Dikopano tša Selete tša Selemo tša Russia di Tliša Ditšhegofatšo

SELEMO se sengwe le se sengwe, Marussia a mantši ao a ratago tlhago a tšwa difoleteng tša ona tša ditoropong a eya go fetša nako mekutwaneng ya selemo yeo e bitšwago di-dacha. Ke nako ya bona ya go ikhutša leemaema la bophelo bja toropong. Dilemong tše mmalwa tša nywageng e fetilego, Dihlatse tša Jehofa kua Russia le tšona di be di dutše di eya metseng ya magaeng ka dipalo tše dikgolo—eupša tšona di yela morero o fapanego.

Go sa šetšwe dithibelo tšeo di dirilwego mabapi le mošomo wa tšona wa boboledi metseng e mengwe ya ditoropong, Dihlatse tša Jehofa kua Russia di tšwela pele di bokana phatlalatša bakeng sa borapedi, di diriša tshwanelo ya tšona ya molaotheo ya tokologo ya bodumedi. Lega go le bjalo, mabakeng a mangwe, kganetšo le kgateletšo tšeo di tšwago go bahlankedi ba mmušo bao ba boditšwego maaka goba baruti ba lefelong leo ba kereke ya Orthodox ya Russia di ile tša thatafaletša Dihlatse go hwetša tumelelo ya go diriša mafelo a swanetšego bakeng sa dikopano tša tšona tša selete tša selemo tša ngwaga le ngwaga. Ka gona Dihlatse di ile tša rulaganya dikopano tšeo di swarelwago “dithokgweng” goba “mabaleng.” Go tloga ka 2007 go fihla ka 2009, dilo tše bjalo tšeo go ka thwego ke dipikiniki tša moya di ile tša swarwa ka makga a ka bago a 40 mafelong a 25 Russia ka bophara.

Hlatse e nngwe yeo e bilego gona dikopanong kua Russia ka nywaga e mentši e gopola ka gore: “Nywageng e fetilego ge re be re hira mapatlelo le  meago metseng e megolo, batho ba bantši ba botegago le bahlankedi ba mmušo ba lefelong ba be ba kgona go itirela diphetho mabapi le mokgatlo wa rena ka baka la go bona bohlweki le thulaganyo. Ga bjale re gapeletšega go kopanela sethokgweng moo re bonwago ke diphoofolo tša naga feela. Go a nyamiša gore batho ga ba kgone go bogela dipokano tše tše kgahlišago tšeo go tšona go yago batho ba ditšo tše di fapafapanego, merafo le madumedi.”

Gaešita le ge dipokano tše bjalo e le ditiragalo tše di thabišago, Hlatse e nngwe e dumela ka gore: “Go a thabiša go bona boikgafo le potego tša Dihlatsegotee le rena tšeo di kgonago go itumelelanya le maemo a fapafapanego. Eupša therešo ke gore ge bahlankedi ba mmušo ba re thatafaletša go swara dikopano tša rena, seo se ka re imela kudu mmeleng le maikwelong. E bile se fokotša tokologo ya rena ya go rapela Modimo Ramatlaohle ka tsela e nago le seriti.” Dihlatse tša Jehofa tša kua Russia di ile tša lebeletšana bjang le tlhohlo ye?

Dikopano Tšeo di Swarelwago Dithokgweng Nageng ka Moka

Gantši go phumolwa ga ditumelelano tša go hira mafelo tšeo di dirilwego go bolela gore barulaganyi ba kopano ba šaletšwe ke matšatši a sego kae go dira dithulaganyo tše dingwe bakeng sa batlakopanong ba dikete. Ka mohlala, ka 2008, Dihlatse tša kua Cheboksary, Repabliking ya Chuvash, di ile tša swanelwa ke go swarela kopano ya selete lebaleng le legolo leo go hlongwago ditente go lona leo le dikologilwego ke dihlare tša birch gomme le okametše Noka ya Volga. Di be di lebeletšane le modiro o mogolo kudu. Go batlakopanong ba 1 930 bao ba bego ba letetšwe, ba 1 700 ba ile ba swanelwa ke gore ba dule lefelong la go hloma ditente. Ba be nyaka dišawara le disinki tšeo di nago le meetse a go fiša le a go tonya, dintlwana tša boithomelo le mohlagase. Le gona batlakopanong ka moka ba be ba swanetše go fepša.

Bana babo rena ba ile ba fenya tlhohlo yeo. Go ile gwa hwetšwa babetli, boramohlagase le boradipompi. Dihlatse tše 350 di ile tša ithaopela go thuša ka mošomo, gomme tše 14 tša tšona di ile tša dula lefelong la mošomo lebaka la matšatši a lesome. Di be di saga mapolanka, di ripa bjang gomme di hloma ditente, dintlwana tša dišawara le tša boithomelo. Sehlopha se sengwe sa bana babo rena se be se boaboa toropong se yo reka dilo tšeo di nyakegago. Ka ge go be go se na moo go ka bolokelwago dijo tša go tonya gona, bana babo rena ba ile ba phetha ka gore ba nee yo mongwe le yo mongwe dijo tše di fišago gararo ka letšatši, tšeo di apeetšwego lefelong la kopano. Balaodi ba lefelo la go hloma ditente ba ile ba swarišana le rena ka go hira bašomi ba bangwe gore ba apeele batlakopanong dijo. Mafelelong ke ge batlakopanong ba 500 ba tlile le ditente tša bona, ba 150 ba hirile mafelo a bodulo kgauswi le lefelo la go hloma ditente, ba 15 ba thabela go robala fase godimo ga furu ka ditaleng gomme ba bangwe ka moka ba dula ka ditenteng tšeo di bego di hlomilwe ke bana babo rena.

Ge batlakopanong ba fihla, ba ile ba bona ditulo tše dintši tša mebalabala tša polasitiki di adilwe gabotse ka methaladi. Ka pele e be e le dithala tše pedi tše di kgabišitšwego ka matšoba, se sengwe e le sa lenaneo la Serussia gomme se sengwe e le sa lenaneo la se-Chuvash. Yo mongwe le yo mongwe o ile a thabela lenaneo la moya le go leboga mošomo o mogolo woo baithaopi ba o dirilego. Yo mongwe wa bao ba bego ba apea dijo o ile a re: “Ge nkabe ke se ka iponela seo ka mahlo, ke be nka se tsoge ke dumetše gore go ka ba le mokgatlo o nago le bokgoni gakaakaa le o rulagantšwego gabotse o swanago le wa lena!” Ba bangwe ba ile ba swantšha dithulaganyo tša kopano le Monyanya wa Mešaša wo o bego o ketekwa ke setšhaba sa Isiraele mehleng ya Beibele.

Metseng e mengwe, Dihlatse di be di fela di eba le letšatši le tee feela gore di hwetše le go rulaganya lefelo le lengwe la kopano ya selete. Se se diregile  kua Nizhniy Novgorod, moo baithaopi ba ilego ba šoma bošego le mosegare ba šiedišana polotong ya motho. Ba ile ba swanelwa ke go sega dihlare le dithokgwa, go sega bjang le go tšhela dihlare tša go bolaya dikgofa le ditšhoši. Ge batlakopanong ba fihla mesong ya Labohlano, baithaopi ba be ba šetše ba tlišitše ditulo tše 2 000 tša polasitiki le dintlwana tša boithomelo tše lesome tšeo di rwalwago, ba hlomile disinki tšeo di nago le meetse, ba agile sethala gomme ba beakantše motšhene wa go fehla mohlagase (generator) le tshepedišo ya medumo. Ngwanabo rena yo mongwe o begile gore: “Selo se se makatšago kudu ke gore bana babo rena bao ba bego ba šomile bošego le mosegare ga se ba ikwa ba swanetše go tšewa e le dinkgwete. Ba ile ba tšwela pele ba hlankela ba bangwe ka boikokobetšo nakong ya kopano. Ba ile ba tloga ba ikgafa e le gore bana babo bona le dikgaetšedi ba ikwe ba phuthologile le gore ba thabele thuto ya moya.”

Ngwanabo rena yo mongwe o ngwala gore: “Ruri go be go na le moya wa go swarišana. Gaešita le ge e be e le la mathomo bana babo rena ba rulaganya kopano yeo e swarelwago ka ntle gomme ba šaletšwe ke nako e nyenyane, ba ile ba nagana ka dilo ka moka e le gore nakong ya lenaneo go be le dilo tše sego kae kudu tšeo di bakago tšhitišo. Ga se ra ikwa re lapile ka morago ga moo. Jehofa o be a re neile matla.”

Moya wa Modimo o a Šoma

Ka ditsela tše dintši, go rarolla mathata ao a bego a sepedišana le go swarwa ga dikopano go dirile gore Dihlatse tša lefelong di batamelane gomme gwa bontšha gore moya wa Modimo o a šoma. Kua Smolensk, mafelo a mantši ao a bego a hirilwe a ile a phumolwa letšatšing la pele ga kopano. Mogolo yo mongwe o bega gore: “Ge dipese tše mmalwa tša batlakopanong di be di goroga ka iri ya pele mesong, go be go se na moo ba ka robalago gona. Ke ile ka thoma go lla ka gobane ke be ke se na seo nka ba direlago sona. Ke ile ka rapela Jehofa gomme ka mo kgopela gore a rarolle bothata bjoo. Ka morago ga iri ke ile ka thaba kudu ge re be re hweleditše yo mongwe le yo mongwe lefelo la bodulo! Go be go tloga go makatša gomme go bontšha gore Jehofa a ka se lahle baloki!” Kopanong e nngwe yeo e bego e swaretšwe sethokgweng, bana babo rena ba ile ba ya motsaneng wa moo gore ba yo hwetša thušo ka tša marobalo, gomme badudi ba moo ba ile ba amogela batlakopanong ba 2 000 magaeng a bona nakong ya kopano ka baka la botumo bjo bobotse bjoo Dihlatse di nago le bjona tikologong yeo.

Hlatse e nngwe e re: “Taba feela ya gore kopano e ile ya kgona go swarwa e bile bohlatse bjo bo kgodišago bja kamoo go lego bohlokwa ka gona go ithekga ka Jehofa maemong ka moka.” Seo se bonagetše kudu nakong ya ge bao go ka thwego ke baeng bao ba sa laletšwago ba be ba tšwelela go tlo šitiša kopano. Kua Novoshakhtinsk, baruti ba kereke ya Orthodox ya Russia le baganetši ba ile ba tla ba opela difela ba opelela dimaekrofounong e le ge ba leka go šitiša seboledi sa kopano go bolela. Lega go le bjalo, maphodisa a ile a ba thibela gore ba se šitiše lenaneo. Nakong ya ge yo mongwe wa baganetši, e lego mosadi wa mo-Orthodox, a idibatšwa ke phišo, bana babo rena ba ile ba mo iša Lefapheng la Thušo ya Pele la kopanong gomme ba mo thuša ka tša kalafo. O ile a makala kudu.

Ba Makaditšwe ke Seo ba se Bonego

Dipokano tše dikgolo kua Russia gantši di gapa tlhokomelo ya bahlankedi ba tiišetšo ya molao le batho ba lefelong leo, bao ba nyakago go tseba ka  baka la ge batho ba dula ba tšhogile botšhošetši kudu. Ka mohlala, kopano yeo e bego e swaretšwe sethokgweng kua Volzhskiy e ile ya bewa leihlo ke baemedi ba sehlopha sa maphodisa ao a lwantšhago go fišega ka mo go feteletšego. Yo mongwe wa bona o ile a lahlegelwa ke mogalathekeng nakong ya lenaneo gomme bana babo rena ba mo thuša go o hwetša Lefapheng la Tšeo di Thwetšwego. Ka moragonyana ga moo, o ile a leletšwa ke yo a mo okametšego, yo a bego a nyaka go tseba ge e ba go be go na le ditlhohleletšo tša bošoro goba go fišegela thoko kopanong. Mohlankedi o ile a araba ka gore: “Dilo ka moka di sepela gabotse; go na le batho ba 5 000 mo gomme ga ba tshele molao. O bolela ka go fišegela thoko gofe? Kopano ye e go nea selo seo o ka naganago ka sona. Ke ile ka lahlegelwa ke mogalathekeng wa ka, gomme ba o hwetša ke moka ba mpušetša wona!”

Mohlapetši yo mongwe o ile a kgahlwa ke bohlweki bja mabaleng gomme a makatšwa ke gore ka ge go be go na le bana ba bantši gakaakaa, ga se a hwetša le sephuthelwana le setee sa lelekere. Mong wa lefelo la go hloma ditente leo go lona go bego go swaretšwe kopano o ile a kopana le maphodisa ao a bego a lemošitšwe ka dipego tša mabapi le pokano e kgolo ya bodumedi. O ile a nametša molefotenente wa maphodisa mathuding a lebatong la boraro moagong wo o bego o ukametše lefelo la go hloma ditente gomme a re: “Efo ba lebelela! O ka iponela. Bona gore ba na le thulaganyo gakaakang!” Mong wa lefelo leo o ile a makatšwa ke gore Dihlatse di be di sa nwe goba go kgoga e bile di se tša šia le mohlalanyana wa gore motho o be a le gona moo, gomme di tlogile le ditlakala tša tšona. O ile a re: “O be o ka re ke paradeiseng!”

Botee bo a Bonala Gare ga Batho ba Modimo

Ka morago ga kopano e nngwe yeo e bego e swaretšwe sethokgweng, moetapele wa motsana wa kgauswi o ile a tutueletšega gore a re: “Ke a bona gore le na le boipoetšo, eupša le ba matla e le ruri. Le ge re leka go ipea lekatana, lena le kgona go kopanya batho!” Go tloga Kaliningrad go fihla Kamchatka, badudi ba naga ye e kgolo ba tšwela pele ba kgahlwa ke botee bjoo ba bo bonago bathong ba Modimo dipokanong tša bona tše dikgolo tša moya. Go sa šetšwe gore dithulaganyo tša bona di ka swanelwa ke go fetoga ka pela le ka mo go sa letelwago gakaakang, go na le selo setee seo se dulago se sa fetoge—moya wa bona wa go hlompha mmušo le magagabo bona.

Go sa šetšwe gore maemo a tšona e sa tlo ba afe, Dihlatse tša Jehofa kua Russia di thabela go tšwela pele di bokana bakeng sa go hwetša tlhahlo ya moya. Di rapelela “dikgoši le bohle bao ba lego maemong a godimo; e le gore [di] tšwele pele [di] phela bophelo bja khutšo le boiketlo ka boineelo bjo bo feletšego go Modimo le boitshwaro bjo bo swanelago ka botlalo.”—1 Timotheo 2:2.

[Ntlhakgolo go letlakala 27]

Moithaopi yo mongwe wa Hlatse o thuša go lokiša lefelo la kopano yeo e swarelwago ka ntle

[Ntlhakgolo go letlakala 29]

Dihlatse tša Jehofa kua Russia di tšwela pele di phela “bophelo bja khutšo le boiketlo ka boineelo bjo bo feletšego go Modimo”

[Diswantšho go letlakala 28]

Baithaopi ba ile ba šoma gotee go hlwekiša mabala pele ga kopano le go lokiša dijo bakeng sa batlakopanong ba dikete

[Diswantšho go letlakala 29]

Yo mongwe le yo mongwe o ile a thabela lenaneo la moya gomme a leboga mošomo o mogolo wo o dirilwego ke baithaopi