Na Mmušo wa Modimo ke Boemo bja Pelo?

Mopapa Benedict XVI o bolela ka pukung ya gagwe ya Jesus of Nazareth gore: “Mmušo wa Modimo o tla ka pelo e theetšago.” Go ba bangwe, Mmušo wa Modimo ke sona seo—phetogo e diregago ka gare ga motho ge a amogela Jesu Kriste gomme a thoma go ba le tumelo. Na Mmušo wa Modimo e fo ba phetogo ya motho, e lego mmušo ‘o lego feela ka pelong ya gago’?

MMUŠO e be e tloga e le selo seo se lego bohlokwa go Jesu. Mopapa Benedict o dumela gore Mmušo e be e le “motheo wa modiro wa Jesu wa boboledi.” Nakong ya bodiredi bja gagwe bjo bokopana, Jesu o ile a sepela naga ka moka “a bolela ditaba tše dibotse tša Mmušo.” (Mateo 4:23) Ka go ruta ga gagwe le mehlolo yeo a bego a e dira, Jesu o ile a bontšha gore Mmušo e be e le selo seo se fetago go fo amogela Modimo le go dira thato ya gagwe. Mmušo wo o akaretša go buša, go ahlola le ditšhegofatšo tša ka mo go sa felego.

Pušo le Kahlolo

Lebakeng le lengwe matšatšing a mafelelo a bodiredi bja Jesu, mmago Jakobo le Johane e lego barutiwa ba Jesu ba kgauswi, o ile a tla go Jesu gomme a re: “Ntšha lentšu la gore mo go barwa ba ba ka ba babedi yo mongwe a dule ka letsogong la gago la le letona gomme yo mongwe ka go la le letshadi Mmušong wa gago.” (Mateo 20:21) Go molaleng gore o be a sa bolele ka selo seo se bego se le ka dipelong tša barwa ba gagwe. O be a kwešiša gore Mmušo o be o akaretša pušo ya Jesu gomme o be a nyaka gore barwa ba gagwe ba be le karolo go wona. Ge e le gabotse, Jesu o ile a holofetša baapostola ba gagwe ba 11 ba botegago gore ba tla ba Mmušong wa gagwe le go ‘dula didulong tša bogoši’ gomme ba “ahlole” le yena. (Luka 22:30) Ka gona, Mmušo wa Jesu e be e tla ba pušo ya kgonthe go balatedi ba gagwe—taolo, mmušo.

Go thwe’ng ka batho ka kakaretšo ba mehleng ya Jesu? Na ba be ba kwešiša Mmušo e le feela go fetoga ga motho goba na ba be ba letetše selo se se fetago seo? Go ba gona, pejana ga Paseka ya 33 C.E. ge Jesu a be a tsena Jerusalema a nametše pokolwana, mašaba a ile la mo amogela gomme a goeletša a re: “Re rapela gore o phološe Morwa wa Dafida!” (Mateo 21:9) Ke ka baka la’ng a be a goeletša ka tsela yeo? Ga go pelaelo gore a be a thomile go lemoga gore Jesu e be e le Mesia yo a holofeditšwego le gore Modimo o be a tla mo nea Mmušo wa ka mo go sa felego, “sedulo sa bogoši sa Dafida tatagwe.” A be a hlologetše phološo, khutšo le toka tšeo di tla tlišwago ke Mmušo.—Luka 1:32; Sakaria 9:9.

Ditšhegofatšo tša ka mo go sa Felego

Gaešita le batho bao ba ilego ba bonala ba sa tshwenyege ka bodiredi bja Jesu ba be ba tseba e tee ya dithuto tša gagwe. Nakong ya go bolawa ga Jesu, sesenyi seo se bego se kokotetšwe kgauswi le yena se ile sa kgopela ka gore: “Jesu, o nkgopole ge o tsena Mmušong wa gago.” Jesu o arabile ka gore’ng? O ile a kgonthišetša monna yo a bego a ehwa gore: “Ruri ke go botša lehono, o tla ba le nna Paradeiseng.”—Luka 23:42, 43.

Go molaleng gore mohlakodi yoo o be a dumela gore ka morago ga ge Jesu a tsošitšwe bahung, O be a tla hwetša Mmušo goba a tsena go  wona. Jesu a ka se be feela le matla a go tsoša bahu le go tsošološa monna yo—gotee le batho ba bangwe ba dimilione—eupša gape o tla kganyoga go dira bjalo. Ee, a beilwe Mmuši lefelong la moya, Jesu o tla tliša ditšhegofatšo tša ka mo go sa felego bathong lefaseng ka bophara a diriša Mmušo.—Johane 5:28, 29.

Mmušo o Gare ga Bona

Na Jesu ga se a ka a re: “Mmušo wa Modimo o gare ga lena”? Ee, mantšu ao a Jesu a hwetšwa go Luka 17:21. Ge e le gabotse, diphetolelo tše dingwe tša Beibele di re “mmušo wa Modimo o bile o gona ka mo teng ga lena,” mola tše dingwe di re “o mo gare ga lena.” (Ka mohlala, bona Phetolelo ya Kgale le The New English Bible.) Jesu o be a bolela’ng ge a be a re’alo?

Taba e dikologilego e bontšha gore Jesu o dirišitše mantšu ao go sehlopha sa baganetši sa bodumedi bja Sejuda seo se bitšwago Bafarisei. Ba be ba na le dikgopolo tša bona mabapi le Mesia le Mmušo wa gagwe. Go ya ka bona, Mesia o be a tla tla “ka maru a magodimo” e le Kgoši ya letago go tlo imolla Bajuda go Baroma le go tsošološa mmušo wa Isiraele. (Daniele 7:13, 14) Lega go le bjalo, Jesu o ile a ba bontšha phošo ya bona ge a ba botša gore: “Mmušo wa Modimo ga o tle ka go lemogega pepeneneng.” Ke moka o ile a oketša ka gore: “Mmušo wa Modimo o gare ga lena.”—Luka 17:20, 21.

Gaešita le ge Jesu a be a ruta e bile a dira mehlolo yeo e bego e mo hlaola gabotse e le Kgoši e holofeditšwego ya Mmušo woo, Bafarisei, ba se nago maikemišetšo a mabotse le tumelo e tiilego, ba ile ba fo mo ganetša kudu. Ba be ba belaela gore Jesu ke Mesia. Ka gona o ile a ba beela mabaka ka gore: Mmušo woo o emelwago ke Kgoši ya wona ya nakong e tlago, o be o le ‘gare ga bona.’ O be a sa ba kgopele gore ba itlhahlobe ka gare. * Jesu le barutiwa ba gagwe ba be ba eme pele ga bona. O itše: “Mmušo wa Modimo o gare ga lena.”—Luka 17:21.

Mmušo wo o Lego Bohlokwa go Wena

Gaešita le ge Mmušo wa Modimo o se ka dipelong tša batho ba sebe, o swanetše go ba bohlokwa go rena. Ka dithuto tša gagwe le mediro ya gagwe e matla, Jesu o ile a katanela go aga tumelo e tšwago pelong go batheetši ba gagwe ya go dumela taolong ya go loka yeo e tla tlišago khutšo ya kgonthe le polokego. O be a nyaka gore ba bontšhe tumelo yeo e bego e tla kaonefatšago maphelo a bona. Ge e le gabotse, o ile a ba ruta gore ba rapele ba re: “Tatago rena wa magodimong, leina la gago a le kgethagatšwe. Mmušo wa gago a o tle. Thato ya gago a e direge le mo lefaseng bjalo ka ge e direga legodimong.” (Mateo 6:9, 10) Batheetši ba bantši ba Jesu ba ile ba kgongwa kudu ke mantšu a gagwe gomme ba bontšha tumelo yeo e ilego ya dira gore ba latele Jesu ka go phegelela go hwetša ditšhegofatšo tša Mmušo wa Modimo.

Na o tla rata go ba le tumelo ya mohuta wo? Gona ke’ng seo o swanetšego go se dira gore o be le tumelo e bjalo? Gopola matseno a Thuto ya Jesu e tumilego ya Thabeng a rego: “Go thaba bao ba lemogago gore ba nyaka dilo tša moya, ka ge Mmušo wa magodimo e le wa bona.” (Mateo 5:3) Ke ka baka la’ng o sa amogele taletšo ya go ithuta Beibele le Dihlatse tša Jehofa tšeo di go tlišeditšego makasine wo? Ke moka o tla ba le kholofelo, e sego feela ka phetogo ya gago, eupša le ka pušo e swanetšego le ya go loka—Mmušo woo o tla tlišetšago bohle khutšo le polokego.

[Mongwalo wa tlase]

[Ntlhakgolo go letlakala 11]

Na Mmušo wa Modimo o be o le ka dipelong tša baganetši ba Jesu ba dihlogo tše thata le bao e bego e le babolai?