alessandra o ile a mmontšha go tšwa Beibeleng gore Modimo ga a re bakele bobe. (Jakobo 1:13) Ga bjale mosadi yo le morwa wa gagwe ba thabela go ithuta Beibele.

Melvin Jones wa Lefapha la tša Tirelo o ile a boledišana le dialoga tše tharo tša nakong e fetilego tša Gilead: Jon Sommerud, yo a hlankelago Albania; Mark Anderson, yo a hlankelago Kenya; le James Hinderer, yo a hlankela Lefapheng la Dikolo tša Pušo ya Modimo. Boraro bja bona bo ile bja dumela gore Gilead ga e rute barutwana ba ditherešo tša Beibele tša motheo feela eupša e ba ruta le kamoo ba ka dirišago ditherešo tšeo, go sa šetšwe gore barutwana bao ke bomang goba gore ba hlankela kae.

Ke moka yo mongwe wa barutwana o ile a bala lengwalo la ditebogo leo le kgomago pelo. John Barr, wa nywaga e 96, setho seo se tšofetšego go ba feta sa Sehlopha se Bušago, o ile a phetha lenaneo ka thapelo, a kgopela Jehofa go šegofatša modiro wa klase ya bo-128 ya Gilead.

 [Tšhate/Mmapa go letlakala 31]

DIPALO-PALO TŠA SEHLOPHA

8 dinaga tše di emetšwego

54 barutwana

27 banyalani

35,2 palo-gare ya nywaga

19,1 palo-gare ya nywaga ba kolobeditšwe

13,8 palo-gare ya nywaga bodireding bja nako e tletšego

[Mmapa]

(Bakeng sa mongwalo o beakantšwego ka mokgwa wa kgatišo, bona kgatišo ka boyona)

Sehlopha se abetšwe dinageng tše 25 tšeo di bontšhitšwego ka mo tlase:

DIKABELO TŠA BOROMIWA

ALBANIA

ARUBA

BOLIVIA

CAMBODIA

CÔTE D’IVOIRE

DOMINICAN REPUBLIC

ECUADOR

GHANA

GUATEMALA

GUINEA

GUYANA

HONDURAS

INDONESIA

KOSOVO

LATVIA

LIBERIA

MADAGASCAR

MONGOLIA

NAMIBIA

NICARAGUA

PARAGUAY

ROMANIA

RWANDA

SERBIA

TAIWAN

(KABELO YEO E HLOKOMETŠWEGO KE LEKALA LA AUSTRALIA)

[Seswantšho go letlakala 30]

Barutwana ba Gilead ba diragatša e nngwe ya diphihlelo tša bona tša modiro wa boboledi

[Seswantšho go letlakala 31]

Sehlopha se se Alogago sa bo-128 sa Sekolo sa Beibele sa Watchtower sa Gilead

Lelokelelong le le lego ka mo tlase, methaladi e balwa go tloga ka pele go ya ka morago, gomme maina a lokeleditšwe go tloga ka go le letshadi go ya ka go le letona mothalading o mongwe le o mongwe.

(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.

(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.

(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.

(4) Harada, H.; Lindström, A; Orsini, E.; Logue, D.; Missud, T.; Bergeron, S.; Camacho, G.; Ward, T.

(5) Kirchler, W.; Nguyen, H.; Kremer, E.; Burgaud, C.; Titmas; De Dios, C.; Rodríguez, A.; Waddington, M.

(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.

(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.