Dipotšišo tše Nne Mabapi le Bofelo di a Arabja

JESU KRISTE o boletše e sa le pele gore, ‘bofelo bo tla tla’ nakong e tlago. Ge a hlalosa nako yeo, o itše: “Ka nako yeo go tla ba le masetlapelo a magolo a sa kago a ba gona ga e sa le go tloga mathomong a lefase go ba go fihla gona bjale, aowa, le go ba gona a ka se sa ba gona gape.”—Mateo 24:14, 21.

Mantšu a Jesu a mabapi le bofelo gotee le ditemana tše dingwe tša Beibele tšeo di bolelago le bjona, di tsoša dipotšišo tše mmalwa tše bohlokwa. O re’ng o sa bule Beibele ya gago gomme o bale seo e se bolelago ge e araba dipotšišo tšeo?

1 Ke’ng Seo se Tlago go Fedišwa?

Beibele ga e rute gore polanete ya rena e tla fedišwa. Mopsalme o ngwadile gore: “Lefase, methêô ya lôna [Modimo] O e theile wa xo se šišinyêxe neng le neng.” (Psalme 104:5) Le gona, Beibele ga e rute gore diphedi ka moka mo lefaseng di tla fedišwa ka mollo o mogolo. (Jesaya 45:18) Jesu ka boyena o bontšhitše gore go na le batho ba itšego bao ba tlago go phologa bofelo. (Mateo 24:21, 22) Bjale, ke’ng seo Beibele e rego se tlo fedišwa?

Mebušo ya batho e paletšwego e tla fedišwa. Modimo o buduletše moporofeta Daniele go ngwala gore: “Modimo [o] tl’o . . . tsoša mmušô wo o ka se kexo wa šwalalanywa neng le neng, wo o ka se kexo wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”—Daniele 2:44.

Ntwa le tšhilafalo di tla fedišwa. Ge e hlalosa seo Modimo a tlago go se dira, Psalme 46:9 e re: “Mo-fediša-dintwa xo fihla mafelong a lefase, Mo-rôbaka-mará, Mo-thokxa-marumô, Mo-thšuma-dikôtsê-ka-mollô!” Beibele gape e ruta gore Modimo o tla “senya bao ba senyago lefase.”—Kutollo 11:18.

Bosenyi le go hloka toka di tla fela. Lentšu la Modimo le holofetša ka gore: “Ba ba tl’o xo dula mo naxeng, ké baloki; ba ba tl’o xo šala bà le xôna, ké bôná ba-ila-bokxôpô. Ba babe ba tlo  fedišwa naxeng; bakxeloxi ba tlo rakwa mo xo yôna.” *—Diema 2:21, 22.

2 Bofelo bo tla tla Neng?

Go na le “nako e beilwego” ke Jehofa Modimo ya go fediša bokgopo le go hloma pušo ya gagwe ya Mmušo. (Mareka 13:33) Eupša Beibele e bontšha thwii gore re ka se kgone go balela letšatši-kgwedi le le lebanyago leo bofelo bo tlago go tla ka lona. Jesu o itše: “Ge e le mabapi le letšatši leo le iri ga go na yo a tsebago, gaešita le barongwa ba magodimo le ge e le Morwa ga ba tsebe, eupša ke Tate feela a tsebago.” (Mateo 24:36) Lega go le bjalo, Jesu le barutiwa ba gagwe ba ile ba bolela e sa le pele gore maemo mo lefaseng a be a tla ba bjang pele ga ge Modimo a tliša bofelo. Bofelo bo ba kgaufsi ge ditiragalo tše di latelago ka moka di direga ka nako e tee le gona lefaseng ka bophara.

Khuduego ya dipolitiki, ya maemo a lefase le ya ditšhaba e direga kudu go feta le ga e le neng historing. Ge a araba potšišo ya barutiwa ba gagwe ya mabapi le bofelo, Jesu o itše: “Setšhaba se tla tsogela setšhaba gomme mmušo wa tsogela mmušo, go tla ba le ditšhišinyego lefelong le lengwe ka morago ga le lengwe, go tla ba le tlhaelelo ya dijo. Tše ke mathomo a dihlabi tša tlalelo.” (Mareka 13:8) Moapostola Paulo o ngwadile gore: “Mehleng ya bofelo go tla ba le dinako tše di hlobaetšago tšeo go lego thata go lebeletšana le tšona. Gobane batho e tla ba baithati, barati ba tšhelete, ba go ipona, ba ikgogomošago, barogaki, ba go se kwe batswadi, ba go se leboge, ba go se botege, ba ba se nago maikwelo a borutho a tlhago, ba ba sa ikemišetšago go amogela tumelelano le ge e le efe, bathomeletši, ba se nago boitshwaro, ba bogale, ba go se rate go loka, baeki, ba hlogo-thata, ba tletšego boikgantšho, ba ratago maipshino go e-na le go rata Modimo.”—2 Timotheo 3:1-5.

Lesolo la lefase ka bophara leo le dirwago ka maleme a mantši la boboledi le a kgatlampana. Jesu o itše: “Ditaba tše tše dibotse tša mmušo di tla bolelwa lefaseng ka moka le go agilwego go lona gore e be bohlatse go ditšhaba tšohle; ke moka bofelo bo tla tla.”—Mateo 24:14.

3 Bofelo bo tla Latelwa ke Eng?

Beibele ga e rute gore batho ka moka ba lokilego ba tla tšewa mo lefaseng gomme ba išwa legodimong e le gore ba phele ka mo go sa felego. Go e na le moo, Jesu o rutile gore morero wa Modimo wa mathomong ka batho o tla phethagala. Jesu o itše: “Go thaba ba moya o boleta, ka ge ba tla ja bohwa bja lefase.” (Mateo 5:5; 6:9, 10) Bakeng sa bao ba hwago pele bofelo bja lefase bo e-tla, Beibele e na le kholofetšo ya tsogo ya bahu ya nakong e tlago. (Jobo 14:14, 15; Johane 5:28, 29) Bofelo bo tla latelwa ke eng?

A le legodimong, Jesu o tla buša e le Kgoši ya Mmušo wa Modimo. Moporofeta Daniele o ngwadile gore: “Ponong tšeo tsa bošexo ka bôna xò e-tla e mongwê ka maru a lexodimo e kexo ké Morwa-motho [Jesu yo a tsošitšwego bahung], a fihla xo Motála-wa-mabaka [Jehofa Modimo], a tlišwa kxaufsi pele xa xaxwe. [Jesu] a neêlwa boxoši le kxodišô le mmušô; dithšaba ka moka le merafô le maleme ya ba bahlanka ba xaxwe. Boxoši bya xaxwe ké bya neng le neng, ké byo bo sa felexo; mmušô wa xaxwe o ka se kê wa senyêxa.”—Daniele 7:13, 14; Luka 1:31, 32; Johane 3:13-16.

Balata ba Mmušo wa Modimo ba tla ba le boemo bjo bo phethagetšego bja tša maphelo, polokego e swarelelago le bophelo bjo bo sa felego. Moporofeta Jesaya o ngwadile gore: “Nywakô ye ba e axaxo ba tlo dula mo xo yôna; dirapa tša merara ba tlo lema ba ja kenyô tša tšôna. Ba ka se kê ba axa, xwa dula o šele; ba ka se kê ba lema xwa ja o šele.” (Jesaya 65:21-23) Moapostola Johane o ngwadile mabapi le nako  yeo gore: “Bonang! Tente ya Modimo e go batho, o tla dula le bona gomme e tla ba batho ba gagwe. Modimo ka noši o tla ba le bona. O tla phumola megokgo ka moka mahlong a bona, gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”—Kutollo 21:3, 4.

4 O Swanetše go Dira’ng Gore o Phologe Bofelo?

Moapostola Petro o boletše gore batho ba bangwe bao ba phelago mehleng ya bofelo ba tla kwera kgopolo ya gore Modimo o tla tsena ditaba tša batho gare gomme a fediša bokgopo lefaseng. (2 Petro 3:3, 4) Lega go le bjalo, Petro o kgothaletša bao ba phelago mehleng ya rena gore ba gate megato e latelago.

Ithute dilong tša nakong e fetilego. Petro o ngwadile gore, Modimo “ga se a ka a lesa go otla lefase la bogologolo, eupša a lota Noa mmoledi wa toko le ba bangwe ba šupago ge a be a tliša meetse-fula lefaseng la batho ba go se boife Modimo.” (2 Petro 2:5) Ge a bolela mabapi le bakweri, Petro o itše: “Go ya ka go rata ga bona, ga ba kgone go lemoga taba ye ya gore go kile gwa ba le magodimo go tloga kgale le lefase le le tšwilego le bopagane meetseng le gare ga meetse ka lentšu la Modimo; gomme ka tšona lefase la nakong yeo le ile la  senywa ge le be le apešwa ke meetse. Eupša ka lona lentšu leo, magodimo le lefase * tše di lego gona, gona bjale di boloketšwe mollo gomme di lotetšwe letšatši la kahlolo le la tshenyego ya batho ba sa boifego Modimo.”—2 Petro 3:5-7.

Phela ka ditekanyetšo tša Modimo tša boitshwaro. Petro o ngwadile gore, bao ba nyakago go phologa bofelo ba tla dira ‘ditiro tše kgethwa tša boitshwaro le mediro ya boineelo go Modimo.’ (2 Petro 3:11) Ela hloko gore Petro o gatelela ‘ditiro tše kgethwa tša boitshwaro’ le ‘mediro ya boineelo go Modimo.’ Ka baka leo, go nyakega se se fetago go fo bolela gore re na le tumelo goba boiteko bja motsotso wa mafelelo bja go lokiša dilo le Modimo.

Ke ditiro le mediro efe yeo Modimo a e amogelago? O re’ng o sa bapiše seo o se tsebago le seo Beibele e se rutago ka taba ye? Dihlatse tša Jehofa di tla thabela go go thuša. Di kgopele gore di go bontšhe moo dikarabo tša tšona di theilwego gona ka Beibeleng ya gago. Go dira bjalo go ka go thuša go lebelela bokamoso ka sebete le kgodišego, go sa šetšwe dibaki tša poifo tšeo di re dikologilego.

[Mengwalo ya tlase]

[Ntlhakgolo go letlakala 7]

Lefase (polanete) le ka se fedišwe, eupša go tla fedišwa bao ba le senyago