Na ke Swanetše go ba Setho sa Sehlopha sa Bodumedi?
Babadi ba Rena ba a Botšiša . . .
Na ke Swanetše go ba Setho sa Sehlopha sa Bodumedi?
▪ Na o boifa go tsenela sehlopha sa bodumedi ka baka la gore o tennwe ke boikaketši le go se kwane ga batho bao ba tsenago kereke gaešita le ke baruti? Ge e ba go le bjalo, seema sa Sefora se ka hlalosa kamoo o ikwago ka gona, ge se re, “Yo a lego kgaufsi le kereke, gantši o kgole le Modimo.”
Mohlomongwe o hlompha Beibele gomme o nagana gore mebušo le batho ba swanetše go hlompha tshwanelo ya motho ya go ba setho sa sehlopha se itšego sa bodumedi. Eupša o ka ipotšiša gore, ‘Na Modimo o re bao ba nyakago go mo rapela ka tsela e amogelegago ba swanetše go ba ditho tša bodumedi bjo bo rulagantšwego?’
Karabo e kopana ke ee. Ke ka baka la’ng re ka kgodišega? Na mokgatlo o mongwe le o mongwe wa bodumedi o a amogelega?
Ela hloko mohlala wa Jesu. Na e be e le setho sa bodumedi bjo bo rulagantšwego? Ge Jesu e be e sa le yo monyenyane, o be a sepela le ditho tša lapa labo la Bajuda le ba bangwe bao ba bego ba tlwaetše go ya tempeleng kua Jerusalema gore a tšee karolo borapeding bjo bo rulagantšwego. (Luka 2:41-43) Ge e šetše e le yo mogolo, o be a e-ba gotee le Bajuda ba bangwe ge ba rapela Modimo sinagogeng ya kgaufsi. (Luka 4:14-16) Ge Jesu a be a boledišana le mosadi yo mongwe wa bodumedi bjo bo fapanego le bja gagwe, o itše: “Re rapela se re se tsebago.” (Johane 4:22) Jesu mo o ile a itlhatsela e le setho sa bodumedi bja Sejuda.
Ka morago, Jesu o boletše gore ka baka la gore setšhaba sa Bajuda se mo latotše, Modimo o tla latola mokgwa wa sona wa borapedi woo o šilafetšego. (Mateo 23:33–24:2) Lega go le bjalo, o ile a bontšha gore bao ba nyakago go rapela Modimo ka tsela e amogelegago ba swanetše go ba ditho tša sehlopha seo se rulagantšwego. O boditše balatedi ba gagwe gore: “Bohle ba tla tseba ka se gore le barutiwa ba-ka, ge e ba le ratana.” (Johane 13:35) Morutiwa wa Kriste yo a sa kopanego le badumedi gotee le yena a ka se kgone go ba bontšha lerato. Ge e le gabotse, Jesu o boletše ka go lebanya gore go na le ditsela tše pedi feela tša bodumedi. O hlalositše tsela e nngwe e le “e petleke e bile e phatlaletše” yeo e “e išago tshenyegong.” O boletše mabapi le tsela e nngwe gore: “Kgoro ke e tshesane gomme tsela e išago bophelong e pitlagane, le gona ke ba sego kae ba ba e hwetšago.”—Mateo 7:13, 14.
Ka gona, go molaleng gore ga se tsela e nngwe le e nngwe ya bodumedi yeo e amogelegago. Beibele e re lemoša kgahlanong le go ikopanya le bao ba “nago le sebopego sa borapedi, eupša ba latola matla a bjona.” Lentšu la Modimo le tšwela pele go hlalosa gore, “o furalele ba bjalo.” (2 Timotheo 3:5, PK) Ka lehlakoreng le lengwe, re holega kudu ge re lemoga le go ikopanya le bao ba sepelago tseleng e yago bophelong. Re hwetša kgothatšo le thekgo gona bjale gotee le kholofelo e phadimago ya bokamoso.—Baheberu 10:24, 25.
O ka tseba bjang sehlopha sa bodumedi seo se lego tseleng e pitlaganego? Ke ka baka la’ng o sa hlahlobe dikarabo tšeo di theilwego Beibeleng go kgaolo 15 ka pukung ya Ke Eng Seo ge e le Gabotse Beibele e se Rutago? * Kgatišo ye e ka go thuša go dira diphetho tšeo di theilwego tsebong mabapi le gore ke sehlopha sefe sa bodumedi seo o swanetšego go ba setho sa sona.
[Mongwalo wa tlase]
^ ser. 9 E gatišitšwe ke Dihlatse tša Jehofa.