Babadi ba Rena ba a Botšiša . . .

Na Dihlatse tša Jehofa di Fodiša Batho ka Mohlolo?

▪ Dihlatse tša Jehofa le ka mohla ga se tša ka tša fodiša batho ka mohlolo. Go swana le Jesu, di dumela gore morero wa tšona o mogolo ke go bolela ditaba tše dibotse mabapi le Mmušo wa Modimo. Di dumela le gore Bakriste ba therešo ga ba lemogwe ka diphodišo tša mohlolo eupša ba lemogwa ka selo se sengwe se bohlokwa le go feta.

Ke therešo gore taba ya Jesu Kriste ya go fodiša batho ba babjago ka kwelobohloko lekgolong la pele la nywaga C.E. e bohlokwa kudu le go rena ka moka. Ka go dira bjalo o ile a nea kgonthišetšo ya gore ka tlase ga pušo ya gagwe bjalo ka Kgoši ya Mmušo wa Modimo, “mo xo ba ba axilexo fá xo ka se bê le e a rexo: Ke a babya!”—Jesaya 33:24.

Lega go le bjalo, go thwe’ng ka lehono? Bafodiši ba Bojakane gotee le ba madumedi a mangwe ao e sego a Bokriste ba bolela gore ba fodiša ka mohlolo. Lega go le bjalo, Jesu o ile a lemoša ka thata malebana le batho bao ba bego ba tla bolela gore ba “dira mehlolo e mentši” ka leina la gagwe. O be a tla ba botša gore: “Ga se ka ka ka le tseba. Tlogang go nna lena ba-dira-bobe!” (Mateo 7:22, 23, International Standard Version) Ka gona, na seo go thwego ke mehlolo ya bafodiši ba mehleng yeno ruri ke pontšho ya go amogelwa ke Modimo goba ya tšhegofatšo ya gagwe?

Ela hloko seo Beibele e se bolelago mabapi le mehlolo yeo e dirilwego ke Jesu. Ka go bapiša pego yeo ya Mangwalo le mekgwa ya lehono ya diphodišo tša mohlolo, re ka kgona go bona ge e ba diphodišo tša mohlolo di e-tšwa go Modimo goba di sa tšwe go yena.

Jesu le ka mohla ga se a ka a diriša diphodišo e le tsela ya go tanya balatedi goba batheetši ba bantši. Go e na le moo, o ile a fodiša batho ba bantši a sa bonwe ke batho. Gantši o be a botša batho bao a ba fodišitšego gore ba se ke ba botša motho ka mohlolo woo.—Luka 5:13, 14.

Jesu le ka mohla ga se a ka a lefiša batho bao a bego a ba fodiša ka mohlolo. (Mateo 10:8) Le gona o be a dula a atlega. Balwetši ka moka bao ba bego ba e-tla go yena ba ile ba fodišwa ka mo go feletšego, le gona phodišo e be e sa ithekge ka tumelo ya motho. (Luka 6:19; Johane 5:5-9, 13) Le gona, Jesu o ile a tsoša le bahu!—Luka 7:11-17; 8:40-56; Johane 11:38-44.

Gaešita le ge a ile a dira mehlolo yeo, morero wa bodiredi bja Jesu e be e se go kgoboketša basokologi ka maikwelo ao a tsošitšwego ke go dirwa ga mehlolo. Go e na le moo, modiro wa gagwe o mogolo e be e le go tsebatša ditaba tše dibotse tša Mmušo wa Modimo. Jesu o ile a rulaganya balatedi ba gagwe gore e be badiri ba barutiwa, bao ba bego ba tla ruta ba bangwe mabapi le kholofelo ya go hwetša phodišo e phethagetšego ka tlase ga Mmušo wa Modimo.—Mateo 28:19, 20.

Ke therešo gore ba bangwe ba balatedi ba Jesu ba lekgolong la pele la nywaga ba be ba e-na le dimpho tše di kgethegilego tša go fodiša batho, eupša dimpho tše di be di tla fela. (1 Bakorinthe 12:29, 30; 13:8, 13) Bakriste ba therešo lehono ga ba lemogwe ka diphodišo tša mohlolo eupša ba lemogwa ka tlemo ya lerato la boikgafo. (Johane 13:35) Diphodišo tša mohlolo tša mehleng yeno ga se tša tšweletša lapa la kgonthe la Bakriste ba tšwago merafong le ditlogong ka moka bao ba tlemagantšwego ke lerato le bjalo.

Lega go le bjalo, go na le sehlopha sa Bakriste bao ba tlemagantšwego ke lerato le matla kudu moo e lego gore ba gana go gobatšana—goba go gobatša motho le ge e le ofe—gaešita le dinakong tše tšhošago kudu tša dintwa tša batho. Ke bomang? Ke Dihlatse tša Jehofa. Lefaseng ka bophara, di tsebja ka go bonagatša ga tšona lerato le le swanago le la Kriste. Go dira gore batho ba fapa-fapanego ka morafo, setšhaba, setšo, le setlogo e be batee ruri ke mohlolo, gomme o kgonega feela ka moya o mokgethwa wa Modimo. O re’ng o sa ye go se sengwe sa diboka tša tšona gomme o iponele ka bowena?

[Seswantšho go letlakala 13]

Na ruri batho bao ba fodišago ka mohlolo ba mehleng yeno (bao ba bontšhitšwe ka go le letona) ba thekgwa ke Modimo?