Na o be o Tseba?

Ke ka baka la’ng go be go na le baananyi ba tšhelete tempeleng ya Jerusalema?

▪ Pejana ga lehu la gagwe, Jesu o ile a swaragana le go hloka toka mo gogolo moo go bego go direga tempeleng. Beibele e bega gore: “Jesu . . . a raka bohle bao ba bego ba rekiša le go reka ka tempeleng, a menola ditafola tša baananyi ba tšhelete le dipanka tša bao ba rekišago maeba. Ke moka a re go bona: ‘Go ngwadilwe gwa thwe: “Ntlo ya ka e tla bitšwa ntlo ya thapelo,” eupša lena le e dira lewa la bahlakodi.’”—Mateo 21:12, 13.

Bajuda ba lekgolong la pele la nywaga gotee le bao ba bego ba sokologetše tumelong ya Sejuda ba be ba etla Jerusalema ba etšwa dinageng tše dintši le metseng e mentši, ba etla le ditšhelete tša tšhipi tša moo ba tšwago gona. Lega go le bjalo, ba be ba swanetše go diriša tšhelete yeo e amogelegago ge ba lefa motšhelo wa tempele wa ngwaga le ngwaga, ge ba reka diphoofolo tša go dira dihlabelo le ge ba dira dibego tše dingwe tša boithaopo. Ka gona, baananyi ba tšhelete ba be ba ananya ditšhelete tša tšhipi tše di tšwago mafelong a sa swanego ka tšhelete yeo e amogelegago gomme ba lefiša tšhelete e itšego. Ge menyanya ya Bajuda e be e batamela, baananyi ba ba tšhelete ba be ba bea ditafola Lapeng la Bantle la tempeleng.

Go bonagala go sola ga Jesu baananyi ba tšhelete ka gore ba be ba dira tempele “lewa la bahlakodi” go bontšha gore ba be ba lefiša tšhelete e ntši kudu bakeng sa ditirelo tša bona.

Ke ka baka la’ng mehlware e be e tšeelwa godimo kudu mehleng ya Beibele?

▪ Mehlware le dirapa tša merara di be di le gare ga ditšhegofatšo tšeo Modimo a bego a di holofeditše batho ba gagwe ge ba be ba ka mmotegela. (Doiteronomio 6:10, 11) Go fihla le lehono, mohlware o sa tšeelwa godimo kudu mafelong ao o melago go ona. O ka kgona go enywa dienywa tše dintši kudu ka nywaga e makgolo o sa hlokomelwe gakaalo. Mohlware wo o bjetšwego o ka gola gaešita le lekgwareng e bile o ka kgona go kgotlelela komelelo yeo e felago e eba gona. Ge sehlare se ka rengwa, kutu e tšweletša mahlogedi a mmalwa ao e ka bago dikutu tše difsa.

Mehleng ya Beibele, letswamathi le matlakala a mohlware di be di tšeelwa godimo kudu bakeng sa go kgona ga tšona go fokotša letadi. Borekhu bjo bo tšwago makaleng a kgale e bile bo na le monko wa vanilla bo be bo dirišetšwa go dira senkgišabose. Lega go le bjalo, mohlware o be o tšeelwa godimo kudu e le mothopo wa dijo—mahlware a wona, kudukudu makhura a wona. Mo e ka bago seripagare sa sesohlo sa lehlware leo le budulego se dirwa ke makhura.

Mohlware o mobotse o be o ka tšweletša dilithara tše e ka bago tše 57 tša makhura ka ngwaga. Le gona makhura a mohlware a be a dirišwa e le makhura a lebone, a dirišetšwa merero ya ditirelo tše itšego le ya bodumedi, a dirišwa e le setlolo sa mmele le sa moriri e bile e le sehlare sa go thapiša dintho le go okobatša matetelo.—Ekisodo 27:20; Lefitiko 2:1-7; 8:1-12; Ruthe 3:3; Luka 10:33, 34.