Babadi ba Rena ba a Botšiša . . .

Haramagedone ke Eng?

▪ Lentšu “Haramagedone” le gopotša batho ba bantši ka ditiragalo tša tshenyo e kgolo—ntwa ya nuclear, dikotsi tša tlhago tše di diregago ka tekanyo e kgolo, goba gaešita le dikotsi tša tikologo tšeo di bakwago ke go ruthela ga lefase. Lentšu le ge le dirišwa ka Beibeleng ga le bolele ka dilo tše. Bjale, Haramagedone ya ka Beibeleng ke eng?

Lentšu “Haramagedone” le tšwelela ka pukung ya Beibele ya Kutollo. Le bolela ka ntwa ya moswananoši, ‘ntwa ya letšatši le legolo la Modimo Ramatlaohle,’ yeo go yona “dikgoši tša lefase ka moka” di išwago ntweng ya makgaolakgang le Modimo. Mangwalo a mangwe a mmalwa le ona a bolela ka ntwa ya mohuta wo.—Kutollo 16:14-16; Hesekiele 38:22, 23; Joele 3:12-14; Luka 21:34, 35; 2 Petro 3:11, 12.

Ntwa ye e akaretša’ng? Ge e bolela ka tsela ya seswantšhetšo, puku ya Kutollo e re botša gore: “Dikgoši tša lefase le madira a tšona ba kgobokanetše go lwa le yo a nametšego pere le madira a gagwe.” Motho yo “yo a nametšego pere” ke Morwa wa Modimo, Jesu Kriste, yo a kgethilwego ke Modimo gore a etelele pele dikgao tša bahlabani ba barongwa gore ba fenye manaba a Modimo. (Kutollo 19:11-16, 19-21) Jeremia 25:33 e utolla bogolo bja phedišo ye ya batho bao ba sa boifego Modimo ka gore: “Bao ba bolailwego ke Jehofa ba tla tlala go tloga pheletšong e nngwe ya lefase go ya go e nngwe.”

Ke ka baka la’ng Haramagedone e nyakega? Ditšhaba di gana go amogela bogoši bja Modimo, eupša di tsebatša bja tšona. (Psalme 24:1) Lenyatšo la tšona le hlaloswa go Psalme 2:2, e rego: “Dikgoši tša lefase di a ema, matona ona a kgobokane a ipopa ngatana e tee go lwa le Jehofa le motlotšwa wa gagwe.”

Ge e le gabotse, marabele a a bjalo ka badudi ba baipei ba dihlogo tše thata bao ba sa bolelego feela gore lefase ke la bona eupša gape ba le dirišago gampe le go le senya. Ditšhaba lehono di senya lefase le go šilafatša tikologo ya lona. Lentšu la Modimo le boletše e sa le pele ka boemo bjo bjo bobe, ka gore: “Ditšhaba tša galefa gomme kgalefo ya [Modimo] ya tla.” Ke moka Modimo o tla “senya bao ba senyago lefase.” (Kutollo 11:18) Haramagedone ke tsela yeo e kgethilwego ke Modimo ya go rarolla kgang ya mabapi le yoo a nago le tshwanelo ya go buša batho ka moka.—Psalme 83:18.

Haramagedone e tla tla neng? Morwa wa Modimo o boletše ka go lebanya gore: “Ge e le mabapi le letšatši leo le iri, ga go na yo a tsebago, gaešita le barongwa ba magodimo le ge e le Morwa ga ba tsebe, eupša ke Tate feela yo a tsebago.” (Mateo 24:36) Go dutše go le bjalo, ge a bolela ka Haramagedone, Kgoši ya Mohlabani Jesu Kriste o ile a tlaleletša ka temošo ye, yeo e rego: “Tsebang gore ke tla bjalo ka lehodu. Go thaba yo a dulago a phafogile.” (Kutollo 16:15) Ka go re’alo, ntwa ye ya lefase ka moka e tswalana le nako ya go ba gona ga Kriste, yeo boporofeta bja Beibele bo bontšhago gore e šetše e fihlile.

Haramagedone e tla fediša feela batho ba kgopo ba sa ikemišetšago go fetoga, gomme go tla ba le “lešaba le legolo” la baphologi. (Kutollo 7:9-14) Le tla bona go phethagala ga mantšu a a rego: “Go se gokae yo kgopo o tla be a se sa le gona; wena o tla lebelela lefelo la gagwe, gomme yena o tla be a se gona. Eupša ba boleta bona e tla ba beng ba lefase, ba tla thaba kudu ka baka la go ata ga khutšo.”—Psalme 37:10, 11.

[Ntlhakgolo go letlakala 10]

“Ba boleta bona e tla ba beng ba lefase, ba tla thaba kudu ka baka la go ata ga khutšo”