Sephiri 5

Kgotsofatša Senyakwa sa Gago sa Moya

KE ENG SEO BEIBELE E SE RUTAGO? “Go thaba bao ba lemogago go nyaka ga bona dilo tša moya.”—Mateo 5:3.

GO NA LE TLHOHLO EFE? Go na le madumedi a dikete a sa swanego, ao a mantši a ona a rutago ditsela tšeo di thulanago mabapi le go kgotsofatša senyakwa sa gago sa moya. O tla tseba bjang bjoo bo rutago therešo le bjoo bo kgahlago Modimo e le ka kgonthe? Bangwadi ba bangwe bao ba tumilego ba šišinya gore go dumela go Modimo le go ineela go yena ke bogafsi, e bile go kotsi. Makasine wa Maclean’s o nea kakaretšo ya dipono tša moila-modimo yo mongwe ka tsela ye: “Kgopolo ye ya Bokriste, ya gore go na selo se sengwe seo se phagametšego thutamahlale le dikgopolo tša rena . . . e nyenyefatša bophelo bjoo re nago le bjona gomme e dira gore re sekamele bošorong.”

O KA DIRA’NG? Hlahloba bohlatse bja gore Modimo o gona. (Baroma 1:20; Baheberu 3:4) O se ke wa dumelela motho a go nyemiša moko gore o se nyake dikarabo tša dipotšišo tše bohlokwa, tše bjalo ka tše di latelago: Ke ka baka la’ng re le mo? Na go na le bophelo ka morago ga lehu? Ke ka baka la’ng go e-na le tlaišego gakaaka? Ke’ng seo Modimo a se nyakago go nna? Go hwetša dikarabo tše di kgotsofatšago tša dipotšišo tše ke mogato o bohlokwa wa go hwetša kgotsofalo e swarelelago.

Lega go le bjalo, o se ke wa fo dumela selo se sengwe le se sengwe seo batho ba go botšago sona. Lentšu la Modimo le go kgothaletša go diriša ‘matla a gago a tlhaologanyo’ gore o itlhatselele seo a se amogelago. (Baroma 12:1, 2) O tla hwetša moputso wa maiteko a gago. Ge o ipha nako ya go ithuta Beibele le go diriša keletšo ya yona e šomago, o tla efoga mathata, wa fokotša dipelaelo gomme wa oketša lethabo la gago bophelong. Ye ke kholofetšo yeo o ka e botago. Batho ba dimilione ba ditlogo ka moka ba hotšwe ke go ithuta therešo ka Modimo le merero ya gagwe. Ka mohlala, bala dipego tša kgonthe tša bophelo go matlakala 18 go ya go 21 ka makasineng wo.

Ge o dutše o holwa ke go diriša keletšo e bohlale ya Beibele, boineelo bja gago go Modimo bo tla tsenelela. Ke ka baka la’ng o sa amogele taletšo ya go ithuta Beibele le Dihlatse tša Jehofa? Ge o ka dira bjalo, o ka dumelelana le moapostola Paulo yo a ngwadilego gore: “Boineelo bjo go Modimo gotee le kgotsofalo ke mokgwa wa go hwetša leruo le legolo.”—1 Timotheo 6:6.

[Seswantšho go letlakala 8]

Itlhatselele seo se amogelegago go Modimo