Modimo ke “Yêna wa xo Dira tše Dikxolo”—Kamoo ke Tsebilego Seo ka Gona

Ka ge go anega Maurice Raj

Lapa lešo, gotee le bafaladi ba bangwe ba dikete, le ile la tšhabela e nngwe ya ditlhaselo tše šoro kudu tša Ntwa ya II ya Lefase. Re ile ra sepela matšatši re phatša sethokgweng se se bofaganego sa Burma, re robala ka fase ga mehlare bošego. Ke be e-na le nywaga e senyane. Sephuthelwana seo ke bego ke se beputše se be se e-na le dilo tša-ka ka moka. Eupša se e be e le feela mathomo.

E BE e le ka ngwaga wa 1942. Lefase le be le le ntweng, gomme re be re tšhabela madira a Majapane ao a bego a batamela. A be a sa tšo hlasela Burma, yeo ga bjale e tsebjago e le Myanmar, gomme a thopile mašemo a oli a Yenangyaung. Pele re ka fihla mollwaneng wa India, mašole a Majapane a ile a re hwetša gomme a re gapeletša gore re boele gae.

Ge ke be ke sa le ngwana, re be re dula Yenangyaung, moo tate a bego a šomela Khamphani ya Oli ya Burmah. Ka morago ga go thopša ke Majapane, mašemo a humilego a oli a Yenangyaung a ile a hlaselwa ka go thuthupša ka dipomo ke Mabrithania a diriša difofane tša ntwa. Lebakeng le lengwe, lapa lešo le ile la khuta ka mokerong matšatši a mararo ge dipomo di dutše di thuthupa go re dikologa. Mafelelong re ile ra tšhaba ka sekepe ra ya Sale, torotswana e lego Nokeng ya Ayeyarwady, goba Irrawaddy. Re leboga gore re sa phela, re ile ra dula moo go fihlela ntwa e fela.

Masetlapelo a Lebiša Therešong

Moratho wa-ka o ile a belegwa ka 1945, e lego ngwaga woo Ntwa ya II ya Lefase e fedilego ka wona. Tate o be a thabetše go ba le ngwana nywageng ya gagwe ya botšofadi. Eupša lethabo la gagwe e ile ya ba la nakwana. Dikgwedi tše tharo ka morago moratho wa-ka o ile a hwa. Tate o ile a hwa ka baka la manyami nakwana ka morago ga moo.

Ge ba leka go nkhomotša, bagwera ba-ka ba ile ba re Modimo o tšere tate le moratho wa-ka gore ba be le Yena legodimong. Ruri ke be ke hlologela go ba le bona! Lapa lešo le be le tsena kereke ya Katholika, moo ke ilego ka ithuta la mathomo ka bodumedi. Ke ile ka rutwa gore baruti le baitlami ba basadi ba ya legodimong, mola ba bangwe ba swanetše go fetša nako ba le pakatoring, e lego lefelo leo ba hlokofatšwago ka nakwana bakeng sa go hlwekišwa dibe. Ke ikemišeditše go tlo kopanywa le tate le moratho wa-ka, ke ile ka fetša le mogopolo gore ke tla ya sekolong sa boruti sa Katholika toropong ya Maymyo, yeo ga bjale e bitšwago Pyin Oo Lwin, mo e ka bago dikhilomithara tše 210 go tloga moo re bego re dula gona.

Go swanelegela go tsena sekolong sa boruti go be go nyakega motho yo a šomilego gabotse sekolong. Bjalo ka mofaladi, ke be ke tsene sekolo nywaga e mebedi feela. Ke moka dikolo ka moka di ile tša tswalelwa nakong ya ntwa. Gaešita le ge dikolo di ile tša bulwa, lapa lešo le be le se la ema gabotse ka tša ditšhelete. Mma o be a sa hlokomele nna le bagolo’aka ba babedi feela eupša o be a hlokomela le bana ba bararo ba ngwanabo yo a hwilego. O be a se sa hlwa a kgona go tsenya rena bašemane sekolo.

 Mogolo’aka o ile a yo šoma, eupša ke be ke e-na le nywaga e 13 feela gomme go se na seo ke bego nka se dira. Rangwane, Manuel Nathan, o be a dula Chauk, toropo yeo e lego kgaufsi le Sale. Ke ile ka bea mabaka ka gore, ‘Ge nka tloga gae, ke tla fokotša pitša.’ Ka gona ke ile ka ya Chauk go yo dula le rangwane.

Ke be ke sa tsebe gore rangwane o be a sa tšo gahlana le Dihlatse tša Jehofa gomme o be a fagahlela go botša ba bangwe tsebo ya gagwe e mpsha ya Beibele. O be a mpotša yona ganyenyane-ganyenyane, a thoma ka go hlalosa seo se bolelwago ke thapelo ya Tata Wešo, bjalo ka ge Makatholika a e bitša bjalo. E thoma ka gore: “Tata-wešo wa maxodimong! Leina la xaxo a le kxêthwê.”—Mateo 6:9, 10, Beibele ya Sepedi.

Rangwane o hlalositše gore: “Modimo o na le Leina. Gomme leina leo ke Jehofa.” Ke moka a mpontšha leina la Modimo ka Beibeleng. Ke be ke nyaka go ithuta mo gontši. Eupša ke be ke sa kgone go bala gabotse, gaešita le ka leleme la-ka la se-Tamil, le gona Beibele le dikgatišo tšeo di theilwego Beibeleng tšeo rangwane a bego a e-na le tšona di be di le ka Seisemane, seo ke bego ke sa se tsebe gabotse. Go sa šetšwe thuto e lekanyeditšwego ya sekolo yeo ke bego ke e-na le yona, ke ile ka kwešiša dithuto tša Beibele ganyenyane-ganyenyane. (Mateo 11:25, 26) Ke ile ka thoma go lemoga gore dithuto tše dintši tšeo ke ilego ka di rutwa di be di sa thewa Beibeleng. Mafelelong ke ile ka re: “Rangwane, se ke therešo!”

Ge ke be e-na le nywaga e 16, ke ile ka thoma go bolela le ba bangwe ka seo ke ithutilego sona. Ka nako yeo go be go e-na le Dihlatse tša Jehofa tše 77 feela kua Myanmar. Nakwana ka morago, Robert Kirk, Hlatse ya Moromiwa yeo e tšwago motse-mošate wa Rangoon, yeo ga bjale e bitšwago Yangon, o ile a etela rangwane kua Chauk. Ke boditše Robert gore ke be ke neetše bophelo bja-ka go Jehofa. Ka gona ka December 24, 1949, ke ile ka kolobetšwa Nokeng ya Ayeyarwady, e le go bontšha boineelo bja-ka go Modimo.

Go fenya Mapheko

Nakwana ka morago ke ile ka hudugela Mandalay go yo nyaka mošomo o swanetšego. Pakane ya-ka e be e le gore ke be mmulamadibogo, ka ge badiredi ba nako e tletšego ba Dihlatse tša Jehofa ba bitšwa bjalo. Ka letšatši le lengwe ge ke be ke bogetše papadi ya kgwele ya maoto, ke ile ka wa ka baka la bolwetši bja dithunthwane. Ke be ke swerwe ke bolwetši bja dithunthwane gomme ke ile ka swanelwa ke go boela gae gore ba kgone go ntlhokomela.

Bolwetši bjo bo ile bja ntlaiša ka nywaga e seswai. Ge boemo bja-ka bja tša maphelo bo kaonefala, ke ile ka kgona go šoma mošomo wa boiphedišo. Gaešita le ge mma a be a sa nkgothaletše gore ke tsenele bodiredi bja nako e tletšego ka baka la boemo bja-ka, ka letšatši le lengwe ke ile ka mmotša gore: “Ga ke sa kgona go leta. Ke nyaka go ba mmulamadibogo. Jehofa o tla ntlhokomela!”

Ka 1957, ke ile ka hudugela Yangon gomme ka thoma go bula madibogo. Se se makatšago ke gore, go ile gwa fela nywaga e 50 bolwetši bja-ka bo sa ntlhasele go ba go fihla morago-bjale, ka 2007. Ga bjale bo laolwa ke dihlare tšeo ke di nwago. Ka 1958, ke ile ka kgethwa bjalo ka mmulamadibogo yo a kgethegilego, ke neela diiri tše 150 kgwedi e nngwe le e nngwe modirong wa boboledi.

Kabelo ya-ka ya pele e be e le kua Kyonsha, motsana wo o ka bago dikhilomithara tše 110 ka leboa-bodikela la Yangon. Sehlopha se senyenyane sa moo se be se badile dikgatišo tša rena tšeo di theilwego Beibeleng gomme se nyaka go tseba mo go oketšegilego. Ge nna le Robert re fihla, lešaba le legolo le ile la bokana. Re arabile dipotšišo tša lona tše dintši tša Beibele gomme ra le bontšha kamoo diboka tša Bokriste di swarwago ka gona. Ba  bangwe go lona kapejana ba ile ba re tlatša modirong wa boboledi. Ke ile ka kgopelwa go dula motseng woo. Ka dikgwedi tše mmalwa feela, sehlopha se senyenyane se ile sa ba phuthego e golago. Lehono, go na le Dihlatse tša ka godimo ga tše 150 lefelong leo.

Ka morago, ke ile ka kgethwa gore ke hlankele ke le modiredi wa mosepedi, ke etela diphuthego le dihlopha tše di lego lekatana tša Myanmar ka moka. Ke sepetše dikhilomithara tše dintši ditseleng tša lerole ka godimo ga dilori tšeo di rwelego merwalo, ke phatša dithokgwa, ke sesa dinokeng le go tšea leeto godimo ga dithaba. Gaešita le ge ke be ke fokola mmeleng, ke ile ka kwa Jehofa a mpha matla gore ke tšwele pele.—Bafilipi 4:13.

“Jehofa o tla go Thuša”

Ke moka ka 1962, ke ile ka romelwa ofising ya lekala ya Dihlatse tša Jehofa kua Yangon, moo Robert a ilego a nnea tlwaetšo. Go se go ye kae, balaodi ba mmušo ba ile ba laela gore baromiwa ka moka ba go tšwa dinageng dišele ba tloge Myanmar, gomme ka dibeke tše mmalwa feela, ba be ba sepetše. Sa go mmakatša ke gore, ke ile ka abelwa go hlokomela ofisi ya lekala.

Ke ile ka ipotšiša gore: ‘Ke tlo dira bjang mošomo wo? Ga se ka rutega e bile ga ke na maitemogelo. Ba lemogile go tshwenyega ga-ka, ba mmalwa bao ba godilego ba ile ba mpotša gore: “Maurice, o se ke wa tshwenyega. Jehofa o tla go thuša. Gomme ka moka ga rena re tla go thekga.” Mantšu ao ba mpoditšego ona a be a kgothatša gakaakaang! Dikgwedi tše mmalwa ka morago, ke ile ka swanelwa ke go kopanya pego ya ngwaga ya modiro wa rena wa boboledi mo Myanmar bakeng sa 1967 Yearbook of Jehovah’s Witnesses. Nywageng e 38 e latetšego, ke be dutše ke kopanya pego ya ngwaga le ngwaga ya naga. Nako le nako, ditiragalo di be di hlatsela gore Jehofa o hlahla modiro wa rena.

Ka mohlala, pejana ge ke be ke dira kgopelo ya go ba modudi wa Myanmar, ke be ke se na di-kyat * tše 450 tšeo di bego di nyakega bakeng sa go lefelela puku yeo ya bodulo, ka gona ke ile ka phetha ka gore ke tla leta. Ke moka ka letšatši le lengwe, ge ke be ke feta ofising ya khamphani yeo ke bego ke šoma go yona nywageng e fetilego, mothwadi wa-ka wa nakong e fetilego o ile a mpona. O ile a nkgoeletša ka gore: “Raj, tlaa o tšee tšhelete ya gago. O lebetše go tšea tšhelete ya gago ya go rola modiro ge o be o sepela.” E be e le di-kyat tše 450.

Ge ke be ke tloga ofising, ke ile ka nagana ka dilo ka moka tšeo ke bego nka di dira ka di-kyat tše 450. Eupša ka ge e be e le tšhelete yeo e lekanago tlwaa le yeo e bego e nyakega bakeng sa puku ya bodulo, ke ile ka bona gore e be e le thato ya Jehofa gore ke e dirišetše morero woo. Phetho yeo e ile ya nkhola kudu. Bjalo ka modudi wa moo, ke be nka dula nageng yeo, ka tšea maeto ka bolokologi, ka amogela dipuku go tšwa dinageng tše dingwe gotee le go phetha dikabelo tše dingwe tše bohlokwa bakeng sa modiro wa rena wa boboledi mo Myanmar.

Kopano ka Leboa

Ka 1969, modiro wa rena o be o tšwela pele ka lebelo motseng wa Myitkyina ka leboa la Myanmar, ka gona re ile ra dira phetho ya go swara kopano motseng wo. Lega go le bjalo, bothata bja rena bjo bogolo e be e le go hweletša Dihlatse ka moka tša go tšwa borwa dinamelwa. Re ile ra rapela le go kgopela go beeletša matorokisi a setimela a tshelelago go Ditimela tša Myanmar. Re ile ra tlabega kudu ge kgopelo ya rena e be e atlega.

Re be re lokišitše dilo ka moka ka nako bakeng sa kopano. Ka letšatši leo batla-kopanong ba bego ba swanetše go fihla ka lona, re ile ra ya seteišeneng sa setimela mosegare, re letetše gore setimela  se fihle ka 2:30 thapama. Ge re be re sa letile, mookamedi wa seteišene o ile a re nea thelekramo yeo e balegago ka gore: “Re kgokollotše matorokisi a tshelelago a Mokgatlo wa Watch Tower.” O ile a re setimela se be se ka se kgone go rotoga se goga matorokisi a oketšegilego.

Ke’ng seo re bego re tla se dira? Re ile ra tlelwa ke kgopolo ya gore re fetoše matšatši a kopano. Eupša seo se be se tla bolela gore re dire kgopelo e nngwe ya mangwalo a tumelelo, yeo e bego e tla tšea dibeke! Ge re be re sa dutše re rapela Jehofa go tšwa pelong, setimela se ile sa fihla seteišeneng. Re be re sa kgolwe seo re bonago—matorokisi ka moka a tshelelago a be a tletše ka Dihlatse! Di be di myemyela le go re emišetša matsogo. Ge re be re ba botšiša gore go diregile’ng, yo mongwe wa bona o ile a re: “Ba ile ba kgokolla matorokisi a tshelelago, eupša e sego a rena!”

Magareng ga 1967 le 1971, palo ya Dihlatse kua Myanmar e ile ya oketšega gabedi go ya go tše e nyakilego go ba tše 600. Ke moka ka 1978, ofisi ya lekala e ile ya hudušetšwa ntlong ya mabato a mabedi. Nywaga e masome-pedi ka morago, palo ya Dihlatse e ile ya oketšega ya ba ka godimo ga 2 500. Go ile gwa katološwa meago ya lekala, gomme ka January 22, 2000, John E. Barr, setho sa Sehlopha se Bušago sa Dihlatse tša Jehofa, o ile a tla a e-tšwa United States gomme a nea polelo ya go neelwa ga moago wa diofisi wa mabato a mararo le moago wa bodulo woo o dirišwago lehono.

Go Gopola Ditšhegofatšo tša Morago

Lehono, baithapi ba 52 ba dula le go šoma lekaleng la mo Yangon, gomme go na le mo e ka bago Dihlatse tše 3 500 tšeo di hlankelago diphuthegong le dihlopheng tše 74 nageng ka moka. Ke thabela go bolela gore ka 1969, pejana go lehu la gagwe, mma wa-ka yo a rategago o ile a ba yo mongwe wa Dihlatse tša Jehofa.

Doris Ba Aye, e lego modiredi wa mmulamadibogo wa lefelong leo, o ile a ba mofetoledi ofising ya rena ya lekala magareng ga bo-1960. Pejana ka 1959, o ile a ba sehlopheng sa bo-32 sa Sekolo sa Beibele sa Watchtower sa Gilead, e lego sekolo sa go hlahla baromiwa ba Dihlatse tša Jehofa. Bobotse bja gagwe bja tlhago, semelo sa gagwe se se kgahlišago le bomoya bja gagwe bjo bo tseneletšego bo ile bja nkgahla. Re ile ra nyalana ka 1970. Le lehono, re sa ineetše go Jehofa le lenyalong la rena.

Ke bone ge Modimo a thekga modiro wa boboledi nageng ye, ka nywaga-some ya ka godimo ga e tshela. Ruri, ke yo mogolo gomme o swanelwa ke go tumišwa. Ke “Yêna wa xo dira tše dikxolo,” ka ge ke bone bophelong bja-ka ka moka.—Psalme 106:21.

[Mongwalo wa tlase]

[Seswantšho go letlakala 27]

Ke le bodireding kua Rangoon, Burma, mo e ka bago ka 1957

[Seswantšho go letlakala 28]

Ke le leetong la go ya kopanong Kalemyo, Burma, bofelong bja bo-1970

[Seswantšho go letlakala 29]

Meago ya rena e mefsa e mebotse, yeo e katološitšwego ka 2000

[Seswantšho go letlakala 29]

Ke e-na le Doris lehono

[Seswantšho go letlakala 29]

Re le gotee bodireding bja ntlo le ntlo