Seo re Ithutago Sona go Jesu

Kamoo Dibopiwa tša Moya di re Kgomago ka Gona

Jesu o phetše lefelong la moya le Tatagwe “pele lefase le e-ba gona.” (Johane 17:5) Ka gona, o swanelega gabotse go araba dipotšišo tše di latelago.

Na barongwa ba a re kgahlegela?

▪ Go Jesu re ithuta gore barongwa ba kgahlegela batho kudu. O itše: “Lethabo e ba le legolo gare ga barongwa ba Modimo ka baka la modiradibe o tee yo a itsholago.”—Luka 15:10.

Jesu o utollotše gore barongwa ba neilwe boikarabelo bja go thuša bahlanka ba Modimo gore ba phele gabotse moyeng. Ka gona, ge Jesu a be a lemoša barutiwa ba gagwe ka go kgopiša ba bangwe, o itše: “Bonang gore le se ke la nyatša yo mongwe wa ba banyenyane ba; gobane ke le botša gore barongwa ba bona legodimong ka mehla ba bona sefahlego sa Tate yo a lego legodimong.” (Mateo 18:10) Ka go rialo, Jesu o be a sa nape a e-ra gore yo mongwe le yo mongwe wa bahlanka ba gagwe o na le morongwa yo a abetšwego go mo leta. Eupša Jesu o be a bontšha gore barongwa bao ba šomago kgaufsi le Modimo ba kgahlegela ditho tša phuthego ya Bokriste.

 Diabolo a ka re gobatša bjang?

▪ Jesu o lemošitše balatedi ba gagwe gore Sathane o leka go thibela batho go ithuta therešo ka Modimo. Jesu o itše: “Moo motho a kwago lentšu la mmušo eupša a se le kwešiše, yo mobe o a tla gomme a ubula se se bjetšwego pelong ya gagwe.”—Mateo 13:19.

Jesu o ile a pepentšha tsela ya Sathane ya go fora batho ge a be a botša batho seswantšho mabapi le monna yo a bjetšego peu ya korong tšhemong ya gagwe. Monna yo o be a emela Jesu, gomme korong e emela Bakriste ba therešo bao ba tlago go buša le Jesu legodimong. Lega go le bjalo, Jesu o itše lenaba le ile la tla gomme la “bjalelela mefoka gare ga korong.” Mefoka e emela Bakriste ba maaka. “Lenaba le le e bjetšego ke Diabolo.” (Mateo 13:25, 39) Bjalo ka ge mefoka e ka swana le korong, bao ba ipolelago gore ke Bakriste ba ka bonala eka ke barapedi ba therešo. Madumedi ao a rutago dithuto tša maaka a fora batho gore ba se kwe Modimo. Sathane o diriša bodumedi go amoga batho segwera sa bona le Jehofa.

Re ka thibela Sathane bjang gore a se re gobatše?

▪ Jesu o biditše Sathane gore ke “mmuši wa lefase.” (Johane 14:30) Ge Jesu a be a boledišana le Modimo ka thapelo, o utollotše tsela yeo re ka šireletšwago ka yona go Sathane. Jesu o rapetše Tatagwe wa legodimong mabapi le barutiwa ba gagwe a re: “O ba šireletše ka baka la yo kgopo. Bona ga se karolo ya lefase go etša ge nna ke se karolo ya lefase. Ba kgethagatše ka therešo; lentšu la gago ke therešo.” (Johane 17:15-17) Tsebo ya Lentšu la Modimo e ka re šireletša tutuetšong ya lefase leo le bušwago ke Sathane.

Barongwa ba re kgoma bjang lehono?

▪ Jesu o itše: “Bofelong bja tshepedišo ya dilo: barongwa ba tla tšwa gomme ba hlaola ba kgopo go ba lokilego.” (Mateo 13:49) Ga bjale re phela “bofelong bja tshepedišo ya dilo,” gomme ba dimilione ba arabela ditabeng tše dibotse tša Mmušo wa Modimo.—Mateo 24:3, 14.

Eupša ga se bohle bao ba thomago go ithuta Lentšu la Modimo bao a ba amogelago. Barongwa ba hlahla modiro wa bahlanka ba Jehofa, gomme batho bao ba ratago Modimo e le ka kgonthe ba aroganywa le bao ba sa nyakego go diriša seo ba ithutago sona. Ge Jesu a hlalosa bao ba amogelwago ke Modimo, o itše: “Ba ke bao ka morago ga go kwa lentšu ka pelo e botse le e bolo, ba le bolokago gomme ba enywa dienywa ka kgotlelelo.”—Luka 8:15.

Bakeng sa tsebišo e oketšegilego, bona kgaolo 10 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Seswantšho go letlakala 16]

Barongwa ba tšea karolo go kgobokeletšeng batho ba botegago ka phuthegong ya Bokriste