3. Bolwetši
3. Bolwetši
“Batho ba tla . . . tlaišwa ke malwetši a šoro.”—LUKA 21:11, Contemporary English Version.
● Bonzali, mohlankedi wa tša maphelo wa batho bohle wa nageng e nngwe ya Afrika yeo e sentšwego ke ntwa ya selegae, o dira bonyenyane bjo a ka bo kgonago go alafa bašomi ba moepong ba motseng wa gabo bao ba bolawago ke twatši ya Marburg. * Dikgopelo tša thušo tšeo a di dirilego go bahlankedi ba mmušo ba motseng o mogolo ga se tša ka tša arabja. Dikgwedi tše nne ka morago, thušo e ile ya tla mafelelong eupša ya hwetša Bonzali a hwile. O ile a fetelwa ke bolwetši bja Marburg go tšwa go bašomi ba moepong bao a bego a leka go ba phološa.
DITHEREŠO DI BONTŠHA ENG? Malwetši a ditho tša tlasana tša mohemo (a bjalo ka nyumonia), malwetši a letšhollo, HIV/AIDS, bolwetši bja mafahla le malaria a gare ga malwetši a mašoro ao a tlaišago batho. Ngwageng wa morago bjale, mehuta ye e mehlano ya malwetši e bolaile batho bao go akanyetšwago gore ke ba dimilione tše 10,7. Ge go hlaloswa ka tsela e nngwe, malwetši a a be a bolaya motho o tee ka metsotswana e mengwe le e mengwe e meraro, ngwaga ka moka.
KGANETŠO E TLWAELEGILEGO KE EFE? Palo ya badudi ba lefase e tšwela pele e gola, ke ka baka leo go nago le malwetši a oketšegilego. Go na le batho ba bantši bao ba ka fetelwago ke malwetši a.
NA KGANETŠO YEO E A KWAGALA? Palo ya badudi ba lefase e oketšegile kudu. Eupša go bjalo le ka bokgoni bja batho bja go lemoga malwetši, go a laola le go a alafa. Ka gona, na ga se mo go kwagalago go lebelela gore malwetši a fokotše go tlaiša batho? Lega go le bjalo, go direga se se fapanego.
O NAGANA’NG? Na batho ba tlaišwa ke malwetši a mašoro bjalo ka ge Beibele e boletše e sa le pele?
Ditšhišinyego tša lefase, tlala le malwetši ke dilo tše di sa bakwego ke batho tšeo di bakelago batho ba dimilione masetlapelo. Ba bangwe ba dimilione ba tlaišwa ke magagabo bona—ba bantši ba hlaselwa ke batho bao ba swanetšego go ba šireletša. Ela hloko seo boporofeta bja Beibele bo rego se tla direga.
[Mongwalo wa tlase]
^ ser. 3 Bolwetši bja go Lahlegelwa ke Madi o Šoro bja Marburg (Marburg Hemorrhagic Fever) bo bakwa ke twatši yeo e sepedišanago le ya Ebola.
[Ntlhakgolo go letlakala 6]
“Ke mo go boifišago go jewa ke tau goba selo se sengwe, eupša ka mo go swanago go a boifiša go jewa go thoma ka gare ke twatši e kotsi le go bona seo se tšwela pele se direga go ba bangwe.”—SETSEBI SA MAUBA A MALWETŠI MICHAEL OSTERHOLM.
[Mothopo wa Seswantšho go letlakala 6]
© William Daniels/Panos Pictures