Ithute Lentšung la Modimo

Lapa la Gago e ka ba Leo le Thabilego Bjang?

Sehlogo se se rotoša dipotšišo tšeo o ka bago o ile wa di botšiša le go go bontšha moo o ka balago dikarabo gona ka Beibeleng ya gago. Dihlatse tša Jehofa di tla thabela go ahlaahla dikarabo tše le wena.

1. Ke ka baka la’ng go nyakega gore batho ba nyalane e le gore lapa e be leo le thabilego?

Jehofa, Modimo yo a thabilego, ke mothomi wa lenyalo. Lenyalo le a nyakega gore lapa e be leo le thabilego ka gobane ga le dire feela gore motho a be le mogwera eupša e bile le dira gore go be le boemo bjo bo šireletšegilego bja go godišetša bana. Modimo o lebelela lenyalo bjang? O nyaka gore e be tswalano ya sa ruri, yeo e ngwadišitšwego ka molao ya monna le mosadi. (Luka 2:1-5) Modimo o nyaka gore banna le basadi bao ba nyalanego ba botegelane. (Baheberu 13:4) Jehofa o dumelela Bakriste go hlala goba go tsena lenyalong gape ge feela balekane ba bona ba dira bohlotlolo.—Bala Mateo 19:3-6, 9.

2. Monna le mosadi ba swanetše go swarana bjang?

Jehofa o bopile banna le basadi gore ba tlatšane lenyalong. (Genesi 2:18) Ka ge e le hlogo ya lapa, monna o swanetše go etelela pele go hlokomeleng lapa la gagwe ka dilo tše di bonagalago le go le ruteng ka Modimo. O swanetše go bontšha mosadi wa gagwe lerato la boikgafo. Banna le basadi ba swanetše go ratana le go hlomphana. Ka ge banna ka moka gotee le basadi ba se ba phethagala, go ithuta go lebalela ke tsela ya go hwetša lethabo lenyalong.—Bala Baefeso 4:31, 32; 5:22-25, 33; 1 Petro 3:7.

3. Na o swanetše go tšwa lenyalong leo le sego la thaba?

Ge e ba wena le molekane wa gago le na le mathata, katanelang go swarana ka lerato. (1 Bakorinthe 13:4, 5) Lentšu la Modimo ga le kgothaletše karogano e le tsela ya go rarolla mathata a lenyalo. Lega go le bjalo, maemong a feteletšego, Mokriste o tla swanelwa ke go phetha ge e ba go swanetše gore ba arogane goba go se bjalo.—Bala 1 Bakorinthe 7:10-13.

  4. Bana, Modimo o le kganyogela eng?

Jehofa o nyaka gore le thabe. O le nea keletšo e di phalago tšohle mabapi le tsela ya go thabela bofsa bja lena. O nyaka gore le holwe ke bohlale le phihlelo tša batswadi ba lena. (Bakolose 3:20) Jehofa o lemoga selo se sengwe le se sengwe seo le se dirago bakeng sa go mo tumiša.—Bala Mmoledi 11:9–12:1; Mateo 19:13-15; 21:15, 16.

5. Batswadi, bana ba lena ba ka hwetša bjang lethabo?

Le swanetše go šoma ka thata go nea bana ba lena dijo, bodulo le diaparo. (1 Timotheo 5:8) Eupša e le gore bana ba lena ba hwetše lethabo, gape le swanetše go ba ruta go rata Modimo le go ithuta go yena. (Baefeso 6:4) Mohlala wa lena wa go bontšha go rata Modimo o ka kgoma dipelo tša bana ba lena ka mo go tseneletšego. Ge thuto ya lena e theilwe Lentšung la Modimo, e ka dira gore tsela ya bana ba lena ya go nagana e be e kgahlišago.—Bala Doiteronomio 6:4-7; Diema 22:6.

Bana ba a holega ge le ba kgothatša le go ba reta. Le gona ba nyaka go phošollwa le go laiwa. Tlwaetšo e bjalo e ba šireletša boitshwarong bjoo bo ka ba amogago lethabo. (Diema 22:15) Lega go le bjalo, tayo le ka mohla ga se ya swanela go ba e thata goba e sehlogo.—Bala Bakolose 3:21.

Dihlatse tša Jehofa di gatiša dipuku tše mmalwa tšeo ka go lebanya di ngwaletšwego go thuša batswadi le bana. Dipuku tše di theilwe Beibeleng.—Bala Psalme 19:7, 11.

Bakeng sa tsebišo e oketšegilego, bona kgaolo 14 ya puku ye, Ke Eng Seo ge e le Gabotse Beibele e se Rutago? yeo e gatišitšwego ke Dihlatse tša Jehofa.