MMUŠI wa Moroma Pontio Pilato o ile a botšiša potšišo yeo ge Jesu a be a sekišetšwa bophelo bja gagwe. * Pilato o be a tseba gore Jesu o be a etšwa karolong efe ya Isiraele. (Luka 23:6, 7) O be a tseba le gore Jesu e be e se motho yo a tlwaelegilego. Na Pilato o be a ipotšiša ge e ba Jesu a kile a phela pele? Na ruri mmuši yo wa moheitene o be a ikemišeditše go amogela therešo le go dira ka go dumelelana le yona? Go sa šetšwe gore maikemišetšo a gagwe e be e le afe, Jesu o ile a gana go araba gomme go se go ye kae go ile gwa bonagala gore Pilato o be a kgahlegela maemo a gagwe kudu go e na le go kgahlegela therešo le toka.—Mateo 27:11-26.

Re thabišwa ke go tseba gore bao ba tlogago ba nyaka go tseba moo Jesu a tšwago gona ba ka hwetša karabo gabonolo. Beibele e hlalosa mathomo a Jesu Kriste ka botlalo. Ela hloko dintlha tše di latelago.

Dikakanyetšo tša mehleng yeno di bontšha gore Jesu o ile a belegelwa maemong a bobotlana motseng wa Betlelehema kua Judea mathomong a lehlabula la ngwaga woo ga bjale o tsebjago e le 2 B.C.E. Taelo ya go ngwadišwa ga batho yeo e ntšhitšwego ke Kesara Augustose e ile ya gapeletša Maria, mmago Jesu, yoo “a bego a le kgauswi le go belega,” le monna wa gagwe Josefa gore ba tšee leeto la go ya Betlelehema, lefelo la bagologolo ba Josefa. Ka ge ba be ba se ba hwetša lefelo la marobalo motseng woo o bego o tletše batho, balekane ba ba ile ba swanelwa ke go diriša setala, moo Jesu a ilego a belegelwa gona gomme ba mo latša legopong.—Luka 2:1-7.

Nywagakgolo pejana, boporofeta bja Beibele bo be bo boletše e sa le pele ka lefelo leo Jesu a tlago go belegelwa go lona ka gore: “Wena Betlelehema Efurata, wena o lego yo monyenyane kudu gare ga metse ya Juda, go wena go tla tšwa yo e tlago go ba mmuši wa Isiraele.” * (Mika 5:2) Go bonagala Betlelehema e be e le e nyenyane go ka balwa le metse ya nageng ya Juda. Lega go le bjalo, motsana wo o be o tla ba le tokelo ya moswananoši. Mesia, goba Kriste, yo a holofeditšwego o be a tla tšwa Betlelehema.—Mateo 2:3-6; Johane 7:40-42.

Ka morago ga go dula lebakanyana kua Egipita, lapa labo Jesu le ile la khudugela Natsaretha, motse wa profenseng ya Galilea woo o ka bago dikhilomithara tše 96 ka leboa la Jerusalema. Ka nako yeo, Jesu o be a ena le nywaga ya ka tlase ga e meraro. Jesu o goletše lapeng le legolo, mohlomongwe maemong a tlasana, lefelong le le lebotse leo go lona balemi, badiši le barei ba dihlapi ba bego ba swaregile ka mešomo ya bona.—Mateo 13:55, 56.

 Beibele e be e boletše nywagakgolo e sa le pele gore Mesia e be e tla ba “Monatsaretha.” Mongwadi wa Ebangedi e lego Mateo o re lapa labo Jesu le ile la tla go dula “Natsaretha, e le gore go tle go phethagale seo se bego se boletšwe ka baporofeta ge ba re: ‘O tla bitšwa Monatsaretha.’” (Mateo 2:19-23) Go bonagala leina Monatsaretha le tswalana le lentšu la Seheberu la “lehlogedi.” Go molaleng gore Mateo o be a bolela ka boporofeta bja Jesaya bjoo bo biditšego Mesia gore ke “lehlogedi” leo le tšwago go Jese, e lego seo se rago gore Mesia e be e tla ba setlogolwana sa Jese, tatago Kgoši Dafida. (Jesaya 11:1) Jesu ge e le gabotse e be e le setlogolwana sa Jese ka Dafida.—Mateo 1:6, 16; Luka 3:23, 31, 32.

Beibele e ruta gore bophelo bja Jesu bo thomile kgale pele a ka belegelwa ka setaleng kua Betlelehema. Boporofeta bja Mika bjo bo tsopotšwego pejana, bo tšwela pele ka gore, Yoo “setlogo sa gagwe e lego sa mehla ya pele, matšatšing a bogologolo.” (Mika 5:2) Bjalo ka Morwa wa Modimo wa leitšibulo, Jesu e be e le sebopiwa sa moya legodimong pele a ka belegwa e le motho mo lefaseng. Jesu ka boyena o itše: “Ke theogile legodimong.” (Johane 6:38; 8:23) Seo se kgonegile bjang?

Ka moya o mokgethwa, Jehofa Modimo o ile a dira mohlolo ka go fetišetša bophelo bja Morwa wa gagwe wa legodimong ka popelong ya kgarebe ya Mojuda e lego Maria e le gore a ka belegwa e le motho yo a phethagetšego. * Mohlolo o bjalo o ka direga gabonolo ka matla a Modimo Ramatlaohle. Bjalo ka ge morongwa yo a bego a begela Maria ditaba a boletše, “go Modimo ga go mantšu ao a ka se phethagatšwego.”—Luka 1:30-35, 37.

Beibele e dira se se fetago go fo re botša mabapi le moo Jesu a tšwago gona. Diebangedi tše nne—Mateo, Mareka, Luka le Johane—di re botša mo gontši mabapi le kamoo a phetšego ka gona.