Poledišano le Moagišani—Moya o Mokgethwa ke Eng?

DIHLATSE TŠA JEHOFA di thabela go ahla-ahla Beibele le baagišani ba tšona. Na o na le potšišo e itšego ya Beibele yeo e lego kgale o ipotšiša yona? Na o ipotšiša dipotšišo mabapi le ditumelo goba ditiro le ge e le dife tša bodumedi tša Dihlatse tša Jehofa? Ge e ba go le bjalo, o se ke wa dika-dika go bolela ka taba yeo nakong e tlago ge o kopana le Hlatse. E tla thabela go boledišana le wena ka ditaba tše bjalo.

Se se latelago ke mohuta wa poledišano yeo Dihlatse tša Jehofa di ka bago le yona le moagišani. A re tšeeng gore Hlatse yeo e bitšwago Scott e etetše mong wa ntlo yo a bitšwago Brad.

O ra Gore’ng ge o re “Modimo-Moya”?

Brad: Ke kwele gore Dihlatse tša Jehofa ga se Bakriste. Ga le dumele go modimo-moya.

Scott: Sa pele, e re ke go kgonthišetše gore re Bakriste. Go dumela ga-ka go Jesu Kriste go ntirile gore ke go etele mesong ye. Go ba gona, ke Yena yo a laetšego balatedi ba gagwe gore ba dire boboledi. Eupša e re ke botšiše, o ra gore’ng ge o re “modimo-moya”?

Brad: Ke ra moya o mokgethwa, motho wa boraro go Boraro-botee, mothuši yoo Jesu a holofeditšego go re romela yena. Mothuši yoo o bohlokwa kudu go nna. Ke nyaka go kwa go ba gona ga moya o mokgethwa bophelong bja-ka.

Scott: Yeo ke tsela yeo ba bantši ba kwešišago moya o mokgethwa ka yona. Nakong e fetilego, ke ile ka ba le sebaka sa go hlahloba seo Beibele e se rutago ka taba ye. Ge e ba o e-na le metsotso e sego kae, nka thabela go go bontšha seo ke ithutilego sona.

Brad: Ee, ke na le metsotso e sego kae.

Scott: Go ba gona, leina la-ka ke Scott. Nka thabela go tseba wena?

Brad: Brad. Ke thabela go go tseba.

Scott: Le nna ke thabela go go tseba, Brad. Ka go hlompha nako ya gago, e re ke lebiše tlhokomelo karolong e tee ya taba ye. O boletše gore moya o mokgethwa ke mothuši yoo Jesu a re holofeditšego yena. Ke dumelelana le wena. Eupša na kwešišo ya gago ke gore moya o mokgethwa ke motho le yo a lekanago le Modimo?

Brad: Ee, ke rutilwe bjalo.

Na Moya o Mokgethwa ke Motho?

Scott: A re bale ditemana tša Beibele tšeo di tlago go re thuša go bona ge e ba moya o mokgethwa e le motho goba e se motho. O ka ba o tlwaelane le ditemana tše. Go Ditiro 2:1-4, re bala gore: “Bjale ge letšatši la monyanya wa Pentekoste le tšwela pele, ka moka ga bona ba be ba le gotee lefelong le tee, gomme ka tšhoganetšo gwa ba le lešata le le tšwago legodimong le bjalo ka ledimo le matla, la tlala ntlo  ka moka yeo ba bego ba dutše ka go yona. Ke moka, gwa bonagala maleme a ekego ke mollo go bona, a abja, gomme yo mongwe le yo mongwe a dulwa godimo ke le tee, gomme ka moka ga bona ba tlala moya o mokgethwa ba thoma go bolela ka maleme a fapa-fapanego, go ya kamoo moya o bego o ba fa gore ba bolele ka gona.”

Brad: Ke tlwaelane ke pego yeo.

Scott: Bjale, Brad, na motho a ka tlala ka motho yo mongwe?

Brad: Ga go bjalo le gatee.

Scott: A re lebelele temana e nngwe gona mo kgaolong ye, go temana 17. Karolo ya mathomo ya temana ye e balega ka gore: “‘Mehleng ya bofelo,’ go bolela Modimo, ‘ke tla tšhollela o mongwe wa moya wa-ka godimo ga nama ya mohuta o mongwe le o mongwe.’” E re ke go botšiše, Brad, na Modimo o be a ka tšholla karolo ya Modimo yo a lekanago le yena?

Brad: Ke sa re, aowa.

Scott: Johane Mokolobetši o dirišitše tlhaloso e fapanego ya go tlala ka moya o mokgethwa. E hwetšwa go Mateo 3:11. Hle anke o re balele temana ye?

Brad: “Ge e le nna, ke le kolobetša ka meetse ka baka la boitsholo bja lena; eupša yo a tlago ka morago ga-ka o mpheta ka matla, yo diramphašane tša gagwe ke sa swanelwago ke go di rola. Yena yoo o tla le kolobetša ka moya o mokgethwa le ka mollo.”

Scott: Ke a leboga. Na o lemoga seo Johane Mokolobetši a rego se tlo dirwa ka moya o mokgethwa?

Brad: O boletše ka go kolobetšwa ka moya o mokgethwa.

Scott: O nepile. Ela hloko gore o boletše le ka go kolobetšwa ka mollo. Go molaleng gore mollo ga se motho. Na o nagana gore temana ye e ra gore moya o mokgethwa ke motho?

Brad: Aowa.

Scott: Ka gona, go ya ka mangwalo ao ra go a hlahloba, moya o mokgethwa ga se motho.

Brad: Ke nagana gore go bjalo.

Ke “Mothuši” ka Tsela Efe?

Scott: Lega go le bjalo, pejana o ile wa bolela ka lentšu le le rego “mothuši.” Jesu o boletše gore moya o mokgethwa ke “mothuši” go Johane 14:26. A re bale temana ye gotee: “Mothuši, e lego moya o mokgethwa woo Tate a tlago go o roma ka leina la-ka, o tla le ruta tšohle le go le gopotša tšohle tšeo ke le boditšego tšona.” Ba bangwe ba bona eka lengwalo le le bonagala le thekga kgopolo ya gore moya o mokgethwa ke motho, motho yoo a tlago go nea thušo le go ruta.

Brad: Go bjalo, yeo ke tsela yeo ke bego ke dutše ke nagana ka yona.

Scott: Lega go le bjalo, na go na le kgonagalo ya gore Jesu o be a diriša seka-polelo? Ela hloko seo Jesu a go se bolela mabapi le bohlale, go ya ka Luka 7:35: “Lega go le bjalo, bohlale bo hlatselwa gore bo lokile ka bana ka moka ba bjona.” Na o be o ka re bohlale ke motho, le gore bo na le bana e le ka kgonthe?

Brad: Aowa. Go molaleng gore seo ke seka-polelo.

Scott: Ke dumelelana le wena. Ntlha ya Jesu ke gore bohlale bo bontšhwa ka ditla-morago. Beibele gantši e diriša seka-polelo seo se bitšwago mothofatšo—ke gore, o bolela ka selo se se sa phelego tše nkego se a phela. Gantši re diriša dika-polelo tše bjalo dipoledišanong tša rena. Ka mohlala, mo mesong ya ge letšatši le hlabile, na e be e tla ba mo go sa tlwaelegago gore motho a re, “Bulang digareteine gore letšatši le tsene”?

Brad: Le nna ke be nka rialo.

Scott: Bjale na o tla ba o bolela ka letšatši e le motho yo a bego a tla tsena ka ngwakong wa gago bjalo ka moeng?

Brad: Aowa, karabo e molaleng. Ke seka-polelo.

Scott: Ka gona ge Jesu a be a bolela ka moya o mokgethwa e le mothuši, goba morutiši, na go ka direga gore o be a fo ba a diriša seka-polelo?

Brad: Mohlomongwe go bjalo. Seo se tla sepedišana gabotse le mangwalo ao o a badilego  mabapi le go tšhollwa ga moya le batho ba go kolobetšwa ka wona. Eupša ge e ba moya o mokgethwa e se motho, ke eng?

Moya o Mokgethwa ke Eng?

Scott: Go Ditiro 1:8, Jesu o re botša seo moya o mokgethwa e lego sona. Na o ka re balela temana ye?

Brad: “Le tla amogela matla ge moya o mokgethwa o fihla godimo ga lena, gomme le tla ba dihlatse tša-ka Jerusalema le Judea ka moka le Samaria le go fihla karolong ya kgole ya lefase.”

Scott: Ela hloko gore Jesu o tswalanya moya o mokgethwa le matla. Le gona go ya ka ditemana tšeo re di badilego, o nagana gore matla ao a tšwa kae?

Brad: A tšwa go Modimo, yena Tate.

Scott: O nepile. Moya o mokgethwa ke matla ao Modimo a a dirišitšego go hlola legohle. Temana ya bobedi ka Beibeleng e bolela ka seo. Genesi 1:2 (NW) e re: “Matla a šomago a Modimo a be a e-ya pele le morago godimo ga meetse.” Lentšu la Seheberu leo mo le fetoletšwego e le “matla a šomago” gape le fetolelwa e le “moya.” Ke matla a šomago a sa bonagalego ao Modimo a phethago merero ya gagwe ka ona le go utolla thato ya gagwe. E re ke go fe lengwalo le lengwe leo o ka le elago hloko. Ke la Luka 11:13. Ke kgopela gore o bale temana ye?

Brad: “Ge e ba lena gaešita le ge le le kgopo le tseba go nea bana ba lena dimpho tše dibotse, gona Tate yo a lego legodimong o tla nea gakaakang moya o mokgethwa go bao ba mo kgopelago!”

Scott: Ge e ba Tate wa legodimong a laola moya o mokgethwa le go o fa bao ba mo kgopelago ona, na moya o mokgethwa o ka ba o lekana le Tate?

Brad: Aowa. Ke bona ntlha ya gago.

Scott: Ga ke nyake go go senyetša nako, Brad. O boletše gore o na le metsotso e sego kae feela. Eupša e re ke akaretše taba ya rena ka go botšiša potšišo. Go ya ka mangwalo ao re a badilego, o ka re moya o mokgethwa ke eng?

Brad: Ke matla a Modimo a šomago.

Scott: O nepile. Le gona, ge Jesu a be a bolela ka moya o mokgethwa a re ke mothuši goba morutiši, go ya ka Johane 14:26, o be a diriša seka-polelo seo se bitšwago mothofatšo.

Brad: Ke be ke sa tsebe taba yeo.

Scott: Go na le selo seo se kgothatšago kudu seo re ithutago sona mantšung a Jesu.

Brad: Ke’ng sona seo?

Scott: Re ka kgopela Modimo gore a re thuše ka moya wa gagwe o mokgethwa maemong a thata. Re ka kgopela le gore moya wa gagwe o re thuše go ithuta therešo ka yena.

Brad: Seo se a kgahliša. Ke swanetše go nagana ka sona.

Scott: Pele ke sepela, e re ke go šie le seo o ka šalago o nagana ka sona. Ka ge moya o mokgethwa e le matla a Modimo a šomago, gona re ka dumelelana gore Modimo a ka o diriša go phethagatša selo le ge e le sefe seo a se kgethago.

Brad: Go bjalo.

Scott: Bjale ke ka baka la’ng a se a hlwa a diriša matla a ao a sa lekanywego go fediša masetlapelo ka moka le bokgopo tšeo re di bonago di tletše mo lefaseng lehono? Na o kile wa ipotšiša potšišo yeo? *

Brad: Ge e le gabotse, ke ile ka ipotšiša yona.

Scott: Go ka ba bjang ge nka boa bekeng e tlago ka yona nako ye gomme ra boledišana ka yona?

Brad: Nka thabela seo kudu. Re tla bonana ka nako yeo.

[Mongwalo wa tlase]