BOEMO bjoo Jesu a bego a le go bjona ge a bolela mantšu a bo utolla mo gontši mabapi le morero o mogolo bophelong bja gagwe. Jesu le barutiwa ba gagwe ba be ba sepela motseng wa dithaba wa Samaria mesong ka moka. (Johane 4:6) Barutiwa ba ile ba nea Jesu dijo e le ge ba nagana gore o be a swanetše go ba a swerwe ke tlala ka nako yeo. (Johane 4:31-33) Ge a ba araba, Jesu o ile a akaretša morero wa gagwe bophelong. Go yena go dira modiro wa Modimo go be go le bohlokwa kudu go feta go ja. Ka ditiro le ka mantšu, Jesu o ile a phelela go dira thato ya Modimo ka yena. Se se be se akaretša’ng?

Beibele e hlalosa modiro woo Jesu a bego a o dira ka gore: “A sepela le Galilea ka moka ga yona, a ruta . . . a bolela ditaba tše dibotse tša Mmušo.” (Mateo 4:23) Jesu o be a sa fo bolela goba go tsebatša Mmušo wa Modimo go ba bangwe. Gape o be a ruta batho—ke gore, go ba nea tlhahlo, go ba hlalosetša le go ba kgodiša ka mabaka a kwagalago. Mmušo e be e le sehlogo sa molaetša wa Jesu.

Bodireding bja gagwe ka moka, Jesu o rutile batheetši ba gagwe seo Mmušo wa Modimo e lego sona le seo o tlago go se dira. Ela hloko ditherešo tše di latelago mabapi le Mmušo gotee le ditsopolo tša Mangwalo tšeo di bontšhago seo Jesu a se boletšego mabapi le taba ye.

• Mmušo wa Modimo ke pušo ya legodimong gomme Jesu ke yena yoo Jehofa a mo kgethilego gore e be Kgoši.—MATEO 4:17; JOHANE 18:36.

• Mmušo o tla kgethagatša leina la Modimo le go dira gore thato ya gagwe e direge mo lefaseng bjalo ka ge e direga legodimong.—MATEO 6:9, 10.

• Ka tlase ga pušo ya Mmušo wa Modimo, lefase ka moka le tla fetošwa paradeise.—LUKA 23:42, 43.

• Kgauswinyane Mmušo wa Modimo o tla tla gomme wa phethagatša thato ya Modimo mo lefaseng. *—MATEO 24:3, 7-12.

Jesu o be a tsebja kudu e le “Morutiši.” (Johane 13:13) Lega go le bjalo, nakong ya bodiredi bja gagwe bja nywaga e meraro le seripa, o ile a dira mediro e matla. Mediro ye e be e phetha merero e mebedi. Morero wa pele, e thušitše go hlatsela gore ruri o be a romilwe ke Modimo. (Mateo 11:2-6) Wa bobedi, e utollotše seo a tlago go se dira nakong e tlago ka tekanyo e kgolo bjalo ka Kgoši ya Mmušo wa Modimo. Ela hloko e mengwe ya mehlolo yeo a e dirilego.

• O ile a homotša ledimo le matla la ka lewatleng le go kgalema diphefo tše matla.—MAREKA 4:39-41.

• O fodišitše balwetši, go akaretša le difofu, dimumu le dihlotša.—LUKA 7:21, 22.

• O ile a atiša dijo, ka go re’alo a fepa mašaba ao a bego a swerwe ke tlala.—MATEO 14:17-21; 15:34-38.

• Bonyenyane ka makga a mararo, o ile a tsoša bahu.—LUKA 7:11-15; 8:41-55; JOHANE 11:38-44.

Akanya kamoo bophelo bo tlago go ba ka gona lefaseng ka tlase ga pušo ya Kgoši ye e matla!

Ge go tliwa tabeng ya go ruta ba bangwe ka Jehofa, ga go yo a swanelegago go feta Morwa wa Modimo ka noši, yena yo a ilego a tla a tsebja e le Jesu Kriste. Ka ge e le “leitšibulo la tlholo yohle,” Jesu o phetše kgauswi le Jehofa legodimong nako e telele go feta sebopiwa le ge e le sefe sa moya. (Bakolose 1:15) Nagana ka dibaka tšeo di bego di mmulegetše tša gore a monye kgopolo ya Tatagwe le go ithuta thato ya Gagwe, ditekanyetšo tša gagwe le ditsela tša gagwe.

Jesu o be a ka bolela ka nepo gore: “Ga go yo a tsebago yo Morwa e lego yena ge e se wena Tate; le gona ga go yo a tsebago yo Tate e lego yena ge e se Morwa, le yo Morwa a ratago go mo utollela yena.” (Luka 10:22) Ge a be a le mo lefaseng e le motho, Jesu ka go rata—ee, ka go fagahla—o ile a utolla semelo sa Tatagwe. Jesu o boletše le go ruta ka tsela ya moswananoši; o ile a gopola dilo ka moka ka go lebanya tša ge a be a le lefelong la moya le kgauswi le Modimo yo a Phagamego Kudu.—Johane 8:28.

Tsela yeo Jesu a utolotšego Tatagwe ka yona e ka swantšhwa le tsela yeo motšhene wa go fetoša mohlagase (electric transformer) o šomago ka gona. Sedirišwa sa mohuta wo se ka kgona go fetoša mohlagase wa matla a magolo sa o dira gore e be wa matla a manyenyane, ka go re’alo sa dira gore go kgonege gore o dirišwe ke bohle. Ge a be a le lefaseng, Jesu o tšere seo a ithutilego sona legodimong mabapi le Tatagwe gomme a se fetišetša go batho ba tlasana ba mo lefaseng ka tsela yeo ba bego ba ka kgona go se kwešiša le go se diriša gabonolo.

Ela hloko ditsela tše pedi tše bohlokwa tšeo Jesu a utolotšego Tatagwe ka tšona.

• Ge a be a ruta, Jesu o ile a dira gore go tsebje therešo ka Jehofa—leina la Gagwe, merero ya gagwe le ditsela tša gagwe.—JOHANE 3:16; 17:6, 26.

• Jesu o utolotše dibopego tše dibotse tša semelo sa Jehofa ka ditiro tša gagwe. Jesu o bonagaditše semelo sa Tatagwe ka tsela e phethagetšego moo ge e le gabotse a bego a ka re: ‘Ge le nyaka go tseba kamoo Tate a lego ka gona, lebelelang nna.’—JOHANE 5:19; 14:9.

Re kgotsa tsela yeo Jesu a phetšego ka yona. Re ka holega kudu ge e ba re hlahloba lebaka leo ka lona a ilego a hwa le ge e ba re dira ka go dumelelana le seo re ithutago sona.