Khomotšo Bakeng sa ba Dipelo tše di Robegilego
Batamela Kgauswi le Modimo
Khomotšo Bakeng sa ba Dipelo tše di Robegilego
‘JEHOFA o be a ka se tsoge a nthatile.’ Mantšu a a boletšwe ke mosadi yo mongwe wa Mokriste yoo a ilego a katana le kgateletšego karolong e kgolo ya bophelo bja gagwe. O be a ikgodišitše gore Jehofa o swanetše go ba a le kgole le yena. Na ruri Jehofa o kgole le barapedi ba gagwe bao ba ka bago ba gateletšegile? Karabo e homotšago e hwetšwa mantšung a buduletšwego a mopsalme Dafida, ao a ngwadilwego go Psalme 34:18.
Dafida o be a tseba kamoo tlalelo e feteletšego e ka kgomago morapedi yo a botegago wa Jehofa. Ge Dafida e be e sa le lesogana, o ile phela e le motšhabi, a dula a kitimišwa ke Saulo, kgoši e nago le lehufa yeo e bego e ikemišeditše go mmolaya. Dafida o ile a tšhabela lefelong leo mo gongwe a bego a nagana gore Saulo o be a ka se tsoge a mo nyakile go lona, e lego motseng wa manaba wa Gathe, tikologong ya Bafilisita. Eupša ka morago ga gore ba mo lemoge, Dafida o ile a phonyokga ka lešobana la nalete ka go itira eka o a gafa. Dafida o ile a godiša Modimo bakeng sa go mo phološa gomme a ngwala Psalme 34, a e theile go se seo se mo diragaletšego.
Na Dafida o be a dumela gore Modimo o kgole le bao e rego ge ba le tlalelong ba ikwa ba lahlilwe goba ba sa swanelwe ke go šetšwa ke Modimo? Dafida o ngwala gore: “Jehofa o kgauswi le ba dipelo tše di robegilego; o phološa ba meoya e nyamilego o šoro.” (Temana 18) Anke re boneng kamoo mantšu ao a neago khomotšo le kholofelo ka gona.
“Jehofa o kgauswi.” Puku e nngwe ya ditšhupetšo e bolela gore polelwana ye ke “tsela e hlalosago ya go bolela gore Morena o a šetša e bile o a hlokomela, gomme o dula a loketše go thuša batho ba gagwe le go ba phološa.” Ke mo go kgothatšago go tseba gore Jehofa o hlokomela batho ba gagwe. O bona mathata ao a ba welago ‘dinakong tše tše di hlobaetšago’ gomme o tseba maikwelo a bona a ka garegare.—2 Timotheo 3:1; Ditiro 17:27.
“Ba dipelo tše di robegilego.” Ditšong tše dingwe, “pelo e robegilego” e šupa tabeng ya go se ratwe. Eupša seithuti se sengwe se bolela gore mantšu a mopsalme a bolela ka “go lla le go nyama ka kakaretšo.” Ee, gaešita le barapedi ba Modimo bao ba botegago ka dinako tše dingwe ba ka welwa ke mathata a feteletšego ao a ba robago dipelo.
“Ba meoya e nyamilego o šoro.” Batho bao ba nyamišitšwego ba ka inyatša kudu moo e lego gore ba ka lahlegelwa ke kholofelo ka moka ka nakwana. Puku ya go ithuta ya bafetoledi ba Beibele e bolela gore polelwana ye e ka fetolelwa e le “bao ba se nago selo se sebotse seo ba se letetšego.”
Jehofa o arabela bjang go “ba dipelo tše di robegilego” le “ba meoya e nyamilego o šoro”? Na o dulela kgole le bona, a nagana gore ga ba swanelwe ke gore a ba šetše le go ba rata? Ga go bjalo! Go etša motswadi yo lerato yo a kukago le go homotša ngwana wa gagwe yo a lego tlalelong, Jehofa o kgauswi le barapedi ba gagwe bao ba mo kgopelago thušo. O ikemišeditše go homotša le go imolla dipelo tša bona tše di robegilego le meoya ya bona e nyamilego o šoro. A ka ba nea bohlale bjo bo nyakegago gotee le matla gore ba lebeletšane le diteko tšeo di ka bago di ba wetše.—2 Bakorinthe 4:7; Jakobo 1:5.
Ke ka baka la’ng o sa nyakišiše kamoo o ka batamelago Jehofa ka gona? Modimo yo yo a nago le kwelobohloko o holofetša gore: “Ke dula . . . le yo a setlegilego e bile a kokobetše moyeng, gore ke tsošološe moya wa babotlana le go tsoša pelo ya bao ba setlegilego.”—Jesaya 57:15.
Mmalo wa Beibele o šišintšwego bakeng sa June: