Beibele e Fetoša Maphelo

KE’NG seo se tutueleditšego motho yo e kilego ya ba setho sa mašole a marabele le lehodu go fetoša bophelo bja gagwe? Ke ka baka la’ng nkgwete ya karate e ile ya fetoša dipakane tša yona bophelong? Tate yo a itšego o ile a putswa bjang ka go bota morwa wa gagwe? Bala dipego tše bakeng sa go hwetša dikarabo.

“Gona Bjale ke Thabile, go sa Šetšwe Mekgwa Ya-ka e Mebe ya Nakong e Fetilego”—GARRY P. AMBROCIO

NYWAGA: 47

NAGA: PHILIPPINES

BOPHELO BJA PELE E E-BA MOKRISTE: SETHO SA MAŠOLE A MARABELE

BOPHELO BJA-KA BJA NAKONG E FETILEGO: Ke goletše motsaneng wa Vintar. Molapo o phatlaletšego woo re bego re dula go wona o be o dikologilwe ke dithaba tše ditala, dinoka tše di hlwekilego le moya o lapološago. Bophelo bo be bo le thata, go sa šetšwe maemo ao a khutšo. Batho ba be ba utswa diruiwa tša rena e bile ba hula magae a rena.

Ge ke be ke sa le mahlalagading, ke be ke e-nwa kudu le bagwera ba-ka, ke kgoga motšoko e bile ke utswa e le gore ke kgone go lefelela mekgwa ya-ka e mebe. Ke ile ka ba ka utswa mabenyabje a makgolo wa-ka. Mašole a be a belaela gore ke be ke le yo mongwe wa sehlopha sa marabele seo se bitšwago New People’s Army (NPA) gomme gantši a be a mpetha gabohloko. Ka baka leo, ke ile ka dira phetho ya go ba setho sa sehlopha seo sa marabele. Ke ile ka fetša nywaga e mehlano ke dula dithabeng le mašole a NPA. Bophelo bo be bo le thata. Re be re dula re tšhaba, re tšhabela mašole a mmušo. Mafelelong, ke ile ka lapišwa ke go utama moo dithabeng, ka go rialo ka ineela go mmušiši wa Ilocos Norte. O ile a ntshwara gabotse, gaešita le go nthuša go hwetša mošomo o mokaone. Lega go le bjalo, ke ile ka tšwela pele ke kgomaretše mekgwa ya-ka ya kgale e mebe, ke hula dintlo gotee le go tšhošetša batho.

KAMOO BEIBELE E FETOTŠEGO BOPHELO BJA-KA: Mosadi yo mongwe wa moo ke bego ke šoma gona yo a bitšwago Loida e be e le yo mongwe wa Dihlatse tša Jehofa. Ka yena, ke ile ka kopana le Jovencio, gomme o ile a thoma go ithuta Beibele le nna. Eupša ke be ke thatafalelwa ke go fetoša tsela ya-ka ya bophelo. Ke be ke kgoga pele Jovencio a fihla bakeng sa go tlo ithuta Beibele le nna, e bile ke be ke sa tšea karolo medirong yeo e sego molaong. Mafelelong, maphodisa a ile a ntshwara ke roba molao, gomme ka fetša dikgwedi tše 11 ke le kgolegong. Nakong yeo, ke ile ka rapela Jehofa, ke mo lopa gore a nthuše. Ke ile ka kgopela gore a ntebalele le gore a ntlhahle le go mmatlafatša ka moya wa gagwe o mokgethwa.

Ge nako e dutše e e-ya, yo mongwe wa Dihlatse tša Jehofa o ile a nketela kgolegong gomme a mpha Beibele. Ke ile ka e bala gomme ka ithuta gore Jehofa o na le kgaugelo le lerato e bile o lebalela dibe. Ke ile ka lemoga gore Jehofa o be a mpontšhitše kgaugelo le go mpha sebaka sa go ithuta ditsela tša gagwe. Ke ile ka mo kgopela gore a mphe matla a go fenya mekgwa ya-ka e mebe. Seo ke ilego ka se bala go Diema 27:11 se ile sa nkgoma kudu. Ke ile ka lebelela temana yeo bjalo ka ge  eka Jehofa o be a bolela le nna ka go lebanya. Temana yeo e re: “Ngwan’a-ka! Hlalefa, O nthabiše pelo, ke tsebê se nkaxo fetola sôna xe ba nnyatša.”

Ka morago ga go lokollwa kgolegong, ke ile ka thomološa go ithuta Beibele le Dihlatse, ka thoma go ya dibokeng tša tšona ka ba ka thoma go diriša melao ya motheo ya Beibele bophelong bja-ka. Mafelelong, ka thušo ya Jehofa, ke ile ka kgona go tlogela mekgwa ya-ka e mebe. Ke moka ke ile ka neela bophelo bja-ka go Jehofa Modimo.

KAMOO KE ILEGO KA HOLEGA KA GONA: Gona bjale ke thabile, go sa šetšwe mekgwa ya-ka ya nakong e fetilego. Gaešita le ge ke be ke le lekgoba la mekgwa e sa hlwekago, ke fetogile motho yo mofsa. (Bakolose 3:9, 10) Lehono, ke thabela go gwerana le batho ba Jehofa ba hlwekilego gotee le go thuša ba bangwe go ithuta mabapi le Modimo yo matla-ohle, Jehofa.

“Ke be ke Nyaka go Emela Brazil.”—JULIANA APARECIDA SANTANA ESCUDEIRO

NYWAGA: 31

NAGA: BRAZIL

BOPHELO BJA PELE E E-BA MOKRISTE: SETSEBI SA KARATE

BOPHELO BJA-KA BJA NAKONG E FETILEGO: Ke goletše Londrina. Gaešita le ge batho ba bantši lefelong leo e be e le badiidi, selete seo se be se hlwekile e bile se e-na le khutšo. Ge ke be ke e-na le nywaga e lesome, kgaetšedi wa-ka yo mogolo o ile a nkgothaletša gore ke mo tlatše ge a itlwaetša mohuta wa karate wo o bitšwago tae kwon do, yeo e rago gore “tsela ya diatla le dinao.” Tate o be a sa rate papadi yeo ya-ka e mpsha eupša go se go ye kae o ile a ineela.

Ke ile ka itlwaetša kudu gomme ka thopa sefoka diphadišanong tše dintši tša tae kwon do tša motseng wa Parana. Ka morago ke ile ka thopa sefoka diphadišanong tša setšhaba gomme ka 1993, ke ile ka tsebatšwa ke le nkgwete ya tae kwon do ya Brazil. Ke be ke nyaka go tsenela diphadišano tša ditšhabatšhaba. Lega go le bjalo, lapa lešo le be le diila gomme le se na tsela ya go ntefelela gore ke ye moše wa mawatle.

Ke be ke holofetše gore tae kwon do e be e tla akaretšwa dipapading tša di-Olympic, gomme se se ile sa phethagala mafelelong. Ke be ke nyaka go emela Brazil Dipapading tša di-Olympic, ka gona ke ile ka itlwaetša ka thata e bile ka hwetša thekgo yeo e ilego ya nkgontšha go tsenela diphadišano kua Fora, Vietnam, Korea Borwa, le Japane, gotee le Dipapading tša Amerika Borwa. Pakane ya-ka e latelago e be e le go tšea karolo Dipapading tša Pan Amerika, gomme ke ile ka dira ka bokgwari kudu moo ke ilego ka kgethwa ke le yo mongwe wa ba bararo bao ba tlago go tšea karolo dipapading tšeo kua Santo Domingo, Dominican Republic, ka 2003.

KAMOO BEIBELE E FETOTŠEGO BOPHELO BJA-KA: Ka 2001, nna le lesogana la-ka re ile ra kopana le Dihlatse tša Jehofa, gomme di ile tša thoma go ithuta Beibele le rena. Mathomong, ke be ke se na mafolofolo a go ithuta. Ke be ke dula ke lapile kudu moo ke bego ke palelwa ke go tsepamiša kgopolo gomme gantši ke otsela ge re dutše re ithuta. Lega go le bjalo, seo ke bego ke ithuta sona se ile sa fihlelela pelo ya-ka—e lego seo se bonagetšego gabotse phadišanong ya-ka e latetšego e kgolo.

Ka ge ke be ke kgethetšwe go ba sehlopheng sa Dipapadi tša Pan Amerika, ditsebi tša tae kwon do  di ile tša dira gore ke tšee karolo diphadišanong tša ma-bula-dikgoro. Ge sebaka sa-ka sa gore ke lwe se fihla, ke ile ka fo ema mmeteng—ke hloka tšhušumetšo ka mo go feletšego. Ka yona nako yeo, ke ile ka lemoga gore Mokriste ga se a swanela go lwa le ba bangwe—gaešita le dipapading! Ke ile ka gopola taelo ya Beibele ya gore “o rate moagišani wa gago go etša ge o ithata.” (Mateo 19:19) Ke ile ka fo sokologa gomme ka tloga moo lebatong la ntwa ntle le go nagana gabedi gararo. Batho ba ile ba ntebelela ba sa kgolwe.

Ge ke fihla gae, ke ile ka dula fase gomme ka nagana ka seo ke tlago go se dira ka bophelo bja-ka. Ke ile ka tšea poroutšha yeo e gatišitšwego ke Dihlatse yeo e ahla-ahlago seo Modimo a se nyakago go rena. Ka go yona ke ile ka bona tšhupetšo ya Psalme 11:5 (NW), yeo e bolelago ka Jehofa gore: “Moya wa Gagwe o hloile le ge e le mang yo a ratago bošoro.” Mantšu ao a mopsalme a ile a fihlelela pelo ya-ka gomme ke ile ka dira phetho ya go tlogela tae kwon do.

Barutiši ba-ka ba tae kwon do ba be ba se ba thaba. Ba ile ba leka go fetoša monagano wa-ka ka go mpotša gore ke sekgwari nageng le gore ke be ke le kgaufsi le go tsenela diphadišano Dipapading tša di-Olympic. Eupša ke be ke šetše ke dirile phetho.

Ka nako ye, nna le lesogana la-ka re be re nyalane. O be a šetše a tlatša Dihlatse modirong wa tšona wa go bolela phatlalatša. O be a tla boa gae a thabile kudu gomme a nkanegele ka dipoledišano ka moka tšeo a bilego natšo le batho. Ke be ke tseba gore ge e ba ke nyaka go ba le tokelo e swanago, ke be ke tla swanelwa ke go fetoša bophelo bja-ka. Ke ile ka itokolla bodumeding bja-ka bja nakong e fetilego gomme mafelelong ka swanelegela go ba Hlatse e kolobeditšwego.

KAMOO KE ILEGO KA HOLEGA KA GONA: Nna le monna wa-ka re thabile kudu e bile re batee ka gobane re katanela go diriša melao ya motheo ya Beibele lenyalong la rena. Ke thabela go mo thekga ge a dutše a thuša go hlokomela phuthego yeo re kopanelago go yona. Nkabe ke ile ka katanela go thopa mentlele wa gauta le go tuma. Eupša ke bona gore ga go selo seo lefase le leo le hlokago toka le ka se neago motho seo se ka bapišwago le tokelo ya go hlankela Jehofa Modimo.

“Tate ga se a ka a Ntlhoboga.”—INGO ZIMMERMANN

NYWAGA: 44

NAGA: JEREMANE

BOPHELO BJA PELE E E-BA MOKRISTE: MOHLOKOMEDI WA LEFELO LEO GO BINWAGO GO LONA

BOPHELO BJA-KA BJA NAKONG E FETILEGO: Ke belegetšwe ka lapeng leo le bego le sa swane ka ditumelo tša bodumedi toropong ya moepo wa malahla ya Gelsenkirchen. Tate e be e le yo mongwe wa Dihlatse tša Jehofa. Mma o be a lwantšha maiteko a tate a go godiša nna, mogolo’aka le dikgaetšedi tša rena tše dikgolo go ya ka ditumelo tša gagwe. O be a šoma diiri tše lesome goba go feta moo ka letšatši a otlela dilori. Gantši o be a thoma mošomo ka iri ya bobedi goba ya boraro mesong. Lega go le bjalo, o be dula a re fa tlwaetšo ya moya. Go dutše go le bjalo, ke be ke sa tšeele maiteko a gagwe godimo.

Ge ke be e e-na le nywaga e 15, ke ile ka lešwa bodutu ke diboka tša bodumedi tšeo a bego a dira gore ke ye go tšona gomme ke ile ka rabela. Ngwaga ka morago, ke ile ka tsena sehlopheng sa bo-ramatswele. Nywageng e mebedi e latetšego, ke ile ka itshwara ka tsela yeo e ilego ya opiša tate hlogo. Ke ile ka tšwa ka gae ge ke be ke e-na le nywaga e 18.

Ke be ke rata dipapadi kudu gomme ke itlwaetša ka makga a tshela ka beke—ke thoma ka tša  matswele ke moka ke kuka ditšhipi. Mafelo-bekeng, nna le bagwera ba-ka gantši re be re e-ya mafelong ao go bego go binwa go ona. Lebakeng le lengwe, ke ile ka lwa le moreki yo mongwe yo a tšhošago eupša ke ile ka mo fenya gabonolo. Mong wa lefelo leo o ile a mpona gomme a nkholofetša mošomo wa go ba mohlokomedi le semeetseng. Tšhelete yeo a bego a nkholofetša yona e be e le e ntši, ka gona ke ile ka o amogela.

Mafelo-bekeng a mangwe le a mangwe, ke be ke ema mojakong wa lefelo leo gomme ke dira phetho ya gore go tsena mang ga go tsene mang. Lefelo le be le tlala ka batho bao ba bego ba fihla go 1 000, ka baka leo ke be ke dula ke swaregile. Dintwa di be di tlwaelegile. Ke be ke tšhošetšwa ka dithunya le ka mapotlelo a pšhatlegilego. Ba bangwe ba bao ke bego ke gana ba tsena goba ke bego ke ba lahlela ka ntle ba be ba nkemela ka ntle e le gore ba tle ba itefeletše. Ke be ke e-na le nywaga e 20 gomme ke nagana gore ga go yo a ka mphenyago. Lega go le bjalo, ge e le gabotse ke be ke sa laolege—ke le bogale, ke ikgantšha, ke rata go ba le maemo e bile ke le hlogo-thata.

KAMOO BEIBELE E FETOTŠEGO BOPHELO BJA-KA: Tate ga se a ka a ntlhoboga. O ile a rulaganya gore dimakasine tša Morokami le Phafoga! * di romelwe moo ke bego ke dula gona. Di be di pakelane ka phapošing ya-ka—di se tša balwa. Ke moka letšatšing le lengwe ke ile ka dira phetho ya go phetla tše dingwe tša tšona. Dihlogo tšeo ka go di bala tša mabapi le kamoo tshepedišo ya gona bjale ya dipolitiki, ya tša boiphedišo le ya bodumedi di tlago go fela ka gona di ile tša nkgoma kudu moo ke ilego ka leletša kgaetšedi ya-ka mogala. Yena le monna wa gagwe e be e le Dihlatse tša Jehofa. Ba ile ba mpotša gore ba nyaka go bala Beibele le nna gomme ke ile ka dumela.

Molao wa motheo wo o lego go Bagalatia 6:7 o ile wa ntšhušumeletša go dira diphetogo bophelong bja-ka. Ke be ke e-na le maitemogelo a gore selo se sengwe le se sengwe seo ke se dirago, ke se bolelago goba ke dirago phetho ya sona lehono se tla kgoma bophelo bja-ka ka moso. Ke ile ka ba ka kgothatšwa kudu ke taletšo e lego go Jesaya 1:18, yeo e rego: “Tlang xê, re sekišaneng!—Xo bolêla Morêna.—Le xe dibe tša lena di hubetše bo-ka madi, di tlo šweufala wa leswêla.” Lengwalo leo le nthušitše go tloga mathomong a thuto ya-ka gore ke se ke ka ikwa ke sa swanelege goba go bona eka go ka se kgonege gore ke boele go Jehofa.

Ka dikgwedi tše tshela, ke ile ka dira diphetogo tše dikgolo bophelong bja-ka eupša go be go se bonolo. Ke ile ka swanelwa ke go tlogela boemo bjo bo gobogilego le bagwera ba go ba le ditshele bao ke ilego ka dira gore ba ntikologe. Ka gona ke ile ka thoma go botša bagwera ba-ka gore ke be ke ithuta Beibele e bile ke ba botša seo ke bego ke ithuta sona. Ba ile ba thoma go mphema e bile ba mpitša moruti. Ka thušo ya kgaetšedi ya-ka, ke ile ka hwetša mošomo o mongwe wo o swanelegago kudu.

Ke ile ka ba ka thoma go ya dibokeng Holong ya Mmušo yeo kgaetšedi ya-ka le monna wa gagwe ba bego ba kopanela go yona, gaešita le ge e be e le bokgoleng bja dikhilomithara tše 30. Go be go e-na le Holo ya Mmušo kgaufsi le gae, eupša ke be ke tšhaba go kopana le batho bao ba ntsebago go tloga bjaneng. Ke be ke tšhaba le go ya ka ntlo le ntlo, go dira boboledi lefelong leo ke phetšego go lona. Go tla thwe’ng ge nka kopana le motho yoo ke ilego ka mo raka lefelong leo go binwago go lona morago-bjale goba motho yoo ke ilego ka mo fa dihlare-tagi? Lega go le bjalo, ke ile ka ithuta go tšwa tlwaetšong ya-ka ya go kuka ditšhipi, gore ditsela tša go itšhidulla tšeo di lego thata ke tšona tšeo di lego bohlokwa le go feta. Ka baka leo, gatee-tee ge ke se na go swanelega go dira bjalo, ke ile ka dira boboledi kudu ka mo nka kgonago.

Go be go e-na le tlhohlo e nngwe yeo ke bego ke swanetše go e fenya—ke be ke sa rate go bala goba go ithuta. Eupša ke be ke tseba gore ge e ba ke nyaka go ba le tumelo e tiilego, ke be ke swanetše go itaya gore ke epe ditherešo tšeo di hwetšwago ka Beibeleng. Ke ile ka lemoga gore go fo swana le go kuka ditšhipi, o swanetše go dira maiteko ge e ba o nyaka go hwetša matla.

KAMOO KE ILEGO KA HOLEGA KA GONA: Ke sa phela! Ke sa dutše ke swanetše go hlokomela gore mafokodi a-ka a se ke a mphenya. Eupša ga bjale ke thabela bophelo bjo bo kgahlišago bja lapa le mosadi wa-ka, yo a nago le semelo se sebotse sa Bokriste. Go Dihlatse tša Jehofa, ke na le bagwera ba kgonthe bao nka ba botago ka mo go feletšego. Tate o hwile nywaga e mehlano e fetilego, eupša pele a e-hwa o bile le tokelo ya go amogela morwa wa gagwe gape.

[Mongwalo wa tlase]