Ithute Lentšung la Modimo

O ka Lemoga Borapedi bja Therešo Bjang?

Sehlogo se se rotoša dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Na go na le bodumedi bjo tee feela bja therešo?

Jesu o rutile balatedi ba gagwe bodumedi bjo tee feela, e lego bodumedi bja therešo. Bo swana le tsela e išago bophelong. Jesu o boletše mabapi le tsela yeo gore: “Ke ba sego kae ba ba e hwetšago.” (Mateo 7:14) Modimo o amogela feela borapedi bjoo bo theilwego Lentšung la gagwe la therešo. Barapedi ka moka ba therešo ke batee tumelong.—Bala Johane 4:23, 24; 14:6; Baefeso 4:4, 5.

2. Ke ka baka la’ng madumedi a mantši a fapafapanego a ipolela gore ke a Bokriste?

Baporofeta ba maaka ba sentše Bokriste gomme ba bo dirišitše go tšwetša pele dikgahlego tša bona. Ka ge Jesu a boletše e sa le pele, ba iponagatša e le “dinku” tša gagwe eupša ba itshwara bjalo ka diphiri tšeo di swerwego ke tlala. (Mateo 7:13-15, 21, 23) Bokriste bja maaka bo tšweletše kudukudu ka morago ga lehu la baapostola ba Jesu.—Bala Ditiro 20:29, 30.

3. Ke dilo dife tše dingwe tšeo di hlaolago borapedi bja therešo?

Barapedi ba therešo ba hlompha Beibele ka ge e le Lentšu la Modimo. Ba katanela go phela ka melao ya motheo ya yona. Ka gona, bodumedi bja therešo bo fapane le bodumedi bjoo bo theilwego dikgopolong tša batho. (Mateo 15:7-9) Barapedi ba therešo ga ba rute selo se itšego gomme ba dira se se fapanego.—Bala Johane 17:17; 2 Timotheo 3:16, 17.

Bodumedi bja therešo bo hlompha leina la Modimo, e lego Jehofa. Jesu o ile a tsebatša leina la Modimo. O thušitše batho gore ba tsebe Modimo le go ba ruta go rapelela gore leina la Modimo le kgethagatšwe. (Mateo 6:9) Ke bodumedi bofe bjoo bo kgothaletšago go dirišwa ga leina la Modimo moo o dulago?—Bala Johane 17:26; Baroma 10:13, 14.

  4. O ka lemoga barapedi ba therešo bjang?

Bakriste ba therešo ba bolela ka Mmušo wa Modimo. Modimo o romile Jesu gore a bolele ka Mmušo. Mmušo wa Modimo ke kholofelo e nnoši ya batho. Jesu o tšwetše pele a bolela ka wona go fihlela letšatšing la lehu la gagwe. (Luka 4:43; 8:1; 23:42, 43) O boditše balatedi ba gagwe gore ba bolele ka Mmušo wa Modimo. Ge motho a etla go bolela le wena ka Mmušo wa Modimo, gantši e ba e le wa bodumedi bofe?—Bala Mateo 10:7; 24:14.

Balatedi ba Jesu ga se karolo ya lefase le le kgopo. Ga ba tšee karolo ditabeng tša dipolitiki goba dintweng tša selegae. (Johane 17:16) E bile ga ba ekiše mekgwa e gobatšago ya lefase gaešita le dikgopolo tša lona.—Bala Jakobo 1:27; 4:4.

5. Leswao le legolo la Bokriste bja therešo ke lefe?

Bakriste ba therešo ba ratana kudu. Ba ithuta Lentšung la Modimo go hlompha ditho tša merafo ka moka. Gaešita le ge bodumedi bja maaka bo thekgile dintwa tša ditšhaba gantši, barapedi ba therešo bona ba gana go dira bjalo. (Mika 4:1-4) Go e na le moo, ditho tša bodumedi bja therešo di diriša nako ya tšona le dilo tša tšona ka go hloka boithati di thuša le go kgothatša ba bangwe.—Bala Johane 13:34, 35; 1 Johane 4:20, 21.

Ke sehlopha sefe seo se theilego dithuto tša sona Lentšung la Modimo, se hlomphago leina la Modimo le go tsebatša gore Mmušo wa Modimo ke kholofelo e nnoši ya batho? Ke sehlopha sefe seo se bontšhago lerato le go se thekge ntwa? Ditherešo di šupa go Dihlatse tša Jehofa.—1 Johane 3:10-12.

Bakeng sa tsebišo e oketšegilego, bona kgaolo 15 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.

[Seswantšho go letlakala 16]

“Ba bolela phatlalatša gore ba tseba Modimo, eupša ba mo latola ka mediro ya bona.”—Tito 1:16