Bibele e Fetoša Maphelo

MOTSWADI yo a sego lenyalong wa Russia yo a bego a lemaletše dihlaretagi o kgonne bjang go fenya mokgwa woo le go kaonefatša tswalano ya gagwe le bana ba gagwe? Monna yo a se nago legae yo a bego a dula Kyoto, Japane, o hweditše bjang matla le sebete sa go fenya bofokodi bja gagwe bjoo bo dirilego gore a diile? Ke’ng seo se thušitšego modiši (cowboy) wa kua Australia gore a tlogele mokgwa wa go nwa ka mo go feteletšego? Ela hloko seo batho ba ba se bolelago.

“Ke ithutile gore ke gapeletšega go itlhokomela.”—NELLY BAYMATOVA

NYWAGA: 45

NAGA: RUSSIA

BOPHELO BJA PELE E E-BA MOKRISTE: MOLEMALEDI WA DIHLARE-TAGI

BOPHELO BJA-KA BJA NAKONG E FETILEGO: Ke goletše Vladikavkaz, motse-mošate wa Repabliki ya Ossetia Leboa (ga bjale e bitšwa Alania). Lapa lešo le be le humile. Eupša go sa šetšwe go kgona go fihlelela dilo tše di bonagalago, bophelo bja-ka bo be bo sa thabiše. Ge ke be ke e-na le nywaga 34, ke be ke šetše ke bile manyalong a mabedi ao a sa atlegago. Ke be ke e-na le nywaga e lesome ke lemaletše dihlare-tagi, moo ke ilego ka ya go alafša gabedi kliniking. Gaešita le ge ke be ke e-na le bana ba babedi, ka nako yeo ke be ke sa ba rate; e bile ke be ke se na segwera seo se tlwaelegilego le bagwera ba-ka goba ba lapa.

Mma o be a fetogile yo mongwe wa Dihlatse tša Jehofa gomme gantši ke be ke mo kwa a lla ka baka la-ka, a kgopela Jehofa gore a nthuše. Ke ile ka nagana gore: ‘Ruri mma ga a kwešiše! Jehofa a ka nthuša bjang?’ Ke ile ka leka go tlogela dihlare-tagi. Eupša ke be ke se na matla a go tlogela mokgwa wo ka bo-nna. Lebakeng le lengwe, ke ile ka fetša matšatši a mabedi ke sa diriše dihlare-tagi. Ke moka ke ile ka dira phetho ya gore ke swanetše go tšwa ka ntlong, gomme ke ile ka tšwa ka lefasetere. Ka manyami, ke be ke le lebatong la bobedi la ntlo yeo. Ke ile ka wa ka robega letsogo le leoto gomme ka gobala mokokotlo. Ke ile ka swanelwa ke go robala lebaka la ka godimo ga kgwedi.

Nakong ya ge ke be ke fola, mma o be a ntlhokomela gomme ga se a ka a nthoga. O be a kwešiša gore ke be ke sa kgone go laola maikwelo a-ka le boemo bja-ka bja monagano. Lega go le bjalo, o ile a tlogela dimakasine tša Phafoga! * kgaufsi le malao a-ka. Ke ile ka di bala ka e tee ka e tee gomme ka hwetša di kgahliša e bile di ruta. Ke moka ke ile ka dira phetho ya go ithuta Beibele le Dihlatse tša Jehofa.

KAMOO BEIBELE E FETOTŠEGO BOPHELO BJA-KA: Selo setee seo Beibele e nthutilego sona ke boikarabelo. Go e-na le go letela gore mma a ntlhokomele, ke ile ka ithuta gore ke tlamegile go itlhokomela le go hlokomela bana ba-ka ka tša ditšhelete. Ka morago ga go fetša nako e telele  ke dira seo ke bego ke nyaka go se dira, go tlwaela go ba le mošomo wa ka mehla go be go se bonolo.

Le gona ke ile ka thušwa ke keletšo yeo e lego go Doiteronomio 6:5-7, yeo e botšago batswadi gore ba rute bana ba bona ka Modimo. Ke ile ka lemoga gore ke be ke ikarabela go Modimo bakeng sa tsela yeo ke bego ke godiša bana ba-ka ba babedi ka yona. Ntlha yeo e ile ya ntutueletša go thoma go fetša nako e ntši le bona gotee le go hlagolela lerato le le swanetšego.

Ke ile ka ikwa ke leboga ka mo go tseneletšego gore Jehofa o ntumeletše gore ke ithute therešo ka yena. Ka gona, ke neetše bophelo bja-ka go yena gomme ka kolobetšwa gore ke be yo mongwe wa Dihlatse tša Jehofa.

KAMOO KE ILEGO KA HOLEGA KA GONA: Ka ge ke ithutile go laola kgalefo ya-ka, tswalano ya-ka le mma e ile ya kaonefala. Tswalano ya-ka le bana ba-ka le yona e kaonafetše.

Ka ge ke hlagoletše go hloya dilo tšeo di bontšhago go se boife Modimo, bontši bja mathata a-ka ao a bakilwego ke bophelo bjoo ke bego ke bo phela pele a fedile. Ga bjale ke thabišwa kudu ke go thuša ba bangwe gore ba ithute therešo ka Modimo wa rena yo lerato Jehofa.

“Ke lemoga gore bophelo bja-ka bo phološitšwe e le ka kgonthe.”—MINORU TAKEDA

NYWAGA: 54

NAGA: JAPANE

BOPHELO BJA PELE E E-BA MOKRISTE: O BE A PHELA DITARATENG

BOPHELO BJA-KA BJA NAKONG E FETILEGO: Ke godišitšwe ke tate le makgolo motseng wa Yamaguchi. Ga ke tsebe mma. Ge ke be ke e-na le nywaga e 19, makgolo o ile a hwa gomme ke ile ka tšwela pele ke dula le tate. Ke be ke šoma mošomo wa go apea, gomme tate le yena o be a šoma intasetering ya dijo. Re be re šoma dinakong tše sa swanego, ka gona re be re sa bonane gantši. Ke ile ka ba le mokgwa wa go šoma diiri tše ditelele le go nwa le bagwera ba-ka.

Ge nako e dutše e e-ya, ke ile ka se sa thabela mošomo wa-ka. Ke ile ka lwa le mong-mošomo gomme ka thoma go nwa ka mo go feteletšego. Mafelelong, ge ke e-na le nywaga e 20, ke ile ka dira phetho ya gore ke tloge gae gomme ka ba mosepedi. Ge tšhelete ya-ka e fela, ke ile ka thoma go šoma ka lefelong la go bapalela pachinko (go petšha). Ke ile ka gahlana le mosetsana yo mongwe gomme ra nyalana. Eupša re ile ra arogana ka morago ga nywaga e mebedi le seripa.

Ke be ke gateletšegile e bile ke se na mafolofolo gomme ka feleletša ke kolota baadimiši ba tšhelete. Ke ile ka tšhabela balati ba tšhelete gomme ka dula nakwana le tate motseng wa gešo, eupša ke ile ka mmotša maaka gomme ka senya tswalano ya rena. Ke ile ka tšea tšhelete ya gagwe gomme ka phelela go petšha. Mafelelong, ke ile ka diila gomme ka phela seteišeneng sa ditimela ka nakwana. Ke ile ka hudugela Hakata, ke moka ka ya Himeji gomme mafelelong ka ya motseng wa Kyoto. Ke feditše nywaga e mmalwa ke phela ditarateng.

KAMOO BEIBELE E FETOTŠEGO BOPHELO BJA-KA: Ka 1999, ke be ke le phakeng kgaufsi le Noka ya Kamogawa kua Kyoto ge basadi ba babedi ba mpatamela. Yo mongwe wa bona o ile a botšiša a re, “Na o ka rata go ithuta Beibele?” Ke ile ka dumela. Bakriste ba godilego ka tsebo ba phuthego ya kgaufsi ya Dihlatse tša Jehofa ba ile ba ithuta  Beibele le nna gomme ba nthuša go bona bohlokwa bja go diriša melao ya yona ya motheo. Ba ile ba šišinya gore ke leke go hwetša mošomo le lefelo la go dula. Go ba kgahliša, ke ile ka ya go hlahlobelwa mošomo mafelong a mmalwa, eupša mathomong ke be ke sa leke ka thata. Lega go le bjalo, ka morago ke ile ka thoma go kgopela thušo ka thapelo gomme ka katanela go hwetša mošomo, woo mafelelong ke ilego ka o hwetša.

Le gona, thapelo e ile ya nthuša ge ke be ke lebeletšane le teko e thata. Baadimiši ba tšhelete bao ke ba tšhabetšego ba ile ba nkhwetša gomme ba nyaka tšhelete ya bona. Ke ile ka gateletšega kudu. Ke moka, mmalong wa-ka wa letšatši le letšatši wa Beibele ke ile ka hwetša lengwalo la Jesaya 41:10 (NW). Temaneng yeo, Modimo o holofeditše bahlanka ba gagwe ba botegago ka gore: “Ruri ke tla go thuša.” Kholofetšo yeo e ile ya nnea matla le sebete. Ke ile ka šoma ka thata gomme mafelelong ke ile ka rarolla mathata a-ka a tša ditšhelete. Ka 2000, ke ile swanelegela go kolobetšwa bjalo ka yo mongwe wa Dihlatse tša Jehofa.

KAMOO KE ILEGO KA HOLEGA KA GONA: Seo ke ithutilego sona Beibeleng se ile sa ntira gore ke leke go lokiša tswalano ya-ka le tate, gomme o ile a ntebalela dilo tšeo ke mo dirilego tšona nakong e fetilego. O be a thabetše gore ke ithutile go phela ka ditekanyetšo tša Modimo. Ke nagana gore bophelo bja-ka bo phološitšwe ka gobane ke ile ka thoma go phela ka melao ya motheo ya Beibele.

Go tlaleletša moo, ke kgona go šoma e le gore ke itlhokomele ka dilo tše di bonagalago. (Baefeso 4:28; 2 Bathesalonika 3:12) Le gona, ke hweditše bagwera ba kgonthe ka phuthegong ya Bokriste. (Mareka 10:29, 30) Ke leboga Jehofa e le ruri ka seo a nthutilego sona.

“Go be go se bonolo go dira diphetogo tšeo di bego di nyakega.”—DAVID HUDSON

NYWAGA: 72

NAGA: AUSTRALIA

BOPHELO BJA PELE E E-BA MOKRISTE: GO NWA KA MO GO FETELETŠEGO

BOPHELO BJA-KA BJA NAKONG E FETILEGO: Ke ngwana wa bo-11 wa batswadi ba-ka, e lego Willie le Lucy. Lapa lešo le be le dula motseng wa Badudi ba setlogo o bitšwago Aurukun, wo o lego karolong ya kgole ya leboa la Queensland. Motse wa Aurukun o be o agilwe khwiting ya Noka e bogegago ya Archer e bile o le kgaufsi le lewatle. Batswadi ba-ka ba re rutile go tsoma le go rea dihlapi e le gore re kgone go tšwela pele re kgone go iphediša. Ka nako yeo, rena Badudi ba setlogo re be re le ka tlase ga molao wa mmušo wo o bego o re iletša go swara tšhelete, gomme re be re gapeletšwa go dula karolong e itšego feela ya naga.

Batswadi ba-ka ba ile ba dira sohle seo ba se kgonago go nthuta dika tše dibotse le go ruta bana ba bona ka moka go hlompha batho ba bagolo motseng le go abelana le ba bangwe bonyenyane bjoo re nago le bjona. Ka baka leo, re be re lebelela batho ba bagolo ka moka e le bo-mma le bo-tatago rena le bo-malome le bo-mmane ba rena.

Tate o ile a hwa ge ke be ke e-na le nywaga e šupago,  gomme re ile ra hudugela legaeng la baromiwa la Badudi ba setlogo la kua Mapoon, yeo e lego mo e ka bago dikhilomithara tše 150 ka leboa la Aurukun. Ge ke be ke e-na le nywaga e 12, ke ile ka thoma go ithuta go šoma ka dipere le dikgomo, gomme ke ile ka šoma merakeng e mentši ya dikgomo ke le modiši go ba go fihla ge ke e-na le nywaga e 40. Bophelo bo be bo le thata. Ke be ke e-nwa kudu le gona gantši. Seo se ile sa dira gore ke opše ke hlogo gantši le go oketša mathata a-ka.

Lebakeng le lengwe ka morago ga go nwa ka mo go feteletšego, ke ile ka tšwa ka hoteleng ke thekesela gomme ka tsena tseleng yeo go bego go e-na le koloi e kitimago kudu. Ke ile ka fetša nywaga e mebedi e latetšego ke thušwa go boela sekeng—gomme mošomo wa-ka wa go diša e ile ya ba gona ge o fedile.

KAMOO BEIBELE E FETOTŠEGO BOPHELO BJA-KA: Ge ke be ke sa thušwa go boela sekeng, mogwera wa-ka wa mosadi o ile a ntlišetša dimakasine tša Morokami le Phafoga! gore ke šale ke bala. Lega go le bjalo, ke be ke se ka fihla kgole ka sekolo, ka go rialo ke be ke sa kgone go bala gabotse. Ke moka letšatšing le lengwe la go fiša, ke ile ka etelwa ke monna wa nywaga e 83. Ke ile ka mo laletša gore a tlo nwa meetse a go tonya. O ile a nnea dikgatišo tša Beibele gomme a botšiša ge e ba a ka boa gape go tlo ntlhalosetša dikagare tša tšona. Mafelelong, re ile ra thoma go ithuta Beibele ka mehla. Ke ile ka thoma go bona gore ke swanetše go dira diphetogo tše itšego semelong sa-ka le bophelong bja-ka ge e ba ke nyaka go kgahla Modimo.

Go be go se bonolo gore ke dire diphetogo tšeo di nyakegago. Lega go le bjalo, ka baka la thuto ya mma, ke be ke hlompha monna yo ke bego ke ithuta le yena Beibele e bile ke hlompha le tsebo ya gagwe ya Beibele ye a bego a nnea yona. Lega go le bjalo, ke ile ka dika-dika go ineela go Modimo. Ke be ke ikwa ke nyaka go tseba dilo ka moka tšeo di ngwadilwego ka Beibeleng.

Lega go le bjalo, mošomi-gotee o ile a nthuša go fetoša kgopolo ya-ka tabeng ye. E be e le yo mongwe wa Dihlatse tša Jehofa, gomme o ile a re ke bale kgothatšo yeo e hwetšwago go Bakolose 1:9, 10. Ditemana tšeo di re go nyakega gore re tšwele pele re “gola tsebong e nepagetšego ya Modimo.” Mošomi-gotee o ile a nthuša go kwešiša gore ke tlo dula ke ithuta dilo tše difsa, ka gona ke be ke se na lebaka la go dumelela tsebo ya-ka e nyenyane e dira gore ke dika-dike.

Ke ile ka kgahlega kudu ge ke be ke thoma go kopanela le Dihlatse tša Jehofa. Ke bone ka bo-nna batho bao ba tšwago ditlogong tše sa swanego ba rapela Modimo e le batee. Botee bjoo bo ile bja nkgodiša gore ke hweditše bodumedi bja therešo, ka gona ka 1985, ke ile ka kolobetšwa bjalo ka yo mongwe wa Dihlatse tša Jehofa.

KAMOO KE ILEGO KA HOLEGA KA GONA: Mokgwa wa-ka wa go bala o ile wa kaonefala gomme ga bjale ke fetša diiri tše dintši beke e nngwe le e nngwe ke thuša ba bangwe gore ba kgone go bala le go ithuta Beibele. Go tlaleletša moo, mogwera wa-ka wa mosadi yo a ilego a ntlišetša dimakasine tša Morokami le Phafoga! le yena o ile a ithuta le Dihlatse, a kolobetšwa gomme ga bjale ke mosadi wa-ka yo a rategago. Bobedi bja rena re thabela go thuša ba bangwe motseng wa Badudi ba setlogo go ithuta ka Jehofa Modimo.

[Mongwalo wa tlase]

[Ntlhakgolo go letlakala 21]

Nna le mosadi wa-ka re thabela go thuša ba bangwe motseng wa Badudi ba setlogo go ithuta ka Jehofa Modimo