Na go a Kgonega Gore Motho a Kgotsofale?

“Kgotsofalo e humiša badiidi; go se kgotsofale go dira gore bahumi ba diile.”—Benjamin Franklin.

GO DUMELELANA le seema se, ba bantši ba ithutile gore kgotsofalo ga e rekwe. Ga go makatše ge kgotsofalo—maikwelo a ka gare a go kgotsofala—e bonala e sa hwetšagale lefaseng leo le godišago kganyogo ya go kgoboketša dithoto tše dintši, ya go atlega dilong tše dintši, goba ya go phela bophelo bjoo bo phelwago ke batho ba bangwe! Na go na le se sengwe sa dilo tše seo se go kgomago?

• Babapatši ba go hlasela ka molaetša wa gore kgotsofalo e tlišwa ke go reka selo se itšego.

• Phadišano mošomong goba sekolong e go kgothaletša go nagana gore o ka ba motho yo kaone ge feela o dira dilo ka moka tšeo di dirwago ke batho ba bangwe.

• Batho ga ba leboge seo o ba direlago sona.

• Bagwera ba dira gore o hufegele seo ba nago le sona.

• Ga o hwetše dikarabo tša dipotšišo tše bohlokwa bophelong.

Ka ge re lebeletšane le ditlhohlo tše bjalo ka tše, na ruri go a kgonega gore motho a kgotsofale? Moapostola Paulo o ile a bolela ka “sephiri sa go kgotsofala.” Ka dinako tše dingwe, o be a atelwa ke dilo gomme ka dinako tše dingwe a hlaelelwa ke tšona. O be a ratwa ke bagwera ba gagwe eupša a kwerwa ke ba bangwe. Lega go le bjalo, o boletše gore, “Ke ithutile go kgotsofala go sa šetšwe gore boemo ke bofe.”—Mongwalo o sekamego ke wa rena; Bafilipi 4:11, 12, New International Version.

Kgotsofalo ke sephiri go bao ba sa kago ba gata mogato wa go e hwetša, eupša bjalo ka ge Paulo a boletše, motho a ka ithuta go kgotsofala. Ga bjale re go laletša gore o hlahlobe diphiri tše hlano tša go hwetša kgotsofalo tšeo di hwetšwago ka Lentšung la Modimo, Beibele.