Sephiri 4

Kgetha Bagwera ba Gago ka Bohlale

KE ENG SEO BEIBELE E SE RUTAGO? “Šika le bahlale O hlalefê.”—Diema 13:20.

GO NA LE TLHOHLO EFE? Bagwera ba rena ba ka dira gore re kgotsofale kudu goba ba fokodiša kgotsofalo ya rena. Tshekamelo ya bona le dipolelo tša bona di tla feleletša di kgoma pono ya rena ka bophelo.—1 Bakorinthe 15:33.

Ka mohlala, ela hloko pego ya Beibele ya banna ba 12 bao ba bego ba ile go hlola naga ya Kanana. Bontši bja bona ba ile ba ‘senya naga yeo ye ba bego ba ile go e hlola mo go Baisiraele.’ Lega go le bjalo, ba babedi ba banna bao ba ile ba bolela gabotse ka Kanana, ba e bitša “naxa e botse ka kudu.” Eupša tshekamelo e fošagetšego ya dihlodi tše lesome e ile ya phatlalala bathong. Pego e re: “Ba phuthêxô ka moka ba hlatloša dikolomêlô . . . Ba-Isiraele ka moka ba [omana].”—Numeri 13:30–14:9.

Ka mo go swanago le lehono, batho ba bantši “ke bangongoregi, babelaedi ba belaelago ka kabelo ya bona bophelong.” (Juda 16) Go thata go dula o kgotsofetše ge o e-na le bagwera bao ba sa kgotsofalego.

O KA DIRA’NG? Seka-seka dipoledišano tšeo o bago le tšona le bagwera ba gago. Na bagwera ba gago gantši ba ikgantšha ka dilo tšeo ba nago le tšona, goba na ba dula ba belaela ka dilo tšeo ba se nago natšo? Le gona, o mogwera wa mohuta mang go bona? Na o katanela go dira gore bagwera ba gago ba go hufegele, goba o ba kgothaletša go kgotsofalela seo ba nago le sona?

Ela hloko mohlala wa Dafida, yoo e bego e tlo ba kgoši, le Jonathane, morwa wa Kgoši Saulo. Dafida o be a phela e le motšhabi lešokeng. Kgoši Saulo o be nagana gore Dafida o nyaka maemo a gagwe, ka gona o be a nyaka go mmolaya. Gaešita le ge ka tlwaelo Jonathane a be a tla hlatlama Saulo bjalo ka kgoši, o ile a ba yo mongwe wa bagwera ba Dafida ba kgaufsi. Jonathane o ile a lemoga gore Modimo o kgethile Dafida gore e tle e be kgoši e latelago gomme o be a kgotsofalela go thekga mogwera wa gagwe.—1 Samuele 19:1, 2; 20:30-33; 23:14-18.

O nyaka bagwera ba bjalo, bao ba katanelago go kgotsofala le bao ba go kganyogelago tše dibotse. (Diema 17:17) Go ba gona, gore o hwetše bagwera ba mohuta woo, le wena o swanetše go bontšha dika tše bjalo.—Bafilipi 2:3, 4.

[Seswantšho go letlakala 7]

Na bagwera ba gago ba dira gore o kgotsofale kudu goba na ba fokodiša kgotsofalo ya gago?