Go Bolela ka Maleme—Na go Tšwa go Modimo?

DEVON o re: “Ke tloga ke sa kwešiše. Beke e nngwe le e nngwe kerekeng ya-ka, go bonala ba bantši ba hwetša moya o mokgethwa gomme ka mohlolo ba bolela maleme a fapa-fapanego. Ba bangwe ba bona ba phela bophelo bjo bo gobogilego. Mola nna ke leka go phela ka ditekanyetšo tša Beibele. Lega go le bjalo, go sa šetšwe gore ke e rapelela gakaakang, ga ke hwetše mpho ye ya moya. Seo se kgonega bjang?”

Gabriel ka mo go swanago o tsena kereke yeo batho ba bonalago ba hwetša moya o mokgethwa gomme ba bolela ka maleme. O hlalosa gore: “Seo se ntshwenyago ke gore nakong ya ge ke rapela, ba bangwe ba ntšhitiša ka go bolelela godimo ditaba tšeo nna goba bona ba sa di kwešišego. Ga go na motho yo a holwago ke dipolelo tše bjalo. Na mpho ya moya wa Modimo ga se ya swanela go ba le morero?”

Diphihlelo tša Devon le Gabriel di rotoša potšišo yeo e tsošago kgahlego, Na ruri go bolela ka maleme bjalo ka ge go dirwa ka dikerekeng lehono go tšwa go Modimo? Go araba potšišo yeo, re ka thušwa ke go hlahloba mpho ya go bolela ka mohlolo ya Bakriste ba lekgolong la pele la nywaga.

Ba Ile “ba Thoma go Bolela ka Maleme a Fapa-fapanego”

Ka Beibeleng, re bala gore banna ba bangwe le basadi ba ile ba newa matla a go bolela maleme ao ba sa ka go ba ithuta ona. Se se diragetše la mathomo ka letšatši la Pentekoste ya 33 C.E., dibeke tše mmalwa ka morago ga lehu la Jesu Kriste. Letšatšing leo kua Jerusalema, barutiwa ba 120 ba Jesu ba ile “ba tlala moya o mokgethwa ba thoma go bolela ka maleme a fapa-fapanego.” Baeti ba tšwago dinageng dišele ba ile ba “makala gobane yo mongwe le yo mongwe o be a ba kwa ba bolela ka leleme la gabo.”—Ditiro 1:15; 2:1-6.

Beibele e bolela ka balatedi ba bangwe ba Jesu ba lekgolong la pele la nywaga bao ba bego ba e-na le bokgoni bjo bjoo bo makatšago. Ka mohlala, Moapostola Paulo o be a kgona go bolela ka maleme a mmalwa a fapa-fapanego a tutueditšwe ke moya o mokgethwa. (Ditiro 19:6; 1 Bakorinthe 12:10, 28; 14:18) Eupša mpho e nngwe le e nngwe e bjalo ya moya o mokgethwa wa Modimo e swanetše go ba le morero o mobotse. Ka gona, go bolela ka maleme go be go phetha morero ofe mehleng ya Beibele?

Pontšho ya go Thekgwa ke Modimo

Ge a be a ngwalela Bakriste ba motseng wa Korinthe, bao go bonagalago ba bangwe ba bona ba be ba kgona go bolela ka maleme, Paulo o ile a hlalosa gore “maleme a šele ke a pontšho . . . eupša go bao e sego badumedi.” (1 Bakorinthe 14:22) Ke ka baka leo, matla a go bolela gotee le  bokgoni bjo bongwe bja mehlolo e be e le pontšho go babogedi ya gore phuthego yeo e sa tšwago go hlongwa ya Bokriste e be e amogelwa le go thekgwa ke Modimo. Dimpho tša mohlolo di be di le bjalo ka leswao la tseleng leo le šupetšago bao ba tsomago therešo mo ba ka yago gona gore ba hwetše batho bao ba kgethilwego ke Modimo.

Se se lemogegago ke gore Beibele ga e bolele gore Jesu goba yo mongwe ba baporofeta ba pele ga Bokriste ka mohlolo ba ile ba bolela ka maleme ao ba sa kago ba ithuta ona. Ka gona, mpho ya go bolela ka maleme yeo e neilwego balatedi ba Jesu ka ntle le pelaelo e be e e-na le morero o mongwe.

Sedirišwa sa go Phatlalatša Ditaba tše Dibotse

Pejana bodireding bja gagwe, Jesu o ile a laela balatedi ba gagwe gore ba bolele ditaba tše dibotse tša Mmušo wa Modimo go Bajuda feela. (Mateo 10:6; 15:24) Ka baka leo, barutiwa ba be ba tšwela dinageng tšeo di sa dulwego ke Bajuda ka sewelo. Eupša seo se be se tla fetoga kgaufsinyane.

Nakwana ka morago ga lehu la gagwe ka 33 C.E., Jesu yo a tsošitšwego o ile a laela balatedi ba gagwe gore ba “dire batho ba ditšhaba ka moka barutiwa.” Le gona, o ile a botša balatedi ba gagwe gore e tla ba dihlatse tša gagwe “go fihla karolong ya kgole ya lefase.” (Mateo 28:19; Ditiro 1:8) Go phatlalatša ditaba tše dibotse go fihla moo go be go tla nyaka gore ba bolele maleme a mantši e sego Seheberu feela.

Lega go le bjalo, ba bantši ba barutiwa bao ba lekgolong la pele la nywaga e be e le “ba sa rutegago le ba tlwaelegilego.” (Ditiro 4:13) Ka gona, ba be ba ka kgona bjang go dira boboledi go fihla dinageng tša kgole tšeo ba bego ba sa tsebe maleme a tšona, goba ba sa kago ba ithuta ona? Moya o mokgethwa o ile wa matlafatša ba bangwe ba baboledi bao ba fišegago gore ka bokgoni bja mohlolo ba dire boboledi ka thelelo ka maleme ao ba sa kago ba ithuta ona pele.

Ka gona, mpho ya maleme e be e phetha merero e mebedi e bohlokwa. Wa pele, e be e le pontšho ya go thekgwa ke Modimo. Wa bobedi, e be e le sedirišwa seo se thušago Bakriste ba lekgolong la pele la nywaga go phetha kabelo ya bona ya go dira boboledi go batho ba maleme a mantši. Na go bolela ka maleme moo go dirwago ka dikerekeng lehono go phetha merero ye?

Go Bolela ka Maleme Lehono—Na ke Pontšho ya go Thekgwa ke Modimo?

O be o ka bea kae leswao leo le ka holago batho ba bantši ka mo go ka kgonegago motseng wa geno? Na o be o ka le bea ka ntlong e nyenyane? Ga go bjalo le gatee! Pego ya letšatšing la Pentekoste e re botša gore “lešaba” la bafeti-ka-tsela le ile la lemoga pontšho yeo ya barutiwa ya go bolela ka maleme ka mohlolo. Ka baka leo, “go ile gwa okeletšwa meoya e ka bago dikete tše tharo” ka phuthegong ya Bokriste ka lona letšatši leo! (Ditiro 2:5, 6, 41) Ge e ba batho lehono ba ipolela gore ba bolela ka maleme eupša ba dira bjalo ka kerekeng feela, mokgwa wo e ka ba pontšho ya phatlalatša bjang go batho ba bantši bao e sego badumedi?

Lentšu la Modimo le bolela ka bootswa le “mediro [e mengwe] ya nama” e le tšeo di šitišago moya wa Modimo go šoma, le go oketša ka gore “bao ba tlwaelago go dira dilo tše bjalo ba ka se je bohwa bja Mmušo wa Modimo.” (Bagalatia 5:19-21) Ge e ba o lemoga batho bao boitshwaro bja bona bo belaetšago ba bolela ka maleme, o ka ipotšiša ka mo go swanetšego gore, ‘Na e ka se be mo go sa lokago—gaešita le mo go foretšago—ge moya o mokgethwa wa Modimo o newa batho bao leboelela ba dirago dilo tšeo Lentšu la Modimo le di ganetšago?’ Seo se be se tla swana le go hlomela leswao la tsela leo le lebišago batho tseleng e fošagetšego.

Go Bolela ka Maleme Lehono—Na ke Sedirišwa sa go Phatlalatša Ditaba tše Dibotse?

Go thwe’ng ka morero o mongwe wa mpho ya go bolela ka maleme lekgolong la pele la nywaga? Na go bolela ka maleme mo go dirwago ka dikerekeng go šoma e le sedirišwa sa go bolela ditaba tše dibotse bathong ba maleme a fapa-fapanego? Gopola gore bao ba bego ba lebeletše ba le Jerusalema letšatšing leo la Pentekoste ya 33 C.E. ba be ba e-tšwa dinageng tše dintši, gomme ba be ba kwešiša gabotse maleme ao barutiwa ba bego ba a  bolela ka mohlolo. Ka mo go fapanego, bao ba bolelago ka maleme lehono gantši ba bolela dipolelo tšeo di sa kwešišwego ke motho.

Ge e le gabotse, go bolela ka maleme ga mehleng yeno go fapana kudu le mpho ya moya o mokgethwa yeo e ilego ya newa balatedi ba Jesu ba lekgolong la pele la nywaga. Ge e le gabotse, ga go na pego e ka botwago ya motho yo a ilego a hwetša matla a bjalo a mohlolo ka morago ga lehu la baapostola. Se ga se makatše go babadi ba Beibele. Moapostola Paulo yo a buduletšwego o porofetile mabapi le dimpho tša mohlolo, go akaretša ya go bolela ka maleme, gore: Di “tla kgaotša.” (1 Bakorinthe 13:8) Ka gona, motho a ka lemoga bjang motho yoo a nago le moya o mokgethwa lehono?

Ke Mang yo a Hlatselago Gore o na le Moya o Mokgethwa?

Jesu o be a tseba gore mpho ya go bolela ka maleme e be e tla kgaotša kapejana ka morago ga go hlongwa ga phuthego ya Bokriste. Nakwana pejana ga lehu la gagwe, Jesu o ile a bolela leswao goba seka seo se ka se kgaotšego, seo se tla hlaolago balatedi ba gagwe ba kgonthe. O itše: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Ge e le gabotse, temaneng yona yeo Lentšu la Modimo le boletšego e sa le pele ka dimpho tša mohlolo gore di be di tla kgaotša, e re: “Lerato le ka mohla ga le fele.”—1 Bakorinthe 13:8.

Lerato ke seka sa mathomo lelokelelong la dika tše senyane tša “dienywa,” goba ditšweletšwa, tša moya o mokgethwa wa Modimo. (Bagalatia 5:22, 23) Ka gona bao ba nago le moya wa Modimo e le ka kgonthe—le bao ba thekgwago ke Modimo—ba tla bontšha lerato la kgonthe go ba bangwe. Go oketša moo, seka sa boraro sa dienywa tša moya ke khutšo. Ka gona, batho bao lehono ba nago le moya o mokgethwa ba tla ikemišetša go dira khutšo, ba katanela go fenya dika tša lefase tše bjalo ka kgethollo, semorafo le bošoro.

Le gona, gopola boporofeta bja Jesu bjo bo begilwego go Ditiro 1:8. O ile a bolela e sa le pele gore barutiwa ba gagwe ba tla amogela matla a go ba dihlatse tša gagwe “go fihla karolong ya kgole ya lefase.” Jesu gape o ile a bontšha gore modiro wo o tla tšwela pele “xo fihla bofelong bya lefase.” (Mateo 28:20, Beibele ya Sepedi) Ka gona, modiro wo wa go ruta wa lefase ka bophara o tla tšwela pele go ba seka seo se hlaolago bao ba matlafaditšwego e le ka kgonthe ka moya o mokgethwa.

O nagana’ng? Lehono, ke sehlopha sefe sa batho seo o bonago se e-na bohlatse bja gore se na le moya o mokgethwa? Lefaseng ka bophara, ke bomang bao ba bontšhago dienywa tša moya lehono, kudu-kudu lerato le khutšo, go fihla bokgoleng bjoo ba tlaišwago ke mebušo ka baka la go gana go tšea karolo dintweng? (Jesaya 2:4) Ke bomang bao ba katanelago go efoga mediro ya nama, e bjalo ka bootswa, gaešita le go tloša gare ga bona bao ba tšwelago pele ka mokgwa wo ba sa itshole? (1 Bakorinthe 5:11-13) Ke bomang bao ba bolelago ditaba tše dibotse lefaseng ka bophara tša gore Mmušo wa Modimo ke wona feela woo o neago batho kholofelo?—Mateo 24:14.

Bagatiši ba makasine wo ga ba belaele go bolela gore Dihlatse tša Jehofa di swanela tlhaloso yeo e hwetšwago Beibeleng ya batho bao ba nago le moya o mokgethwa. Ke ka baka la’ng o sa tlwaelane le bona gomme o itirele phetho tabeng ya ge e ba ba thekgwa ke Modimo e le ka kgonthe?