GO DIKOLOGA lefase, setšong se sengwe le se sengwe le bodumeding bjo bongwe le bjo bongwe, batho ba a rapela. Ba rapela ge ba nnoši; ba rapela e le dihlopha. Ba rapela ka dikerekeng, ka ditempeleng, ka disinagogeng, ka dintlong tša borapedi tša mamoseleme le mafelong a borapedi. Ba ka diriša legogwa la thapelo, pheta ya rosari, maotwana a dikološwago go sepedišana le dithapelo, diswantšho tšeo di thadilwego, dipuku tša dithapelo, goba dithapelo tšeo di ngwadilwego dikoteng tše dinyenyane tša diphaphathi tšeo di bewago dirakeng.

Thapelo ke selo seo se dirago gore batho ba fapane le diphedi tše dingwe mo lefaseng. Ke therešo gore re swana le diphoofolo ka dilo tše dintši. Go swana le tšona, re nyaka dijo, moya le meetse. Go swana le tšona, re a belegwa, re a phela e bile re a hwa. (Mmoledi 3:19) Eupša ke batho feela bao ba rapelago. Ka baka la’ng?

Mohlomongwe karabo e bonolo ke gore re swanetše go dira bjalo. Go ba gona, thapelo ka kakaretšo e bonwa e le tsela ya batho ya go ikgokaganya le lefelo la moya, le selo seo ba se lebelelago e le se sekgethwa le sa ka mo go sa felego. Beibele e bontšha gore re bopilwe re e-na le kganyogo ya dilo tše bjalo. (Mmoledi 3:11) Jesu Kriste o kile a bolela gore: “Go thaba bao ba lemogago go nyaka ga bona dilo tša moya.”—Mateo 5:3.

‘Go nyaka dilo tša moya’—motho a ka kgona bjang go hlalosa meago e megolo le diswantšho tša bodumedi, le diiri tše dintši tšeo di fetšwago go rapelwa? Ke therešo gore batho ba bangwe ba lebeletše gore bona ka noši goba batho ba bangwe ba kgotsofatše dinyakwa tša bona tša moya. Lega go le bjalo, na ga o bone gore batho ga ba na bokgoni bja go thuša ka mo go feletšego tabeng ye? Re a fokola, re phela lebaka le le nyenyane e bile re bonela kgaufsi. Ke feela motho yo bohlale kudu, yo a nago le matla, le yo a nago le kgotlelelo go re feta yoo a ka re neago seo re se nyakago. Dinyakwa tše tša dilo tša moya tšeo di re šušumeletšago go rapela ke dife?

Ela hloko: Na o kile wa ikwa o kganyoga go newa tlhahlo, bohlale, goba dikarabo tša dipotšišo tšeo go bonagalago batho ba ka se kgone go di araba. Na o kile wa ikwa o nyaka khomotšo ge o lahlegetšwe ke motho yo o mo ratago, o nyaka tlhahlo ge o lebeletšane le diphetho tšeo di kwešago bohloko, goba o nyaka tebalelo ge o ikwa o le molato?

Go ya ka Beibele, ao ke mabaka ka moka a dirago gore re rapele. Beibele ke puku e ka botwago tabeng ye, gomme e na le dipego tše dintši tša dithapelo tša banna le basadi ba botegago. Ba ile ba rapelela khomotšo, tlhahlo, tebalelo le go hwetša dikarabo tša dipotšišo tše thata.—Psalme 23:3; 71:21; Daniele 9:4, 5, 19; Habakuku 1:3.

Dithapelo tše bjalo, gaešita le ge di be di fapana, di be di e-na le selo seo di swanago ka sona. Yo mongwe le yo mongwe yo a bego a rapela o be a na le selo se bohlokwa seo se dirago gore thapelo e atlege, seo se hlokomologwago lefaseng la lehono. Ba be ba tseba gore dithapelo di swanetše go lebišwa go mang.