Mmuši yo a sa Bonagalego wa Lefase o a Pepentšhwa

LEBAKENG le lengwe Jesu o ile a botša batho a re: “Mmuši wa lefase le o tla lahlelwa ntle.” Ka morago o ile a oketša ka go bolela gore ‘mmuši wa lefase o be a ka se mo dire selo’ le gore “mmuši wa lefase le o ahlotšwe.” (Johane 12:31; 14:30; 16:11) Jesu o be a bolela ka mang?

Ge re ela hloko seo Jesu a bego a se bolela ka “mmuši wa lefase le,” go molaleng gore o be a sa bolele ka Tatagwe, Jehofa Modimo. Ka gona, “mmuši wa lefase le” ke mang? O tla “lahlelwa ntle” bjang, le gona “o ahlotšwe” bjang?

“Mmuši wa lefase le” o a Ikutolla

Go fo swana le ge molaodi yo mogolo wa sehlopha sa disenyi a ikgantšha ka matla a gagwe, Diabolo le yena o dirile se se swanago ge a be a leka Jesu, Morwa wa Modimo. Ka morago ga go bontšha Jesu “mebušo ka moka” ya lefase, Sathane o ile a mmotša gore: “Ke tla go nea bolaodi bjo ka moka le letago la mebušo ye, gobane bo gafetšwe nna gomme ke bo nea mang goba mang yo ke nyakago go mo nea bjona. Ka gona, ge o ka nthapela gatee o le pele ga ka, e tla ba bja gago ka moka.”—Luka 4:5-7.

Ge e ba Diabolo e be e fo ba kgopolo e mpe, bjalo ka ge ba bangwe ba bolela, teko yeo e be e ka hlaloswa bjang? Na Jesu o be a lekwa ke kgopolo e itšego e mpe goba ke khuduego e itšego ya ka gare yeo mohlomongwe e tšweletšego ka morago ga gore a kolobetšwe? Ge e ba go le bjalo, ke bjang go bego go ka thwe “ga go na sebe go yena”? (1 Johane 3:5) Go e na le gore a latole matla a taolo ao Diabolo a nago le ona bathong, ge e le gabotse Jesu o ile a kgonthišetša seo ka go bolela ka yena e le “mmuši wa lefase,” a mo hlalosa e le “mmolai” le “moaketši.”—Johane 14:30; 8:44; The New Jerusalem Bible.

Ka morago ga nywaga e ka bago e 60 Kriste a gahlane le Diabolo, moapostola Johane o ile a gopotša Bakriste ka tutuetšo e matla ya Diabolo, a bolela gore “lefase ka moka le rapaletše matleng a yo kgopo.” Johane gape o boletše gore yena yoo o ‘timetša lefase ka moka.’ (1 Johane 5:19; Kutollo 12:9) Go molaleng gore Beibele e bolela ka sebopiwa se sa bonagalego sa moya e le “mmuši wa lefase.” Eupša o tutuetša batho kudu gakaaka’ng?

Mmuši wa Lefase o Abela Bagwera ba Gagwe Matla a Taolo

Ge moapostola Paulo a be a ngwala mabapi le ntwa ya Bakriste ya go lwela tumelo, o ile a hlaola gabotse manaba a bona a magolo. O boletše ka go lebanya a re: “Ga re lwe le madi le nama, eupša re lwa le mebušo le balaodi, le babuši ba lefase ba leswiswi le gotee le madira a kgopo a moya legodimong.” (Baefeso 6:12) Ka gona, ntwa ye ga e kgahlanong le batho, ka ge e lwewa e sego “le madi le nama,” eupša e lwewa le “madira a kgopo a moya.”

Go ya ka diphetolelo tše dintši kudu tša Beibele tša mehleng yeno, “madira a kgopo a moya” ao go bolelwago ka ona mo, ga a šupe go kgopolo e itšego e mpe, eupša a šupa go batho ba matla ba kgopo ba moya. Diphetolelo tše dingwe di fetolela taba ye ka ditsela tše bjalo ka tše rego “beng ba bokgopo ba moya ba mafelong a legodimo” (Revised Standard Version), “madira a moya a bobe magodimong” (The Jerusalem Bible) le “madira a bobe a nago le matla a phagametšego a batho magodimong” (The New English Bible). Ka gona, Diabolo o be a dutše a laola a diriša barongwa ba bangwe ba marabele bao ba tlogetšego “bodulo bja bona bjo bo swanetšego” legodimong.—Juda 6.

Puku ya boporofeta ya Beibele ya Daniele e utolla kamoo ‘babuši ba ba lefase’ ba bego ba dutše ba laola lefase go tloga mehleng ya  bogologolo. Ka ge a be a tshwenyegile kudu ka Bajuda ba gabo bao ba bego ba boetše Jerusalema ka 537 B.C.E. ba etšwa bothopša Babilona, moporofeta Daniele o ile a tšea dibeke tše tharo a ba rapelela. Morongwa, yo a bego a romilwe ke Modimo gore a tlo kgonthišetša moporofeta, o ile a mmotša lebaka leo ka lona a diegilego go fihla. O itše: “Kgoši ya mmušo wa Peresia e be e nkeme ka pele ka matšatši a masomepedi-tee.”—Daniele 10:2, 13.

‘Kgoši ye ya Peresia’ e be e le mang? Go molaleng gore morongwa o be a sa bolele ka Kgoši Korese wa Peresia, yoo ka nako yeo a bego a bontšha Daniele le batho ba gabo botho. Go oketša moo, kgoši feela ya motho e be e ka katana bjang le sebopiwa sa moya ka dibeke tše tharo mola morongwa o tee a tšere bošego bjo tee feela gore a fediše bahlabani ba matla ba 185 000? (Jesaya 37:36) ‘Kgoši ye ya Peresia’ ya lenaba e be e ka ba feela motseta wa Diabolo, ke gore, motemona yo a bego a laetšwe gore a laole Mmušo wa Peresia. Ka moragonyana pegong yeo, morongwa wa Modimo o ile a bolela gore o be a tla swanelwa ke go lwa gape le “kgoši ya Peresia” le kgoši e nngwe ya motemona, e lego “kgoši ya Gerika.”—Daniele 10:20.

Re ka phetha ka gore’ng tabeng ye? Re ka phetha ka go fo re ruri go na le “babuši ba lefase” bao ba sa bonagalego, e lego dikgoši tša batemona tšeo di laolago lefase ka tlase ga taolo ya kgoši ya tšona e kgolo, Sathane Diabolo. Eupša go fihla ga bjale ba be ba dutše ba ikemišeditše’ng?

Mmuši wa Lefase o a Iponagatša

Ka pukung ya mafelelo ya Beibele ya Kutollo, moapostola Johane o anega kamoo Jesu, e le Mikaele morongwa yo mogolo, a fenyago Diabolo le batemona ba gagwe gomme a hlalosa mafelelo a senyago ao a bakwago ke go rakwa ga bona legodimong. Re bala gore: “Go madimabe lefase . . . gobane Diabolo o theogetše go [wena] a galefile kudu, ka ge a tseba gore o na le nako e kopana.”—Kutollo 12:9, 12.

Diabolo o bontšhitše bjang gore o galefile kudu? Go fo swana le ge disenyi tše dintši tše di lego tlalelong di latela molao wa gore ‘buša goba o senye,’ Diabolo le batemona ba gagwe ba ikemišeditše gore ba fedišwe le lefase le badudi ba lona. Ka go tseba gore nako ya gagwe ke e kopana, Diabolo o be a dutše a diriša e nngwe ya dikarolo tše dikgolo tša lekoko la batho leo a le laolago—kgwebo e kgolo—go kgothaletša mokgwa o sa laolegego wa go swarega ka go reka, woo o fokotšago ditšweletšwa tša tlhago le go senya tikologo lefaseng ka bophara, ka go re’alo wa bea bophelo bja batho kotsing.—Kutollo 11:18; 18:11-17.

Ga e sa le go tloga mathomong a histori ya batho, go nyorelwa ga Diabolo matla a taolo go bonagetše gape dipolitiking le bodumeding. Puku ya Kutollo e swantšha mebušo ya dipolitiki le dibata tšeo Diabolo a di neilego “taolo e kgolo.” Gape e bolela gore go leša dihlong gore bodumedi bo itsenye dipolitiking ka go bitša tswalano yeo gore ke bohlotlolo bja moya. (Kutollo 13:2; 17:1, 2) Nagana ka kgatelelo, bokgoba, dintwa tše dikgolo le dintwa tša selegae tšeo di bolailego batho ba dimilione go theoša le nywagakgolo. Na go na le motho yo a ka bolelago ka go botega gore ditiragalo tše di tšhošago le tše di boifišago tšeo di sentšego histori ya batho e be e le dilo tše di tlwaelegilego tšeo di dirwago ke batho? Goba na di bakilwe ke madira a kgopo ao a sa bonagalego a moya?

Beibele e hlaola ka go lebanya le go utolla motho yoo a bego a dutše a laola baetapele ba batho le mebušo ya lefase. Go sa šetšwe gore lekoko la batho le lemoga seo goba go se bjalo, le bonagatša semelo sa mmuši wa lona le molao wa gagwe wa gore ‘buša goba o senye.’ Eupša batho ba tla tšea nako e kaaka’ng ba tlaišega ka tlase ga pušo ya Diabolo?

Diabolo o a Fedišwa

Modiro wa Kriste wa lefaseng wa lekgolong la pele la nywaga o ile wa bontšha gore Diabolo le batemona ba gagwe ba be ba tlo bolawa kgauswinyane. Ge barutiwa ba Jesu ba be ba anega kamoo ba lelekilego batemona bao ba sa bonagalego, o ile a ba botša gore: “Ke thomile  go bona Sathane a šetše a wele legodimong ka lebelo la go swana le la legadima.” (Luka 10:18) Ka mantšu ao, Jesu o be a thabela phenyo ya gagwe ya nakong e tlago ya ge a fenya mmuši wa lefase yeo e bego e tla direga ka morago ga ge Jesu a boetše legodimong e le Mikaele morongwa yo mogolo. (Kutollo 12:7-9) Thuto e tseneletšego ya diporofeto tša Beibele e bontšha gore phenyo ye e diregile legodimong ka 1914 goba ka moragonyana ga moo. *

Ga e sa le go tloga nakong yeo, Diabolo o tseba gore nako yeo e šetšego pele a ka fedišwa ke e kopana. Gaešita le ge ‘lefase ka moka le rapaletše matleng a gagwe,’ batho ba dimilione lehono ga se ba timetšwa ke maiteko a gagwe a magolo a go leka go ba laola. Beibele e ba butše mahlo ka go ba bontšha seo a lego sona e le ka kgonthe le maano a gagwe. (2 Bakorinthe 2:11) Ba hwetša kholofelo mantšung ao Paulo a a boditšego Bakristegotee le yena a rego: “Modimo yo a neago khutšo yena, o tla pšhatlaganya Sathane tlase ga dinao tša lena kgauswinyane.” *—Baroma 16:20.

Diabolo o tla tloga a fedišwa kgauswinyane! Ka tlase ga pušo ya Kriste e lerato, batho ba lokilego ba tla fetoša bogato bja dinao tša Modimo bja seswantšhetšo, e lego lefase, gore e be paradeise. Bosenyi, lehloyo le megabaru di tla felela sa ruri. Beibele e re: “Dilo tša pele di ka se sa gopolwa.” (Jesaya 65:17) Bohle bao ba tlago go lokologa go mmuši wa lefase le yo a sa bonagalego le taolong ya gagwe ba tla imologa e le ruri!

[Mengwalo ya tlase]

[Ntlhakgolo go letlakala 9]

Ka tlase ga pušo ya Kriste e lerato, batho ba lokilego ba tla fetoša lefase gore e be paradeise