Dipono Mabapi le Lefelo la Moya

LEBELELA lefaufau nako e telele ka mo o ka kgonago, eupša o ka se bone motho wa moya. Theetša, eupša o ka se kwe a bolela. Lega go le bjalo, o ka kgonthišega gore batho ba moya ba gona. Ba na le bohlale bjo bo phagamego le matla, e bile yo mongwe le yo mongwe o na le leina la gagwe le semelo sa gagwe. Ba bangwe ba re direla tše dibotse; mola ba bangwe ba nyaka go re gobatša. Ka moka ga bona ba a re kgahlegela.

Modimo wa therešo ka boyena ke Moya. (Johane 4:24) O na le leina la moswana-noši leo le mo hlaolago go medimo e mentši ya maaka. Leina la gagwe ke Jehofa. (Psalme 68:4) Mopsalme o ngwadile gore: “Jehofa ke e mogolo, o swanetšwe ke go tumišwa ka gogolo, o tšhabega go fetiša medimo ka moka. Gobane medimo ka moka ya ditšhaba ke diswantšho feela, eupša Jehofa o dirile legodimo. Borena le letago di pele ga sefahlego sa gagwe, matla le bothakga di sekgethweng sa gagwe.”—Psalme 96:4-6, PK.

Dipono Mabapi le Modimo wa Therešo

Beibele e re botša gore: “Ga go motho yo a kilego a bona Modimo ka nako le ge e le efe.” (Johane 1:18) Re ka se kgone go kwešiša ponagalo ya gagwe le letago la gagwe, go fo swana le ge motho yo a belegwego e le sefofu a ka se kgone go kwešiša mebala. Eupša go fo swana le ge morutiši yo botse a hlalosa dilo tše di raraganego ka mantšu ao barutwana ba gagwe ba a kwešišago, Modimo le yena, ka Lentšu la gagwe, Beibele, o hlalosa dilo tšeo re sa kgonego go di bona a diriša dilo tšeo re ka di bonago. Ka dipono tše di buduletšwego tšeo di bontšhitšwego babotegi ba mehleng ya bogologolo, Jehofa o re thuša go bona magodimo ka leihlo la kgopolo le go kwešiša tswalano ya rena le bao ba dulago moo.

Ka mohlala, pono e nngwe yeo e ilego ya bonwa ke Hesekiele e tswalanya letago la Jehofa le mollo, phadimo, lefsika la safire le molalatladi. Ponong e nngwe, moapostola Johane o bona Jehofa a le sedulong sa gagwe sa bogoši e bile o bolela gore Modimo “ka ponagalo o swana le lefsika la jasepere le lefsika la bohlokwa la mmala o mohwibidu,” a oketša ka gore “go dikologa sedulo sa bogoši go na le molalatladi o swanago le emeralede ka ponagalo.” Ditlhaloso tše bjalo di re botša gore go ba gona ga Jehofa ke mo gobotse kudu, mo go kgahlišago le ga khutšo.—Kutollo 4:2, 3; Hesekiele 1:26-28.

Moporofeta Daniele le yena o ile a bona Jehofa ponong, yeo go yona a bonego “ba [dibopiwa tša moya] dikete tše lesome ga dikete tše lesome ba [eme] pele ga [Jehofa].” (Daniele 7:10, PK) Pono yeo e swanetše go ba e be e kgahliša e le ruri! Go bona morongwa o tee, gaešita le ponong, e tla ba mo go kgahlišago ka tsela e makatšago, eupša leka go akanya ka barongwa ba dikete tše masome!

 Go bolelwa ka barongwa ka makga a e nyakilego go ba a 400 ka Beibeleng, gomme maemo a bona a akaretša baserafi le bakerubi. Mantšu a Segerika le Seheberu ao a fetoletšwego e le “morongwa” ka Beibeleng, bobedi bja ona a ra gore “motseta.” Ka baka leo barongwa ba ka boledišana, gomme nakong e fetilego ba ile ba boledišana le batho. Barongwa ga se ya ka ya ba batho bao ba kilego ba phela mo lefaseng. Jehofa o hlotše diphedi tše tša moya kgale pele a ka hlola motho.—Jobo 38:4-7.

Ponong ya Daniele, barongwa ba bantši ba be ba kgobokanetše go tlo hlatsela tiragalo e bohlokwa kudu. Ke moka Daniele o ile a bona “e mongwê . . . e kexo ké Morwa-motho” a batamela sedulo sa bogoši sa Jehofa gore a newe “boxoši le kxodišô le mmušô; dithšaba ka moka le merafô le maleme ya ba bahlanka ba xaxwe.” (Daniele 7:13, 14) “Morwa-motho,” yo a nago le boikarabelo bjo bohlokwa lefelong la moya, ke Jesu Kriste yo a tsošitšwego bahung, yoo a filwego bogoši bja lefase ka moka. Kgaufsinyane, pušo ya gagwe e tla tšeela legato mebušo ka moka ya batho gomme ya fediša bolwetši, manyami, kgatelelo, bodiidi, gaešita le lehu.—Daniele 2:44.

Go bewa ga Jesu sedulong sa bogoši ka ntle le pelaelo go ile gwa thabiša kudu barongwa ba bantši bao ba botegago, bao ba kganyogelago batho tše dibotse. Lega go le bjalo, se se nyamišago ke gore ga se dibopiwa ka moka tša moya tšeo di ilego tša ikwa ka tsela yeo.

Manaba a Modimo le Batho

Mathomong a histori ya batho, yo mongwe wa barongwa o ile a tutuetšwa ke kganyogo ya go rapelwa gomme a rabela malebana le Jehofa ke moka a itira Sathane, yeo e rago gore “Moganetši.” Ka ge e le mothofatšo yo mogolo wa bobe,  Sathane o kgahlanong le Jehofa, yoo e lego mothofatšo wa lerato. Barongwa ba bangwe ba ile ba tlatša Sathane borabeleng bja gagwe. Beibele e ba bitša gore ke batemona. Go swana le Sathane, batemona ba iphetotše manaba a sehlogo a batho ka moka. Bontši bja tlaišego e lego mo lefaseng, go hloka toka, bolwetši, bodiidi le dintwa ke mafelelo a tutuetšo ya bona.

Gaešita le ge dikereke tše dintši tša Bojakane di se sa hlwa di bolela ka Sathane, puku ya Beibele ya Jobo e nea tshedimošo mabapi le semelo gotee le maikemišetšo a morongwa yo wa lerabele. E re: “Ya re ka ’tšatši le lengwê, xe Barwa ba Modimo ba tlile ba êma pele xa Morêna, Sathane le yêna a tla à le xare xa bôná.” Poledišanong e latetšego, Sathane ka lenyatšo o ile a re Jobo o be a hlankela Modimo feela ka baka la seo a bego a se hwetša. Ka maiteko a go hlatsela tatofatšo ya gagwe, Sathane o ile a tlišetša Jobo masetlapelo a magolo, a bolaya diruiwa tša gagwe gotee le bana ba gagwe ka moka ba lesome. Ka morago ga moo, o ile a otla Jobo ka dišo tše di šišimišago tšeo di ilego tša mo tšwa mmele ka moka. Ditlhaselo tša Sathane ka moka di ile tša palelwa ke go hlatsela ntlha ya gagwe.—Jobo 1:6-19; 2:7.

Go na le mabaka a kwagalago ao ka ona Jehofa a kgotleletšego Sathane nako e telele ka tsela ye, eupša a ka se mo kgotlelele go ya go ile. Go se go ye kae Diabolo o tla fedišwa. Megato ya mathomo e šetše e gatilwe gomme e hlaloswa ka pukung ya Kutollo, yeo go yona go utollwago tiragalo e nngwe gape e bohlokwa ya lefelong la moya yeo re bego re ka se kgone go e bona. Re bala gore: “Ntwa ya tsoga legodimong: Mikaele [Jesu Kriste yo a tsošitšwego bahung] le barongwa ba gagwe ba lwa le drakone [Sathane], gomme drakone le barongwa ba yona ba lwa, eupša ya se ke ya fenya, le gona gwa se ke gwa hlwa go hwetšwa madulo a bona legodimong. Ka gona drakone e kgolo ya lahlwa, yona noga ya kgale, ye e bitšwago Diabolo le Sathane, ye e timetšago lefase ka moka le go agilwego go lona; ya lahlelwa lefaseng gomme barongwa ba yona ba lahlwa le yona.”—Kutollo 12:7-9.

Ela hloko gore go thwe Sathane o “[timetša] lefase ka moka le go agilwego go lona.” O timetša batho ka go godiša maaka a bodumedi go ba aroša go Jehofa le Lentšu la gagwe. A mangwe a maaka a bjalo ke a gore motho yo mongwe le yo mongwe ge a e-hwa o fetela lefelong la moya. Go na le dikgopolo tše dintši tše di fapa-fapanego mabapi le taba ye. Ka mohlala, ba bantši Afrika le Asia ba dumela gore batho ge ba e-hwa ba fetela lefaseng la moya leo go lona go nago le bagologolo ba bona. Thuto ya pakatori le ya dihele le tšona di theilwe kgopolong ya gore motho o tšwela pele a phela ge a hwile.

Na Batho ge ba E-hwa ba ya Legodimong?

Lega go le bjalo, go thwe’ng ka tumelo yeo ba dimilione lefaseng ka bophara ba nago le yona ya gore batho ka moka ba lokilego ba ya legodimong? Ke therešo gore batho ba ba bangwe ba lokilego ba ya moo, eupša palo ya bona ke e nyenyane ge e bapišwa le ya ba dimilione tše dikete bao ba hwilego. Beibele e utolla gore batho ba 144 000 ba tla ‘rekwa lefaseng’ le gore ba tla hlankela e le “baperisita” le “dikgoši godimo ga lefase.” (Kutollo 5:9, 10; 14:1, 3) Ba e-na le Morwa-motho, e lego Jesu Kriste, ba tla bopa pušo ya legodimong, e lego Mmušo wa Modimo. Pušo yeo e tla fediša Sathane le batemona ba gagwe gomme ya dira lefase paradeise. Ba bantši bao ba hwilego ba tla bušetšwa bophelong nakong e tlago ba e-na le tebelelo ya go phela ka mo go sa felego Paradeiseng yeo mo lefaseng.—Luka 23:43.

Ka gona, ge re akaretša taba ye re ka re, go na le ba bantši ba phelago lefelong la moya. Yo a phagamego go bona ke Jehofa Modimo, Mohlodi wa dilo ka moka tše di phelago. O hlankelwa ka potego ke barongwa ba dikete tše masome. Ba rongwa ba bangwe, ba eteletšwe pele ke Sathane, ba ile ba rabela malebana le Jehofa gomme ba katanela go timetša batho. Go oketša moo, palo e lekanyeditšwego ya batho e ‘rekilwe,’ goba e kgethilwe, lefaseng bakeng sa go yo rwala boikarabelo bjo bo kgethegilego legodimong. Re dutše re nagana ka seo, ga bjale a re ahla-ahleng yoo re ka ikgokaganyago le yena lefelong la moya le kamoo re swanetšego go ikgokaganya le yena ka gona.