6. Modiro wa Boboledi wa Lefase ka Bophara
6. Modiro wa Boboledi wa Lefase ka Bophara
“Ditaba tše tše dibotse tša Mmušo di tla bolelwa lefaseng ka moka.”—MATEO 24:14.
● Vaiatea o dula sehlakahlakeng se se lego lekatana sa Pacific seo se lego Sehlopheng sa Dihlakahlaka sa Tuamotu. Gaešita le ge Tuamotu e ena le dihlakahlakana tše e nyakilego go ba tše 80 tšeo di phatlaletšego lefelong la disekwerekhilomithara tše fetago tše 802 900, e na le badudi ba e ka bago ba 16 000 feela. Lega go le bjalo, Dihlatse tša Jehofa di ile tša ikgokaganya le Vaiatea le baagišani ba gagwe. Ka baka la’ng? Ka gobane Dihlatse di nyaka go botša batho ka moka ditaba tše dibotse tša Mmušo wa Modimo—go sa šetšwe gore ba dula kae.
DITHEREŠO DI BONTŠHA ENG? Molaetša wa Mmušo o fihlelela dikhutlo ka moka tša lefase. Ka 2010 feela, Dihlatse tša Jehofa di feditše diiri tša ka godimo ga tše dimilione tše dikete tše 1,6 di bolela ditaba tše dibotse dinageng tše 236. Yeo ke palogare ya metsotso e 30 yeo Hlatse e nngwe le e nngwe e e fetšago letšatši le letšatši e le modirong wa boboledi. Ngwagasomeng o fetilego, Dihlatse di tšweleditše le go phatlalatša dikgatišo tša thuto ya Beibele tša ka godimo ga tše dimilione tše dikete tše 20.
KGANETŠO E TLWAELEGILEGO KE EFE? Molaetša wa Beibele o na le nywaga e dikete o bolelwa.
NA KGANETŠO YEO E A KWAGALA? Ke therešo gore ba bangwe ba ile ba bolela selo se itšego mabapi le molaetša wa Beibele. Lega go le bjalo, ba bantši ba dirile bjalo ka lebakanyana feela le ka tekanyo e nyenyane. Ka mo go fapanego, Dihlatse tša Jehofa di swaregile ka lesolo le le rulagantšwego le la lefase ka bophara la go dira boboledi leo le fihlelelago batho ba dimilione tše dikete. Dihlatse di phegeletše modirong wa tšona wa boboledi go sa šetšwe kganetšo e šoro go tšwa go e mengwe ya mekgatlo e matla le e sehlogo historing ya batho. * (Mareka 13:13) Go oketša moo, Dihlatse tša Jehofa ga di lefše gore di dire boboledi. Go e na le moo, di ithaopela go diriša nako ya tšona e bile di fa batho dikgatišo tša tšona ntle le tefo. Modiro wa tšona o thekgwa ka mo go feletšego ka meneelo ya boithatelo.
O NAGANA’NG? Na ‘ditaba tše dibotse tša mmušo’ di bolelwa lefaseng ka bophara? Na go phethagala ga boporofeta bjo go ka ba go bolela gore selo se sekaone se letše ka pele?
[Mongwalo wa tlase]
^ ser. 6 Bakeng sa tsebišo e oketšegilego, bogela mananeo a mararo a bidio e lego la “Faithful Under Trials,” la “Purple Triangles,” le la “Jehovah’s Witnesses Stand Firm Against Nazi Assault” ao a abjago ke Dihlatse tša Jehofa.
[Ntlhakgolo go letlakala 9]
“Ge feela Jehofa a re dumelela, re tla tšwela pele re bolela ditaba tše dibotse tša Mmušo ka phišego, re diriša mokgwa le ge e le ofe o kgonegago go fihlelela batho.”—2010 YEARBOOK OF JEHOVAH’S WITNESSES.