Bota Jehofa Ruri o tla go Thuša

Ka ge go Anega Edmund Schmidt

Ge ke be ke tlo tšwelela pele ga kgoro ya tsheko kua New York ka October 1943, ke ile ka gopola keletšo yeo e lego ka mo godimo. Ge ke be ke e-ba le nywaga e 25, ke be ke šetše ke feditše mo e ka bago nywaga e mene ke le kgolegong ka baka la boemagare bja Bokriste. Go swana le balatedi ba Jesu ba lekgolong la pele la nywaga, ke be ke ikemišeditše “go kwa Modimo e le mmuši go e-na le batho.” (Ditiro 5:29) Eupša pele ke le anegela ka seo, e re ke hlalose gore go tlile bjang gore ke be le tumelo e tiilego go Modimo.

KE BELEGWE ka April 23, 1922, kua Cleveland, Ohio, U.S.A., ka phapošing ya rena yeo e lego lebatong la ka godimo ga lepaka la tate. Dikgwedi tše nne ka morago, tate, e lego Edmund, o ile a ya kopanong ya Barutwana ba Beibele (bjalo ka ge Dihlatse tša Jehofa di be di bitšwa bjalo ka nako yeo) kua Cedar Point, kgaufsi le Sandusky, mo e ka bago dikhilomithara tše e ka bago tše 160 go tloga legaeng la rena.

Kopanong yona yeo, batla-kopanong ba ile ba newa kgothatšo e rego “tsebatšang, tsebatšang, tsebatšang Kgoši [ya Modimo] le mmušo wa yona.” Sontaga seo se latetšego, tate o ile a thoma go tšea karolo modirong woo. O ile a tšwela pele a dira bjalo nywageng e 66 e latetšego, go fihlela lehung la gagwe ka July 4, 1988. Mma, e lego Mary, o ile a hwa a botegela Modimo ka 1981.

Go Tlatša Batswadi Ba-ka Borapeding

Lapa lešo le be le kopanela phuthegong ya Sepoliši kua Cleveland. Ka Mekibelo thapama, bontši bja rena ba banyenyane, re e-na le ba bagolo, re be re tšea karolo go boleleng ditaba tše dibotse ka ntlo le ntlo. Ka Disontaga, batswadi ba rena ba be ba thabela polelo e theilwego Beibeleng ka holong e kgolo ya lefelo leo re bego re kopanela go lona. Ka nako e swanago, morutiši wa Beibele yo a nago le phihlelo o be a swara thuto ya Beibele le ba e ka bago ba 30 ba banyenyane, a diriša puku ya go ithuta Beibele yeo e bitšwago The Harp of God. * Kgaufsinyane le nna ke be ke swara dithuto tša Beibele, tšeo di bilego le mafelelo a mabotse.

Ka July 1931, lapa lešo, leo ga bjale le bego le akaretša moratho wa-ka yo monyenyane Frank, le ile la ya kopanong e nngwe ya Barutwana ba Beibele, yeo nakong ye e bego e swaretšwe Columbus, mo e ka bago dikhilomithara tše 160 ka borwa. Ke gona moo Barutwana ba Beibele ba ilego ba amogela ka dipelo ka moka leina leo le theilwego Beibeleng la Dihlatse tša Jehofa. (Jesaya 43:10-12)  Nakong yona yeo, ke ile ka tšea karolo bodireding bja phatlalatša, ke laletša batho go tlo theetša polelo ya J. F. Rutherford, yoo nakong yeo a bego a etelela pele modiro wa Dihlatse tša Jehofa. Nywaga e fetago e 79 ga e sa le go tloga ka nako yeo, ke be ke dutše ke hlankela Jehofa Modimo le batho ba gagwe.

Dinako tše Thata le Bodiredi bjo bo Putsago

Ka 1933 go ile gwa ba le Kgatelelo e Kgolo lefaseng ka bophara. Kua United States, batho ba ka godimo ga dimilione tše 15, goba kotara ya bašomi, ba be ba se na mošomo. Metse e be e se na tšhelete e bile go se na ditirelo tša go thuša badiidi. Lega go le bjalo, bana babo rena le dikgaetšedi ba Bakriste ba be ba thušana. Ka Disontaga, lapa lešo le be le tšea senkgwa le dikuku go tšwa lepakeng la gešo le e-ya le tšona moo re bego re kopanela gona e le gore le di abelane le ba bangwe. Tšhelete yeo e bego e šetše ka morago ga gore go lefelelwe ditshenyagalelo tša kgwedi, Tate o be a e romela ntlong-kgolo ya Dihlatse tša Jehofa kua Brooklyn, New York. O be a tseba gore tšhelete ye e be e tla dirišetšwa go thuša go gatiša dipuku tša Beibele.

Nywageng yona yeo, kgašo ya radio e be e kgatha tema e kgolo bodireding bja rena. Diteišene tša ka godimo ga tše 400 di be di gaša dipolelo tša Beibele tšeo di bego di neelwa dikopanong tša rena. Ka bo-1930, Dihlatse di ile tša tšweletša dikeramafomo le direkhoto feketoring ya tšona ya Brooklyn. Re be re di diriša bodireding gomme re bega gore re bapetše dipolelo tša Beibele gakae go bao e sego Dihlatse le gore ke batho ba bakae bao ba ilego ba di theetša.

Ka 1933, Adolf Hitler le mokgatlo wa Nazi ba ile ba ba matleng a taolo kua Jeremane. Dihlatse tša Jehofa moo di be di tlaišwa o šoro ka baka la boema-gare bja tšona bja Bokriste. (Johane 15:19; 17:14) Ka baka la go gana go tšea karolo medirong ya tša dipolitiki goba go bolela gore phološo e tšwa go Hitler, bontši bja Dihlatse kua Jeremane bo ile bja romelwa dikgolegong goba dikampeng tša tshwenyo. Ba bantši ba ile ba bolawa; ba bangwe ba šomišwa wa go hwa. Ka baka la tshwaro ye e mpe, ba bantši ba ile ba hwa ka moragonyana ga ge ba lokolotšwe. Ba bantši ga ba tsebe ka go swarwa gampe ga Dihlatse tša Jehofa dinageng tše dingwe, go akaretša le United States.

Ka 1940, re ile ra ya kopanong kua Detroit, Michigan. Ke ile ka kolobeletšwa gona moo ka July 28 e le go bontšha boineelo bja-ka go Jehofa Modimo. Kgwedi pele go kopano yeo, Kgoro-kgolo ya Tsheko ya United States e ntšhitše molao wa gore go gana go dumediša folaga e be e le go tshela molao wa naga, e bile motho o be a ka rakwa sekolong. Dihlatse di ile tša swaragana bjang le phetho ye? Dihlatse tše dintši di ile tša hloma dikolo e le gore di rute bana ba tšona. Di be di bitšwa Dikolo tša Mmušo.

Ntwa ya II ya Lefase e ile ya thoma ka September 1939 kua Yuropa, gomme khuduego ya ntwa ya ata kua United States. Bafsa ba Dihlatse ba ile ba gobošwa le go bethwa ke bafsa ba bangwe le batho ba bagolo bao ba bego ba sa kwešiše boema-gare  bja bona. Go begilwe gore go tloga ka 1940 go fihla ka 1944, Dihlatse tša Jehofa di ile tša lebeletšana le ditlhaselo tše šoro tša mašaba tše fetago 2 500 kua United States. Tlaišo e ile ya oketšega ge Majapane a be a hlasela Pearl Harbor ka December 7, 1941. Dibeke tše mmalwa pele ga moo, ke be ke thomile go hlankela ke le mmulamadibogo, ka ge badiredi ba nako e tletšego ba Dihlatse tša Jehofa ba bitšwa bjalo. Ke ile ka boloka tšhelete gomme ka reka ntlo ya koloyana ya dimithara tše šupago gomme ba mmalwa ba rena re ile ra khudugela Louisiana go yo hlankela gona.

Tlaišego ka Borwa

Badudi ba motseng ba ile ba re nea tumelelo ya go phaka koloyana ya rena kgaufsi le serapa sa me-pecan motseng wa Jeanerette. Ka Mokibelo o mongwe re ile ra dira phetho ya go yo dira bodiredi bja phatlalatša seterateng, eupša tona ya maphodisa e ile ya laela banna ba yona go re swara gomme ba re iša holong ya motse. Go be go e na le lešaba la batho ba e ka bago ba 200 ka ntle gomme maphodisa a ile a re ntšhetša ka ntle lešabeng ntle le go re šireletša. Re ile ra imologa ge lešaba le bulega ka bogare gomme le re dumelela go feta. Letšatšing le le latelago, re ile ra ya Baton Rouge, motse o mogolo wo o lego kgaufsi, go yo botša Dihlatse-gotee le rena seo se diregilego.

Ge re boela Jeanerette, re ile ra hwetša molaetša mojakong wa koloyana ya rena o rego: “Hle tlaa o mpone kampeng ya oli.” O be o ngwadilwe leina la “E. M. Vaughn.” Re ile ra hwetša Mna. Vaughn, gomme o ile a re laletša gore re tle re je le yena gotee le mosadi wa gagwe. O ile a re botša gore yena le banna ba gagwe ba be ba le gare ga lešaba ka Mokibelo le gore ge go be go nyakega, o be a tla re šireletša go lešaba leo. Re ile ra leboga kgothatšo le thekgo ya gagwe.

Letšatšing le le latelago, batseta ba kgoro ba swerego dithunya ba ile ba re swara le go re amoga dipuku tša rena. Ba ile ba tšea dinotlelo tša ntlo ya-ka ya koloyana gomme ba nkiša kgolegong ya bodula-noši matšatši a 17 ntle le go newa sa go ja. Mna. Vaughn o ile a dira maiteko a go re thuša eupša ga se a ka a atlega. Nakong ya ge re le kgolegong, lešaba le ile la re utswetša gomme la fiša se sengwe le se sengwe seo re bego re e-na le sona, go akaretša le koloyana ya rena. Ka nako yeo, ke be ke sa lemoge gore Jehofa o be a ntokišeletša seo se bego se tla ntiragalela kgaufsinyane.

Go Golegwa ka Leboa

Kgwedi ka morago ga go boela leboa, ke ile ka kgethwa gore ke hlankele ke le mmulamadibogo yo a kgethegilego kua Olean, New York, gotee le Dihlatse tše dingwe. Ge ke be ke le moo, pušo e ile ya nyaka gore ke ngwadiše bakeng sa tirelo ya tša bohlabani gomme ke ile ka newa maemo ao a bego a sa dumelelane le letswalo la-ka. Ka morago ga gore ke ke dire gabotse tlhahlobong ya mmele le ya monagano, pampiri ya-ka e ile ya kgatlwa setempe se se rego “Candidate for Officers Training Academy.”

Ke ile ka kgona go tšwela pele ka modiro wa bobulamadibogo mo e ka bago ngwaga. Ka gona, ka 1943, ka ge ke ganne go kgaotša bodiredi bja-ka le go tsenela tlwaetšo ya tša bohlabani, ke ile ka golegwa ke ma-FBI gomme a ntaela gore ke tle kgorong ya tsheko kua motseng wa Syracuse, New York, bakeng sa go tlo sekišwa. Ke ile ka latofatšwa gomme tsheko ya-ka ya rulaganyetšwa gore e be matšatši a mabedi ka morago.

Ke ile ka ikemela tshekong. Dibokeng tša rena tša Bokriste, rena Dihlatse tše nyenyane re be re rutwa kamoo re ka emelago ditokelo tša rena tša molao kgorong ya tsheko le kamoo re swanetšego go itshwara gabotse ka gona ge re le fao. Ke ile ka gopola gabotse keletšo yeo e boletšwego mathomong a sehlogo se. Basekiši ba ba bangwe ba ile ba ba ba ngongorega ka gore Dihlatse di be di tseba mo gontši ka molao go ba feta! Lega go le bjalo, baahlodi ba ile ba mpona molato. Ge moahlodi a be a mpotšiša gore go na le se sengwe gape seo nka ratago go se bolela, ke ile ka fo re, “Lehono setšhaba se tshekong pele ga Modimo ka baka la tsela yeo se swarago bao ba mo hlankelago.”

Ke ile ka lahlelwa nywaga e mene kgolegong ya mmušo kua Chillicothe, Ohio. Moo ke ile ka abelwa go šoma ke le mongwaledi wa tona ya lefapha la kgolego leo le biletšago batho bohlabaning. Ka morago ga dibeke tše mmalwa, monyakišiši yo a kgethegilego go tšwa Washington, D.C., o ile a tla ofising ya rena gomme a re ba be ba nyakišiša ka ga Hayden Covington. Yena e be e le ramolao  yo a bego a emelela Dihlatse tša Jehofa gomme o be a tsebja gohle e le yo mongwe wa bo-ramolao bao ba nago le tsebo ka tša molao Amerika.

Monyakišiši o ile a re o nyaka difaele tše feletšego tša bagolegwa ba babedi e lego—Danny Hurtado le Edmund Schmidt. Mookamedi wa-ka o ile a araba ka gore, “A mohlolo ruri, Mna. Schmidt šo.” Monyakišiši o be a tlile ka nyakišišo yeo e lego sephiri, eupša a lemoga ka bjako gore re be re šetše re tseba maano a gagwe. Kapejana ke ile ka newa mošomo o mofsa ka khitšhing.

Bobulamadibogo, Bethele le Lenyalo

Ka September 26, 1946, ke ile ka lokollwa ka parola, ka tsošološa bobulamadibogo, nakong ye ke be ke kopanela le Phuthego ya Highland Park kua California. Ka morago, ka September 1948, ke ile ka fihlelela pakane yeo ke bego ke ipeetše yona go tloga kgale. Ke ile ka laletšwa go yo hlankela bjalo ka mopaki ntlong-kgolo (Bethele) kua Brooklyn, moo dipuku tša Beibele di tšweletšwago gona bakeng sa go dirišwa modirong wa boboledi wa lefase ka bophara. Ke ile ka kgaotša mošomo wa-ka le semeetseng wa go paka dikuku lebenkeleng la go rekiša dijo tšeo di apeilwego Glendale gomme ka ya Bethele.

Nywaga e šupago ka morago, ka 1955, go be go tla swarwa dikopano tše mmalwa tša ditšhaba-tšhaba kua Yuropa. Ba lapa lešo ba ile ba nthekga ka tša ditšhelete e le gore ke ye. Ke ile ka thabela dikopano tšeo di bego di swerwe London, Paris, Roma, gomme ka thabela kudu-kudu ya Nuremberg, Jeremane, moo batho ba fetago 107 000 ba bego ba le gona lepatlelong le legolo leo go lona Hitler a kilego a lekola mašole a gagwe. Gare ga bao ba bego ba le gona kopanong go be go e-na le Dihlatse tšeo Hitler a bego a ile a ikana gore o tla di fedišetša ruri. E be e le mo go kgothatšago gakaakaang go ba le bona!

Kopanong ya Nuremberg, ke ile ka gahlana le kgarebe ya Hlatse ya Mojeremane, e lego Brigitte Gerwien, gomme ka thoma go ratana le yona. Re ile ra nyalana lebakeng la ka tlase ga ngwaga gomme ra boela Glendale go yo dula kgaufsi le batswadi ba-ka. Morwa wa rena wa leitšibulo, Tom, o ile a belegwa ka 1957, wa bobedi, Don, ka 1958, gomme morwedi wa rena, Sabena, ka 1960.

Bophelo Bjo bo Kgotsofatšago ka Botlalo

Ba bantši ba ile ba mpotšiša gore na ke a itshola ka go hlaselwa ke mašaba le go golegwa tšeo ke ilego ka lebeletšana le tšona ka baka la go hlankela Modimo. Ka mo go fapanego, ke leboga Jehofa gore ke bile le tokelo ya go mo hlankela ke e-na le ba bantši bao ba mmotegelago. E bile ke holofela gore diphihlelo tša-ka di tla matlafatša ba bangwe gore ba batamele kgaufsi le Modimo gomme ba se mo tlogele le ka mohla.

Bahlanka ba bantši ba Modimo ba ile ba tlaišwa o šoro ka baka la go mo hlankela. Eupša na seo ga se seo re boditšwego gore re se letele? Beibele e re: “Bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Timotheo 3:12) Lega go le bjalo, ruri mantšu a Psalm 34:19 a itlhatsetše e le therešo ge a re: “Mahloko a moloki a atile; ’me Morêna ó mo nthša mo xo ôna ka moka”!

[Mongwalo wa tlase]

[Seswantšho go letlakala 27]

Go dira boboledi Louisiana mathomong a bo-1940

[Seswantšho go letlakala 29]

Ke hlankela ke le mopaki bakeng sa bašomi ba lego ntlong-kgolo

[Seswantšho go letlakala 29]

Ke e-na le mosadi wa-ka, Brigitte