Na go Tseba Karabo go Bohlokwa?

“Ke thomile go intšha le bašemane ge ke be ke ena le nywaga e lesome. Mathomong, re be re swarana ka diatla le go atlana. Lega go le bjalo, go se go ye kae ke ge re phopholana ditho tše di utwago tša mmele le go leka mekgwa e fapafapanego ya thobalano. Ge ke be ke ena le ngwaga e 15, ke ile ka thoma go šoma gomme banna bao ke bego ke šoma le bona ba be ba kgopela go robala le nna. Ke be ke nyaka go bontšha sebete le go dira sohle seo bašomigotee le nna ba bego ba se dira. Ke be ke nyaka go amogelwa ke bašomigotee le nna, e lego seo se ilego sa feleletša ka gore ke robale le banna ba bantši kudu.”—SARAH, * AUSTRALIA.

NA O ka makatšwa ke go kwa gore Sarah o be a godišeditšwe ka lapeng leo le ineetšego bodumeding? Batswadi ba gagwe ba lekile go mo godiša gore a phele ka ditekanyetšo tša Beibele tša boitshwaro. Eupša Sarah o ile a kgetha tsela e fapanego.

Ba bantši ba ka dumelelana le kgetho ya Sarah. Ba dumela gore pono ya Beibele ka thobalano e tloga e šiilwe ke nako. Ba bangwe ga ba bone e le phošo go ipolela gore ke badumedi ba ineetšego ba dutše ba phegelela mekgwa e gobogilego ya thobalano.

Na go na le taba gore o tseba seo Beibele e se rutago ka thobalano le go phela ka go dumelelana le sona? Beibele e ipolela gore e “buduletšwe ke Modimo gomme [e] hola ka go ruta.” (2 Timotheo 3:16) Ge e ba o dumela gore Modimo o bopile batho le gore Beibele ke Lentšu la gagwe le le buduletšwego, gona go bohlokwa gore o tsebe seo e se bolelago ka taba ye.

Ka manyami, ba bantši ba gakanegile mabapi le seo Beibele e se rutago ka thobalano. Baetapele ba bodumedi bao ba ipolelago gore ba hlompha Beibele ba ruta dikgopolo tšeo di thulanago. Ge e le gabotse, taba ye e arogantše dikereke tše dintši tše dikgolo.

Go e na le go ithekga ka seo ba bangwe ba se bolelago, o re’ng o sa iphe nakwana ya go nyakišiša taba ye ka bowena? Sehlogo se se latelago se ahlaahla dipotšišo tše lesome tšeo di botšišwago gantši mabapi le pono ya Beibele ka thobalano. Sehlogong seo o tla hwetša dikarabo tše di lebanyago tšeo di theilwego go seo ge e le gabotse Beibele e se rutago. Sehlogo sa mafelelo sa lelokelelo le la dihlogo se tla ahlaahla lebaka leo ka lona dikgetho tšeo re di dirago di lego bohlokwa.

[Mongwalo wa tlase]