Ithute Lentšung la Modimo

O ka Batamela Kgauswi le Modimo Bjang?

Sehlogo se se rotoša dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahaahla dikarabo tše le wena.

1. Na Modimo o theetša dithapelo ka moka?

Jehofa o laletša batho ba ditšhaba ka moka gore ba batamele kgauswi le yena ka thapelo. (Psalme 65:2) Eupša ga a theetše dithapelo ka moka. Ka mohlala, ge Baisiraele ba be ba phegelela go dira bobe, Modimo o ile a gana go kwa dithapelo tša bona. (Jesaya 1:15) Le gona, dithapelo tša monna yo a swarago mosadi wa gagwe gampe di ka šitišwa. (1 Petro 3:7) Lega go le bjalo, Modimo o tla kwa gaešita le badiradibe ba bagolo ge ba itshola.—Bala 2 Dikoronika 33:9-13.

2. Re swanetše go rapela bjang?

Thapelo ke tokelo e bile ke karolo ya borapedi bja rena, ka gona re swanetše go rapela Jehofa a nnoši. (Mateo 4:10; 6:9) Ka ge re se ra phethagala, re swanetše go rapela ka leina la Jesu ka ge e le yena yo a kgethilwego e le “tsela.” (Johane 14:6) Jehofa ga a nyake gore re boaboetše dithapelo tšeo di swerwego ka hlogo goba tšeo di ngwadilwego eupša o nyaka gore re rapele go tšwa pelong.—Bala Mateo 6:7; Bafilipi 4:6, 7.

Mmopi wa rena o kgona go kwa gaešita le dithapelo tša setu. (1 Samuele 1:12, 13) O re laletša gore re rapele ka dinako tšohle, go swana le ge re yo robala le ge re tsoga, ka nako ya go ja le ge re lebeletšane le mathata.—Bala Psalme 55:22; Mateo 15:36.

3. Ke ka baka la’ng Bakriste ba bokana gotee?

Ga go bonolo go batamela kgauswi le Modimo ka ge re phela gare ga batho bao ba sa dumelego go Modimo le bao ba kwerago kholofetšo ya gagwe ya go tliša khutšo mo lefaseng. (2 Timotheo 3:1, 4; 2 Petro 3:3, 13) Ka gona, go nyakega gore re be le dipokano tšeo di kgothatšago le badumedigotee le rena.—Bala Baheberu 10:24, 25.

O ka batamela kgauswi le Modimo ge e ba o gwerana le batho bao ba ratago Modimo. Diboka tša Dihlatse tša Jehofa di nea dibaka tša go holwa ke tumelo ya ba bangwe.—Bala Baroma 1:11, 12.

  4. O ka batamela kgauswi le Modimo bjang?

O ka batamela kgauswi le Jehofa ka go naganišiša ka seo o ithutilego sona Lentšung la gagwe. Naganišiša ka mediro ya gagwe, tlhahlo le dikholofetšo tša gagwe. Go naganišiša ka thapelo go dira gore re tloge re leboga lerato la Modimo le bohlale bja gagwe.—Bala Joshua 1:8; Psalme 1:1-3.

O ka ba kgauswi le Modimo ge feela o mmota e bile o dumela go yena. Eupša tumelo e swana le selo seo se phelago seo se nyakago go hlokomelwa. O swanetše go tšwela pele o fepa tumelo ya gago ka go hlahloba motheo wa ditumelo tša gago.—Bala 1 Bathesalonika 5:21; Baheberu 11:1, 6.

5. Go batamela kgauswi le Modimo go tla go hola bjang?

Jehofa o na le taba le bao ba mo ratago. O ba šireletša selong se sengwe le se sengwe seo se ka beago tumelo le kholofelo ya bona ya bophelo bjo bo sa felego kotsing. (Psalme 91:1, 2, 7-10) O re lemoša ka ditsela tša bophelo tšeo di ka beago boemo bja rena bja tša maphelo le lethabo la rena kotsing. Jehofa o re ruta tsela e di phalago tšohle ya bophelo.—Bala Psalme 73:27, 28; Jakobo 4:4, 8.

Bakeng sa tsebišo e oketšegilego, bona kgaolo 17 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.