3 Modimo o na le Moya wa go Itefeletša—Na ke Therešo?
3 Modimo o na le Moya wa go Itefeletša—Na ke Therešo?
Seo o ka bago o se kwele: “Modimo o boloka pego ya sebe se sengwe le se sengwe gomme o otla batho ka mo go sa felego mollong wa dihele.”
“Modimo o otla badiradibe ka dikotsi tša tlhago.”
Seo Beibele e se rutago: Petro wa bobedi 3:9 e re Jehofa “ga a rate gore go fedišwe le ge e le mang, eupša o rata gore bohle ba fihlelele boitsholo.” Go e na le gore a lebiše tlhokomelo diphošong tša rena, o šetša ditiro tša rena tše dibotse. “Mahlo a [Modimo] a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.”—2 Dikoronika 16:9.
Mollo wa dihele ga se thuto ya Beibele—Modimo ga a swanelwe ke kgopolo ya gore o tlaiša batho ka mo go sa felego. Kotlo e kgolo yeo a ka otlago bakgopo ka yona ke go ba amoga mpho ya bophelo. (Jeremia 7:31; Baroma 6:7) Ge e le dikotsi tša tlhago, tšeo di bolayago ka go se kgethe, ga se ditiro tša Modimo eupša ke ditiragalo tše di sa letelwago tšeo di ka welago mang le mang.—Mmoledi 9:11.
Kamoo go tseba therešo go go thušago ka gona: Re ka batamela kgauswi le Modimo ge e ba re lemoga gore “o ikemišeditše go lebalela” e bile ga a akgofele go otla. (Psalme 86:5) Ga go nyakege gore re hlankele Modimo ka maikwelo a molato goba ka poifo e feteletšego ya go otlwa. Go e na le moo, re ka aga tumelo ya rena re ena le tutuetšo e botse—go rata Jehofa. Lerato le bjalo le re tutueletša go dira sohle seo re ka se kgonago gore re mo kgahliše.—Mateo 22:36-38; 1 Johane 5:3.
Gaešita le ge Modimo a nyaka gore bohle ba dire botse, o tseba gore ba bantši ba ka se tsoge ba dirile bjalo. Ge nkabe a se a ka a dira selo kgahlanong le bao ba ikemišeditšego go dira tše mpe, gona o be a ka se fapane le mmuši yo a hlamago melao ke moka a se kgonthišetše gore e a latelwa, ka go re’alo a dumelela go hloka toka le tlaišego di eba gona ka mo go sa felelego. (Mmoledi 8:11) Go tseba gore Modimo a ka se kgotlelele bokgopo go ya go ile go re nea kholofelo e tiilego ya bokamoso. Modimo o holofeditše go fediša bao ba phegelelago ditiro tše mpe, e le gore “ba boleta” ba ka thabela bophelo lefaseng bjalo ka ge a be a rerile mathomong.—Psalme 37:10, 11, 29. *
[Mongwalo wa tlase]
^ ser. 7 Go ithuta ka mo go oketšegilego mabapi le kamoo Modimo a tlago go fetoša lefase paradeise, bona dikgaolo 3 le 8 tša puku ya Ke Eng Seo ge e le Gabotse Beibele e se Rutago?
[Ntlhakgolo go letlakala 6]
Na Modimo a ka nyaka gore re mo rapele ka gobane re tšhaba kotlo?
[Mothopo wa Seswantšho go letlakala 6]
Engravings by Doré
