Batamela Kgauswi le Modimo

“Wena Jehofa, . . . o a Ntseba”

“GA GO na morwalo o mogolo wo o ka rwalwago ke motho go feta go tseba gore ga go yo a nago le taba le yena goba yo a mo kwešišago.” * Na o dumelelana le mantšu ao? Na o kile wa ikwa eka ga go motho yo a nago le taba le wena goba yo a kwešišago seo o lebeletšanego le sona, go se sa bolelwa kamoo o ikwago ka gona? Ge e ba go le bjalo, o ka hwetša khomotšo mantšung a: Jehofa o tloga a ena le taba le barapedi ba gagwe moo a elago hloko sohle seo se diregago maphelong a bona letšatši le letšatši. Mantšu a Dafida a lego go Psalme 139 a re kgonthišetša ka therešo ye.

A kgodišegile gore Modimo o na le taba le yena, Dafida o re: “Wena Jehofa, o mphetlekile gomme o a ntseba.” (Temana 1) Dafida mo o diriša papišo e botse. Lediri la Seheberu leo le fetoletšwego e le “mphetlekile” le ka šupa go go epša ga borale (Jobo 28:3), go lekolwa ga naga (Baahlodi 18:2), goba go hlahlobišišwa ga ditherešo tša molato wo o sekwago (Doiteronomio 13:14). Ee, Jehofa o re tseba gabotse moo ekego o ile a hlahloba karolo e nngwe le e nngwe le khutlo e nngwe le e nngwe ya bophelo bja rena. Dafida o re ruta gore Modimo o na le taba le bahlanka ba gagwe ka o tee ka o tee. O a ba hlahloba e bile o ba tseba ka o tee ka o tee.

Dafida o nabiša kgopolo ya gore Modimo o re fetleka ka mo go feletšego ka gore: “Wena o tseba ge ke dula fase le ge ke ema. O etše hloko dikgopolo tša ka di sa le kgole.” (Temana 2) Ge e le gabotse, Jehofa o “kgole,” ka ge a dula magodimong. Lega go le bjalo, o tseba ge re dula fase, mohlomongwe bofelong bja letšatši le letelele, le ge re tsoga mesong le go dira mediro ya rena ya letšatši le letšatši. Gape o tseba dikgopolo, dikganyogo le maikemišetšo a rena. Na Dafida o ikwa a le kotsing ge a hlahlobja ka tsela e bjalo e tseneletšego? Ka mo go fapanego, o thabela go hlahlobja moo. (Temana 23, 24) Ka baka la’ng?

Dafida o tseba gore Jehofa o hlahloba barapedi ba Gagwe ka maikemišetšo a mabotse. Dafida o umaka maikemišetšo a ka go ngwala gore: “O ntšheditše ge ke tšea leeto le ge ke robetše, ditsela tša ka ka moka o di tseba gabotse.” (Temana 3) Letšatši le letšatši, Jehofa o bona ‘ditsela tša rena ka moka’—diphošo tša rena gaešita le mediro ya rena e mobotse. Na Jehofa o lebiša tlhokomelo medirong e mebotse goba go e mebe? Lentšu la Seheberu leo le fetoletšwego e le “ntšheditše” le ka bolela go “fefera,” goba go “ološa,” go fo swana le ge molemi a fefera mooko o se nago mohola bakeng sa go šadiša mabele a nago le mohola. Polelwana e rego “tseba gabotse” ke phetolelo ya lentšu la Seheberu leo le ka bolelago “go tšeela godimo.” Ge a hlahloba dilo tšeo di bolelwago le go dirwa ke barapedi ba gagwe letšatši le letšatši, Jehofa o tšeela godimo botse bjoo a bo hwetšago. Ka baka la’ng? O tšeela godimo maiteko a bona a go mo kgahliša.

Psalme 139 e re ruta gore Jehofa o tloga a ena le taba le barapedi ba gagwe. O a ba fetleka le go ba šetša ge ba swaregile ka mediro ya bona ya letšatši le letšatši. Ka go re’alo, o tseba mathata ao ba lebeletšanago le ona gomme o kwešiša bohloko bja pelo le bja monagano bjo bo bakwago ke mathata a. Na o tutueletšega go rapela Modimo yo bjalo yo a nago le taba? Ge e ba go le bjalo, o ka kgodišega ka se: Le ka mohla Jehofa a ka se ‘lebale modiro wa gago le lerato leo o le bontšhitšego leineng la gagwe.’—Baheberu 6:10.

Mmalo wa Beibele o šišintšwego bakeng sa September:

▪ Dipsalme 119-150

[Mongwalo wa tlase]