Lengwalo le le Tšwago Grenada

Letšatši Lebopong la Lewatle

GE E ba o ka amogela kabelo ya tirelo ya boromiwa nageng e šele, o ka thaba kudu. Go swana le ngwana yo a tomotšego mahlo a bontšhago go nyaka go tseba, o ipotšiša mabapi le batho, maemo le diphihlelo tšeo di letšego ka pele bodireding bja gago.

Ge nna le mosadi wa-ka re be re abelwa Grenada, yeo e nago le lebopo le lebotse leo le nago le mafelo a e ka bago a 45 ao go ruthwago go ona, re ile ra ipotšiša gore na mafelo ao go ruthwago go ona a bjang. Kapejana re ile ra swanelwa ke go fetša letšatši go le lengwe la ona, eupša lethabo la rena le be le le mabapi le batho e sego letšatši le maphoto.

Go tloga legaeng la rena kua Grenada go ya Lebopong la Grand Anse ke leeto le lenyenyane ka koloi—eupša ke leeto leo le kgahlišago e le ruri! Tsela ke ya manyokenyoke e bile e re kgontšha go bona mafelo a mabotse kudu ao o ka akanyago ka ona. Mafelo a mebotong a kgabišitšwe ke botala. Ge re dutše re sepela mo tseleng ya manyokenyoke re bona gabotse dithaba, dithokgwa tša pula e ntši, diphororo le lewatle le le kgahlišago kudu leo le bonalago le le kgole. Ga go makatše ge baeti ba tšwago lefaseng ka bophara ba rata go tlo etela mo! Lefelo le ke le lebotse moo e lego gore mootledi o swanetše go ntšha-mahlo-dinameng e le gore a se ke a šitišega. Ditsela tšeo di a nyokanyoka e bile di logagane gomme, ka dinako tše dingwe, e ba tše disesane kudu moo o ka ipotšišago gore go kgonega bjang gore dikoloi di se ke tša thulana.

Re ile ra goroga Convention Trade Center, yeo e lego ka thoko ga tsela kgaufsi le Lebopo la Grand Anse. Go se go ye kae sehlopha sa Dihlatse tša Jehofa, sa palo e nyakilego go ba 600, se be se kgobokane bakeng sa go tlo thabela letšatši gotee le tlhahlo ya Beibele. Letšatši leo le ile la thabelwa kudu ke Lesley le Daphne, banyalani bao ba lego nywageng ya bona ya bo-70. Lesley o be a tlo kolobetšwa. Daphne ke kgale a letetše letšatši le, ka ge a ile a kolobetšwa bjalo ka yo mongwe wa Dihlatse tša Jehofa ka 1958.

Go Dihlatse, kolobetšo—yeo e dirwago ka go nweletšwa ka mo go feletšego ka meetseng—e bolela go gontši kudu. Ke mogato wo o gatwago ke motho yo a hweditšego tsebo e nepagetšego ya therešo ya Beibele gomme a e diriša bophelong bja gagwe. Ke tirelo ya phatlalatša yeo go yona motho a bontšhago gore o ineetše go Jehofa Modimo.

Ke ile ka kgopelwa gore ke nee polelo yeo e hlalosago gore Mangwalo a re’ng ka kolobetšo. Mafelelong a polelo, Lesley o ile a ema gotee le ba bangwe ba babedi bao le bona ba bego ba tlo kolobetšwa. O be a apere gempe e tšhweu yeo e šidulotšwego gabotse le thai e  bile a myemyela e le ruri. Ke ile ka botšiša ka re: “Na o sokologile dibeng tša gago gomme wa ineela go Jehofa gore o dire thato ya gagwe?” O be o ka lemoga potego le boineelo ge yena le ba bangwe ba be ba araba ka “Ee!” e tšwago pelong.

Ke ile ka kgomega kudu ka ge ke be ke tseba setlogo sa Lesley. O na le nywaga e masome a gana go ithuta Beibele. Ke moka yena le mosadi wa gagwe ba ile ba etela sehlakahlakeng se sengwe. Ge ba be ba le moo, ba ile ba phetha ka gore yo mongwe le yo mongwe o tla ikela tirelong ya gagwe ya bodumedi. Lesley o ile a re go Daphne: “Wena e-ya kerekeng ya gago, gomme nna ke tla ya go ya-ka.”

Lesley o ile a iša Daphne Holong ya Mmušo gomme a ya kerekeng ya Anglican ya lefelong leo. Ge ditirelo tša kereke di fela, Lesley o ile a boela Holong ya Mmušo go yo tšea mosadi wa gagwe. Moo holong, o ile a dikologwa ke batho ba botho le ba nago le bogwera bao ba ilego ba mo amogela ka botho, gaešita le ge ba be ba sa ka ba mmona pele. Seo se ile sa kgoma Lesley. Kerekeng ya gagwe, ga go le o tee yo a ilego a mmolediša. Lesley o ile a botša Daphne gore: “Nka se sa boela kerekeng yela gape. Ga go motho yo a ilego a mpolediša, gaešita le moruti. Ga go yoo a ilego a ntumediša. Ge ke be ke fihla le ge ke be ke e-tšwa.” Ge Lesley a be a e-tšwa, o ile a tšwela sa ruri.

Ka morago ga moo, Lesley o ile a thoma go bala Lentšu la Modimo ka maikemišetšo. Gomme ga bjale o be a loketše go kolobetšwa. Bao ba yago go kolobetšwa ba ile ba ya lebopong, gomme re be re le ka morago kgaufsi le bona. Ka ge lewatle le be le le kgaufsi kudu, go be go sa nyakege gore go hlongwe letangwana la kolobetšo go swana le dikopanong tše dingwe tša Dihlatse tša Jehofa. Mo re ile ra fo tshela mmila.

Lebopo la Grand Anse ke le lebotse la dikhilomithara tše tharo la lešabašaba le lešweu gomme meetse a gona ke a matala-lerata ao a ruthetšego ngwaga ka moka. Baeti ba be ba maketše ge ba bona sehlopha sa rena se goroga lebopong, banna ba apere digempe le dithai, gomme basadi ba apere diroko le dikhethe. Lesley o be a apere diaparo tše dingwe, a apere sekhipha le borokgwana. Akanya kamoo Daphne a ilego a ikwa ka gona ge a be a bona monna wa gagwe a kolobetšwa nywaga e ka bago e 50 ka morago ga ge yena a kolobeditšwe! Letšatši la mosegare wa sekgalela le be le phadima, gomme go bjalo le ka go myemyela ga gagwe. Gaešita le baeti ba ile ba thabela tiragalo yeo le rena. Le bona ba ile ba opa magofsi le rena ge yo mongwe le yo mongwe a kolobetšwa.

Leratadima le letala-lerata, lešabašaba le lešweu gotee le maphoto ao a fodilego—lebopo le le be le šetše le nea Mmopi letago. Le dirile bjalo le go feta ge ba bararo bao ba bego ba kolobetšwa ba e-tšwa ka meetseng. Go ba bona go ile gwa ruthetša dipelo tša rena go feta kamoo letšatši le bego le ruthetša matlalo a rena. Letšatši leo ruri e be e le le le kgethegilego. Go Lesley le Daphne, letšatši le la lebopong e be e le le lekaone-kaone.